《小傳日記》Ａ仔今年高，香江卻糟糕；中移逼紅底，有貨最風騷！

　　《小傳日記》噚晚（１日）花旗國假期休市一日，香江缸友就梗係睇實Ａ仔場喇。今日阿爺
抽水１８０億人仔，但Ａ仔都照樣向上衝，仲以為香江都可以跟住升；點知祖國錢莊唔生性，夾
埋大象（００００５）一齊拖低大市，搞到大隻佬指數低開５０幾點之後，就一度急跌１７５點
，低見２４５７６，嚇到好友準備執包袱走人。
　　勢估唔到，Ａ仔場食完午飯返嚟，突然叉足電咁再踢上，高見２２６７，創埋今年新高添！
大隻佬就當然唔執輸，食住個勢抽升番最多６４點，不過力度唔夠，最終埋單都要碌低３點收
２４７４９，仍然收低於２０天線。其實有睇圖嘅缸友都應該發現到，大隻佬ＲＳＩ已經出現
「頂背馳」，反映上升動力不足夠，各位真係要小心呀！

＊收低廿天線魚缸有點危，內銀不爭氣粉絲心閉翳＊

　　講到升唔起，昔日強勢嘅祖國錢莊就真係眼淚在心裏流啦…先係業績無驚喜，缸友都已經好
失望，再加埋又有傳聞話，祖國上個月新增貸款可能差過孖屐預期，最多只得７千億人仔。不利
消息一浪接一浪，祖國錢莊想升都難。今日（２日）建行（００９３９）、工行（０１３９８）
兼農行（０１２８８）都繼續向下碌低近１巴仙；中行（０３９８８）算硬淨，無升跌收場。
　　香江呢邊嘅大象都一樣無運行，話說米字國基金突然宣布，話驚咗大象繼續因為ＬＩＢＯＲ
同外匯交易市場操作嘅問題而被罰巨額，咁就會損害派息能力，於是把心一橫，盡沽價值逾８億
銀大象股票。大象今日就跌一跌穿十天線，低見８２﹒８５銀；不過完場都爬番上嚟，收報
８３﹒２銀，總算執番身彩。　　
　　
＊英基金盡沽大象僅輕傷，唉瘋６旺場中移價更漲＊

　　祖國移動（００９４１）今日非常威水，下半場一開市就大發神威，仲以全日最高位收市報
９８銀，距離「紅底股」仲有兩蚊，百元大關就在眼前，勁！唔知係咪因為祖國移動北京官網，
偷步預售ｉＰｈｏｎｅ６，預約人數話咁快就突破逾萬名有關呢？！
　　兩位街坊升得仲勁，有祖國傳媒報道，話聯通（００７６２）今個月１９號就會賣大芒
ｉＰｈｏｎｅ６，即係果迷等到頸都長嘅５﹒５吋芒，６４Ｇ版售價高達７６８８銀人仔，即係
差唔多成萬銀港紙呀！機都未賣，聯通股價已經炒咗上去，差唔多以全日最高位收市，報
１４﹒１４銀抽高逾４巴仙，係最威水大隻佬。中電信（００７２８）都曾高見５﹒０２銀，創
逾六年新高。

＊Ａ仔ＥＴＦ拍住向上衝，保保乏表現財險最威風＊

　　見到Ａ仔場升得咁開心，Ａ５０中國（０２８２３）、南方Ａ５０（０２８２２）呢對「孖
寶」就當然跟住一齊開Ｐａｒｔｙ啦，分別倒升近２巴仙及逾１巴仙，各收９﹒３９銀及
９﹒５６銀，成交都急增至約１６億銀左右。
　　同Ａ仔場息息相關嘅祖國保險股就無咩鑊氣，國壽（０２６２８）同平保（０２３１８）只
係彈高ＤＤ，無咩好表現。反而，財險（０２３２８）就繼續遠遠拋離成班街坊，曾經升到去
１３﹒５銀創超過７年新高，收市時仍然都無失威，有３巴仙進帳，收１３﹒４６銀。
　　仲有啱啱改名做中信股份（００２６７）嘅中信泰富，雖然畀花旗上調目標價約１倍至
１２﹒５銀，但就仍然維持「沽售」評級。咁啱得咁橋，今日股價就最多衝高約２﹒５巴仙，但
點知收市前十分鐘就真係被人沽番落嚟，最終只係微升０﹒３巴仙收１５銀，成交飆升至約２９
億銀，係最多人玩股份。　　

＊２６７改名花旗唔畀面？股仔過山車扣好安全帶＊

　　唔單止個市變得快，噚日勁風光嘅中國創新支付（０８０８３）今日唔單止打回原型，仲要
嘔凸出嚟，埋單急瀉逾近１４巴仙收０﹒８３銀，交投一樣咁熱鬧，有成３﹒７億銀。睇番究竟
有咩消息搞到跌得咁激？原來公司噚晚宣布，磋商收購祖國電子支付服務公司股權。本來公司肯
大展拳腳係好事，但係春江鴨入市嘅缸友，就可能表錯情，一心以為又會同ＱＱ（００７００）
扯上關係，依家大失所望就掟貨走人吧。
　　中國包裝（００５７２）完場前都坐咗過山車，喺大約３點幾左右，無啦啦向下急插最多近
５６巴仙至０﹒０５２銀，缸友嚇到眼都凸埋。雖然之後收復番一半失地，但都要跌近１２巴仙
報０﹒１０３銀，成交急增至１﹒６億左右。
　　仲有今朝跌咗５巴仙停寶嘅天合化工（０１６１９），原來畀沽空機構匿名分析狙擊，話公
司財務造假，仲比咗個「零」蚊目標價。天合化工就話好快會出嚟回應，缸友坐定定聽解釋啦。
請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。