《小傳日記》阿爺繼續撐Ａ場，無奈香江失方向！

　　《小傳日記》外圍股市呢幾日都回復平靜，Ａ場都算唔錯，喺四千點大關上上落落，點知突
然傳出阿爺研究緊維穩資金退出方案？！嚇到中證監「拿拿淋」走出嚟澄清，話絕對無咁嘅事，
將會繼續穩定市場，穩定人心！其實都明白嘅，近排中港魚缸止咗瀉，淡友梗係想借啲傳聞質低
個市喇。不過，阿爺千辛萬苦先托番高個市，又點會再畀佢哋奸計得逞呀。
　　結果，Ａ場收升近１巴仙報３９９２點，寫下三連升。不過香江就仲係呆吓呆吓，全日高低
波幅只得２４１點，收市微微跌低１０點報２５４０４，國貨佬就唔見７６點報１１７７３，主
板成交愈嚟愈少，得番８４９億銀左右。悶！
　　
＊阿爺來錫錫ＱＱ有追捧，花旗忽唱好大象平靚正＊

　　不過大隻藍戰士都算頂得住，納指再創收市新高，加上阿爺發表意見支持發展互聯網金融，
股王ＱＱ（００７００）有追捧，逆市踢高收報１５５﹒５銀，升破五十天線（約１５５﹒１銀
）。
　　大笨象（００００５）被花旗唱好，話目前市帳率得０﹒９倍，夠曬平，加上預期花旗國９
月開始加息，相信到時大笨象會有著數，升評級去到「掃貨」，「他屐」升到６﹒３５鎊，大約
７６﹒８８港紙左右，結果埋單踢高１巴仙，報７０﹒８銀。
　　祖國移動（００９４１）都無失威，上個月４Ｇ上客量持續加快至１９３３萬戶左右，結果
亦衝前近１巴仙，收報９８﹒２銀。

＊金價急插水創五年新低，金股碌得傷金舖微後退＊

　　希債暫時雨過天青，祖國魚缸又有番起色，避險情緒自然降低，美元兌日圓亦都升番去
１２４水平，有避險作用嘅黃金當然被拋售。最緊要係，花旗國加息預期升溫，噚晚金價一度跌
至５年低位，約１１３０美金左右，今日更跌至１０８６美元，金礦股首當其衝向下碌，招金
（０１８１８）率先唔見逾４巴仙；紫金（０２８９９）（滬：６０１８９９）跌得仲多，唔見
逾６巴仙收２﹒２３銀，失守十天線（２﹒２６２銀），但Ａ仔價跌唔夠１巴仙。金礦股外，連
金飾店都受牽連，旅遊業不景氣，金價跌可能都唔多吸引到祖國「大媽」掃金，周大福
（０１９２９）同六福（００５９０）亦唔見１至２巴仙。　　　　
　　另一邊廂，銀泰商業（０１８３３）控股股東沈國軍以前收市價每股９﹒１２銀轉讓近４億
股，之後唔再做公司話事人掃啦，結果今日曾經踢高１３巴仙，可惜之後無力，最終得５巴仙落
袋收９﹒５４銀。

＊高調抗空軍天然氣反彈，超智能波動大上復大落＊

　　中國天然氣（００９３１）同「空軍」Ｇｌａｕｃｕｓ對決勝負難料。公司主帥簡志堅急急
接召開記者會叫陣，炮轟Ｇｌａｕｃｕｓ一Ｄ都唔了解公司，更一度笑稱如果公司跌到５８仙會
提全購。主帥滿懷信心，股價踢高逾８巴仙，報１﹒３１銀。
　　超智能（０８３５５）走勢的確非凡人所能理解。今年５月以每股０﹒３９銀配售上市，最
高試過見６﹒７銀，升幅達１６倍咁多。但股價近排倒水咁倒，雖然今日臨尾倒升兩成，收市報
０﹒８４銀，但四日內已累計蒸發咗逾８４巴仙，仍然相當「驚」人。
　　藍鼎國際（００５８２）早前「十合一」後「一供十」。供股結果得６３﹒６２巴仙認購，
似乎股東們覺得單「刁」唔夠吸引，難怪要碌低１７巴仙，報０﹒３６５銀。

＊萬保剛爆升亨亞亦唔曳，展覽見大手股價旋炒漲＊

　　另一邊升幅榜就開心得多，萬保剛（０１２１３）食完個下晝飯就爆升七成，仲創上市新高
！認真犀利，雖然公司發不明升因，但如果以最高位３﹒８５銀計，比起前收市價１﹒８２銀，
足足有成１倍升幅。最後收市都升６５巴仙，收報３銀，成為今日魚缸升幅王！
　　亨亞（００４２８）打算溢價成倍咁滯配售換股債，如果兌換淨籌９６９５萬銀，股價今日
一開波即刻急漲，全日總共飛起兩成五，收報７﹒２５銀。
　　搞展覽嘅Ｍｅｇａｅｘｐｏ（０１３６０）今日下晝就錄得一手共２１００萬股嘅交叉盤大
手交易，每股造４﹒５銀，涉資９４５０萬銀。呢單大手交易出現之後，股價就瞬間飛升，全日
踢起兩成五，報６﹒２銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。