《小傳日記》外圍齊瘋狂，香江叨叨光；重奪牛熊線，ＱＱ再稱王！

　　《小傳日記》噚日（２１日）未踏正六點鐘，已經準備好昅實首次「佔中」對話；只可惜歷
時兩個鐘嘅會面，一如預期無驚喜，「佔中」仍然未解決。
　　缸內世界就精彩得多，歐洲央行突然出招，話考慮買公司債，歐洲魚缸即刻抽高近２巴仙慶
祝一番，仲帶旺埋花旗嗰邊飆升二百幾點添。今朝東瀛國都唔執輸，急急腳爆升近４００點！
　　外圍開派對，香江今朝（２２日）一開波就袋住二百幾點先，之後仲無受Ａ仔場影響，繼續
衝高約３７２點。最後喺股王ＱＱ（００７００）力撐下，大隻佬埋單就有３１５點進帳，收
２３４０３，一口氣將十天、廿天同牛熊線一次過袋埋。勁！
　　個市咁有氣勢，成交都即時多番ＤＤ，多咗逾１７巴仙有６１５億銀左右。
　
＊外圍開派對Ａ仔獨憔悴，阿爺開香檳雲端飲個醉＊
　
　　阿爺愈來愈追得上世界潮流，由阿爺同一眾友好一齊推動嗁兩項雲計算國際標準正式發布，
意味住雲計算國際標準化工作又進入新階段。消息一出，軟件佬就齊齊被踢高，金蝶國際
（００２６８）拍翼飛出谷底，今日漲逾７巴仙，報２﹒４７銀，一口氣破晒十天、廿天線，差
少少連五十天線都衝破埋，轉勢有望。細細粒嘅高陽科技（００８１８）叨光飆近１３巴仙，而
擎天軟件（０１２９７）亦都追落後，反彈咗逾４巴仙。
　　大佬金山軟件（０３８８８）都好犀利，以佢咁龐大嘅身軀，都急升逾５巴仙收１９﹒０６
銀，又係升破咗幾條平均線，睇嚟大佬都準備開車喇。
　　講完軟件股，就不得不提股王ＱＱ啦！今日股價已經升逾３巴仙，收高於廿天線報
１１９﹒３銀，榮登大隻佬升幅第一名嘅寶座！

＊２４１改名借勢炒番轉，瑞信薦內銀交行不怕酸＊

　　ＱＱ嘅死對頭阿里巴巴雖然已經登陸花旗國，不過「馬仔」之一嘅中信２１（００２４１）
都無丟阿里架。噚日收市後就發通告，提一提缸友，今個星期五（２４日）就會正式改名做「阿
里健康」。今回溫馨提示，亦即刻提醒炒友衝入去，開市無耐就爆咗上去，之後愈炒愈熱，連５
蚊大關都升破埋。散場時，就以約２﹒４億銀爆升近２９巴仙收４﹒９９銀，一支大陽燭升越十
天及廿天線，鑊氣十足！
　　另一邊廂，祖國錢莊獲得瑞信點名唱好，仲一次過向十間錢莊給予「優於大市」評級，四大
國有錢莊當然榜上有名，埋單升幅介乎１至２巴仙，雖然只得交行（０３３２８）被降級至「中
性」，但股價夠晒硬淨，完場有近２巴仙進帳，一啲都無失威。

＊波羅的破千船仔即起錨，你追我又趕太航真靚爆＊

　　至於靜咗好耐嘅船仔股，今日就齊齊揚帆出海。皆因波羅的海指數噚晚急升１２個巴仙，重
上一千點大關收１０９０點。畀巴克萊升評級至「增持」嘅太航（０２３４３）就做領航員，全
日彈高近１２巴仙收３﹒９４銀，成交有１﹒６億銀。街坊中海發展（０１１３８）都唔錯，有
逾６巴仙進帳收４﹒８５銀。睇番公仔圖，股價由９月中５﹒８銀左右碌吓碌吓得番約４﹒５銀
，起碼無咗兩成水位，今日裂口高開一下升破十天同廿天線，夠晒氣勢！嚟緊下周三（２９日）
仲派埋成績表，話唔定有機會上番５０天線（５﹒３銀左右）添！
　　下星期四（３０日）就輪到中遠洋（０１９１９）放榜，今日呢隻船仔都行得好快，一開場
彈高上天，仲見到十字星高高掛，又有成交配合，相當好兆頭。全日升６巴仙至３﹒３７銀，有
望挑戰上月高位３﹒６銀。

＊中移逆市跌無謂搵理由，壹照明微電今天大低收＊

　　魚缸表現夠晒靚仔，總結全日賽果，共有８６７隻股份向上衝，十分「合皮」，但有４７３
隻股份就頭耷耷，當中祖國移動（００９４１）都係其中一份子，逆市唔見０﹒２巴仙收９１銀
。不過以數跌得最轟烈嘅，就係半新丁壹照明（０８２２２）是也。噚日已經跌得好勁，仲話係
噩夢開始，點知今日都未醒，再急瀉近２１巴仙收１﹒２２銀，創埋１﹒１９銀上市新低。阿Ｑ
精神咁諗，當初壹照明以０﹒５銀配售上市，以收市價計，其實都仲有１﹒４倍升幅呀！
　　緊貼排第二嘅中國微電子（００１３９），自從宣布唔再收購電訊公司之後，股價就一蹶不
振，今日就再重挫逾兩成收０﹒３３５銀，短短四個交易日，就蒸發咗６２巴仙；慘！請請！　
　

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類；或形式
　　　　　　　之申述或訂立任何建議及推薦，讀者務請運用個人獨立思考能力自行作出投資決
　　　　　　　定，如因相關建議招致損失，概與《經濟通》、編者及作者無涉。