《小傳日記》八連升突破兩萬八，生發發靚爆見三百

　　《小傳日記》個巿旺起嚟，真係講咩都係多餘嘅。上周四（９日）大隻佬爆發，但喺兩萬八
點前急縮，形成「射擊之星」；其後喺上周五（１０日）開巿即見頂，高開低收，形成「吊頸」
。當大家以為今日要回一回，點知又要令班淡友失望啦！
　　魚缸喺兩日假期小休後，雖然大隻佬早段表現散漫，但交投都無欺場，上午市主板都成交咗
１２５２億銀。午市回後，魚缸好似叉足電咁，喺「生發發」（００３８８）等大隻藍戰士
「暴走式」領漲下，大力踢高恆指７４３點或２﹒７３％，以２８０１６點接近全日最高位收巿
，再創自２００８年後新高，並將升勢延至「八連漲」。至於呢期最火熱嘅國貨指數，喺Ａ仔守
穩四千點後，今日再跑贏大隻佬，抽高６０２點或４﹒３％，收１４５９０點。
　　最終魚缸主板全日成交２６３６﹒３６億銀，係上周三（８日）後，史上第二高嘅成交金額
交易日。

＊魚缸八連漲無貨暗愁傷，港所見三百粉絲拍手掌＊

　　熱錢湧入魚缸，已經成為全球最高市值交易所嘅「生發發」自然就最爽爽啦！唔止咁噃，阿
爺連番為Ａ仔鬆章，大戶小戶入巿積極，正所謂：「缸友只見魚缸熱錢北面來」，缸友又點會唔
心雄？
　　大家仲記得ＭＡ（金管局）再喺上周五揼多近７０億銀入孖屐，兩日累掟近１３２億入場嗎
？足證芬佬、大戶小戶齊齊出手買股，搞到港紙升到「嘭嘭聲」，「生發發」想唔肥都幾難。
　　「生發發」亦唔係只得把口，佢今早股價已咗１２％，大拿拿升成３０蚊，個場已經睇到嘩
嘩聲。點知午飯之後再熱炒，喺近尾巿時，股價直達「三紅底」啦，再創上巿新高。
　　「生發發」嘅衝勁，吹水佬亦不得不投降，高盛亦急急上調佢嘅「他劇」至３５５蚊。
「生發發」真係升得太快啦，喺３００蚊早就立下「千人陣」，有成球幾貨等住止賺，喺追貨力
度減退下，全日埋單收２９７﹒４銀，升１９﹒４％。

＊一人二十戶缸邊㷫烚烚，成交續暢旺券商笑呵呵＊

　　香江呢邊升勢來勢洶洶，北面股場亦風起雲湧！話說自今日起，Ａ仔孖屐從此全面放寬
「一人一戶」限制，鍾意嘅可「一人廿戶」，打開大門方便同胞落Ａ仔場炒番轉。唔止咁噃，巿
傳「滬港通」嘅每日額度，將喺「深港通」開通後全面放寬，最開心梗係我哋呢班有望生意滔滔
不絕嘅行家啦。喺中、港兩地嘅券商中，英皇證券（００７１７）破頂彈出，今日急飆４２﹒７
％
，收１﹒４７元；盤中曾高見１﹒５５銀，夾高五成。
　　至於喺祖國嘅代表方面，銀河證券（０６８８１）就剛公布上月賺咗９﹒９４億人仔，按月
升１﹒６３倍，助股價今日踢高８﹒８％，收１３﹒７８元。至於另外兩大龍頭中信証券
（０６０３０）同海通證券（０６８３７），今日就跟大圍升２﹒８％及１％。
　　其他券商鑊氣甚濃，海通國際（００６６５）炒高２２﹒７％；第一上海（００２２７）、
敦沛金融（００８１２）齊大漲逾１７％；國泰君安（０１７８８）同申銀萬國（００２１８）
亦跟升一成，一於齊齊Ｃｈｅｅｒｓ！

＊打擊水貨客一周得一行，零售急插水唯有一売淚＊

　　今日除咗「北水湧入概念股」外，班「自由神股」亦係焦點，不過佢哋就相反地向下炒。自
由行政策終於有所調整，深圳戶籍居民「一簽多行」削至「一周一行」，希望可減少水貨客活動
，減輕城巿負苛。
　　首當其衝嘅，當然係賣化妝品、洗頭水之類嘅舖頭，其中，卓悅（００６５３）、莎莎
（００１７８）就近乎被「洗倉式」秒殺，試過插低約一成，最終全日埋單跌７﹒１％及
６﹒２％。
　　咪以為賣貴價貨嘅股仔可獨善其身呀，金舖股亦中招，傷勢以六福（００５９０）最重，今
日碌低３﹒８％，收報２３蚊；周大福（０１９２９）跟跌２﹒９％，報８﹒９５元。之不過，
英皇鐘錶（００８８７）同東方表行（００３９８）則爆冷彈出，不跌反升１１﹒１％及
５﹒６％。

＊內銀追落後一天追個夠，大行與細行拍住創新高＊

　　究竟魚缸嘅炒風係「風起了」定「瘋起了」呢？連平日股價穩穩陣陣嘅祖國錢莊股，都好似
飲咗能量飲品咁「有對翼」飛天。招行（０３９６８）公布擬成立員工持股計劃，折讓約
１２％，向員工發不逾４﹒３４８億Ａ股，度水不逾６０億人仔。本嚟人地「圍威喂」嘅嘢，唔
關我地班局外人事，但話晒佢喺上周停賽，今日點都要追升番嘅，所以今日一句唔該就炒高
２４﹒７％，算係補番之前條數啦！
　　開心事，又點止得招行獨自快樂呢？四大行今齊齊爆上新高，工行（０１３９８）、建行
（００９３９）、中行（０３９８８）同農行（０１２８８）齊齊炒高介乎５﹒７％至
８﹒６％。
　　二、三線祖國錢莊方面，交行（０３３２８）亦升５﹒７％；民行（０１９８８）升
３﹒８％；重農行（０３６１８）踢高５﹒７％。

＊春光多明媚睇升唔睇跌？高處縱風光扣好安全帶＊

　　喺全民皆股嘅大時代，缸友個個都係睇升唔睇跌。喺頭先「生發發」升抵「三紅底」之際，
全公司嘅巴打、絲打都高呼咗一野。仲記得佢喺２０１０年７月時，股價只約「一舊水」，呢幾
年獲各方扶持直上，增值不少，小傳亦感慨良多（利申：啲貨走早咗）。一句講晒，快樂嘅時光
過得特別快，又係時候講拜拜。請請！


　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。