《小傳日記》魚缸腳軟升轉跌，形勢轉差心都怯！

　　《小傳日記》今日（２３日）缸外又再下起毛毛細雨，全日都天陰陰，灰暗暗，搞到博客心
情都麻麻地。再望望缸內世界，個心仲加一沉，明明今朝都仲高開百幾點，點知匯豐祖國ＰＭＩ
數據預估一出，就算扭轉跌勢，但上唔番５０盛衰分界線，一樣令缸友失望。於是乎，大隻佬指
數就即刻腳仔軟，收市調頭唔見２２１點或１巴仙，報２２５０９，差唔多係全日最低位，仲連
百天線（約２２６３４）都失守埋，成交就明顯多番，有５７１億銀。
　　國貨指數撐咗咁耐，終於頂唔順要收低於一萬大關，碌低１２５點或１﹒２巴仙，收市報
９９０５，傷得比大隻佬重啲啲，果然大關一失，即兵敗如山倒。

＊國貨佬淪陷缸友腳都震，錢莊遭唱淡前景甚艱難＊

　　４０隻國貨佬入面，高達３８隻都企唔穩，單計工行（０１３９８）、建行（００９３９）
、中行（０３９８８）齊齊向下碌低約１巴仙，都搞到國貨佬唔見４５點。原來瑞信出報告，話
估計香江上市嘅祖國錢莊，今年首季盈利只得逾９巴仙增長，連雙位數都保唔住。另一方面，會
計師事務所羅兵咸又踩錢莊資產質素好明顯差咗，搞到缸友都唔想再揸貨。
　　重農行（０３６１８）就真係「一日天堂，一日地獄」，噚日（２２日）收市前，因為阿爺
突然調低農商行存準率，於是完場前彈一彈高。不過今日就嘔凸番出嚟，向下碌低近３巴仙收
３﹒３７銀，又逼近５０天線（３﹒３３銀）支持位。

＊中海外捱沽最曳藍籌股，中移季績差粉絲有排煩＊
　　
　　大隻佬呢邊都傷得唔輕，５０隻藍籌入面，４１隻都受咗傷，最曳表現係由中海外
（００６８８）奪得，雖然公司首季經營溢利增加２６巴仙，但睇清楚啲，首季累計完成合約銷
售額其實係跌超過１２巴仙。再加上，有祖國傳媒報道，話成都掀起劈價潮，就連萬科都準備減
價。中海外身為香江上市龍頭，就自然做咗捱沽目標，全日唔見３﹒５巴仙收１９﹒３４銀。中
海外宏洋（０００８１）同龍湖（００９６０）各大跌６巴仙及４巴仙。
　　另外，電訊業大哥祖國移動（００９４１）噚日收市後派首季成績表，缸友滿心以為踏入
４Ｇ年代同第一次引入ｉＰｈｏｎｅ之後，成績就有番啲希望，點知盈利倒退逾９巴仙至２５２
億人仔，差過預期。今朝開市已經跌咗落嚟，之後巴克萊再叫沽貨，話６０銀見，搞到一度穿咗
７０關，散場要跌近３巴仙僅僅收復番７０銀關。再加埋友邦（０１２９９）成支大陰燭跌穿十
天線，同埋大象（００００５），三大重磅股合共推低大隻佬９２點。
　　
＊傳聞滿天飛ＱＱ有士氣，雙馬股落鑊炒友不寂寞＊

　　其實股王ＱＱ（００７００）都盡咗好大努力，逆市升近１巴仙收５２９銀。ＱＱ唔使跟市
跌，全靠多方路邊社消息撐住，市傳前海地想預埋ＱＱ一齊玩，定下嘅競標條件都好似為ＱＱ度
身訂做咁，另一方面首批祖國新券商牌又可能有ＱＱ同阿里巴巴份，總之就係百足咁多爪，高佬
都繼續睇好７００銀在望！軟件股都沾一沾ＱＱ嘅強勢，擎天（０１２９７）炒高逾９巴仙，就
連ＱＱ相關股，華南城（０１６６８）都可以逆市彈高３巴仙。
　　阿里股就仲巴之閉，文化中國（０１０６０）同中信２１（００２４１）唞咗一排之後，又
再齊齊落鑊，前者逾９億銀成交，股價爆升２４巴仙，收１﹒６２銀，氣勢一時無兩，後者就成
交就少好多，只得近２億銀，不過都有１０巴仙進帳，絕對唔失禮架。
　　
＊里昂出報告力撐濠賭股，季績有憧憬入市等抽升＊
　　
　　仲有濠賭股獲得里昂唱好，喺全城都驚阿爺打黑，少咗人過大海博殺之際，里昂竟然大膽估
計，到２０１８年博彩收入可以翻一番，升到去９００億美金！再加上，金沙（０１９２８）同
美高梅（０２２８２）阿媽都就快派首季成績表，缸友睇好金沙成績省鏡，入貨支持升逾２巴仙
，不過美高梅尾市就打回原形，全日無升跌收３０銀。
　　而銀娛（０００２７）同永利澳門（０１１２８）都分別各１﹒５巴仙及逾３巴仙，表現都
相當唔錯，睇嚟濠賭股終於唞夠，準備再展反彈之旅。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。