《小傳日記》中港魚缸齊爆升，有貨缸友笑不停！

　　《小傳日記》香江魚缸嘅適應力實在太強！噚日（２７日）先話驚「滬港通」隨時煞車，今
日（２８日）就已經忘記得一乾二淨，跟住Ａ仔場「嘭嘭聲」衝高最多４２７點至２３５７０，
距離今個月最高位２３５８１只係差十點左右，後勁凌厲！
　　話說今日祖國魚缸炒自貿區概念，加鐵路、核電政策，一眾受惠股即刻升晒上太空。Ａ仔場
開晒Ｐａｒｔｙ，就算阿爺抽走２００億人仔都無問題，全日踢高２巴仙收２３３７，輕易收復
番二千三大關，強！
　　Ａ仔場咁旺，香江都叨到光，差唔多以全日最高位收市，有３７７點進帳收２３５２０，國
貨佬就踢高２３７點收１０５４８。全日成交比早幾日明顯多番，有６７７億銀左右。希望唔係
星期四（３０日）結算日前嘅陷阱吧…

＊兩車一家親今次真唔真？阿爺再力撐鐵路股翻生＊

　　講番今日班威水股先，自噚日南車（０１７６６）、北車（０６１９９）、南車時代
（０３８９８）齊齊停賽，孖屐嘅幻想空間就大到不得了，但咁多傳聞中，就以阿爺將兩車拉埋
天窗，成為一家人嘅風聲最大。話口未完，午後又傳出，南北兩車已經確認合併，仲將會喺周末
公布詳情。而家行業整合，行內嘅競爭自然減少，所以祖國鐵建（０１１８６）、中鐵
（００３９０）率先彈出，兩股午後發力，各飆高７﹒６巴仙及６﹒７巴仙，各收８﹒１１銀及
４﹒６３銀。
　　另一方面，國務院總理李克強又再開金口，除咗加快引進民資嘅鐵路項目，鼓勵孖屐參與港
口、內河航運等設施外，又再向捷克總統推介高鐵項目，總之範範都想有大搞作。魚缸內嘅新幹
線建築股好重鑊氣，略沾旺氣嘅廣深鐵路（００５２５）、中交建（０１８００）就行得慢啲，
但都升咗３巴仙及逾２巴仙。

＊百麗派特息股價更出息，中電信績佳粉絲好鬼ＨＩＧＨ＊

　　除咗有阿爺寵幸之外，公司份成績表都好緊要。呢期都係季績放榜高峰期，公司季績如連珠
爆發，但估唔到積弱多時嘅百麗（０１８８０）就有意外驚喜。本嚟佢中期多賺８巴仙，只算不
過不失，但估唔到突然派特別息，氹到缸友鬼死咁開心，紛紛搶貨，再加埋吹水佬大讚，最終全
日抽升近一成收９﹒３２銀，最威藍戰士當之無愧。
　　此外，國藥（０１０９９）亦勁到不得了，公布首３季多賺２５巴仙後，股價一支箭咁炒上
突破３０蚊，創４年高位，埋單收報３０﹒０５銀，升逾６巴仙。中電信（００７２８）都無失
威，首九個月多賺近一成，而且９月份３Ｇ上客量亦係今年內最勁，刺激股價完場飛升近６巴仙
收市報
４﹒９１銀。

＊放榜高峰期錢莊好「哈皮」，內險唔執輸績前慶祝先＊
　　
　　嚟緊仲有唔少大公司排隊放榜，靜咗好耐嘅祖國錢莊入面，之前建行（００９３９）已經揭
盅，雖然唔算太省鏡，但係德銀今日就唱好目標７﹒４５銀。有大行護航，建行當堂生猛番晒，
踢高２﹒５巴仙收５﹒６９銀。
　　其他街坊工行（０１３９８）、交行（０３３２８）、招行（０３９６８）、信行
（００９９８）就聽日（２９日）放榜，今日就齊齊跟市踢高１至３巴仙，不知幾咁「哈皮」！
至於中行（０３９８８）、農行（０１２８８）、民行（０１９８８）就跟隊，喺星期四派成績
，都一於唔執輸，阿哥之一嘅中行仲升得最勁，袋咗近３巴仙添收３﹒６８銀。
　　「燕疏」一族都有唔錯收穫，平保（０２３１８）、國壽（０２６２８）收市後派成績，埋
單都有逾３巴仙及２﹒５巴仙落袋，各收６０﹒９５銀及２２﹒３５銀，唔通預先慶祝？！

＊季績唔省鏡渣打跌到驚，細股升唔停鑊氣好鬼勁＊

　　雖然不少股價鯉魚翻身，但亦有股份跌鑊甘，就好似渣打（０２８８８）公布首三季稅前油
水跌近兩成後，股價就跌到「頭耷耷，眼濕濕」。話說中場休息嗰陣，渣打公布中期報告，成績
唔掂之外，仲話預計下半年盈利會下跌。既然管理層都坦白承認，粉絲都無謂再死守等反彈吧！
結果下半場渣打就「瀡滑梯」或跌咗５﹒５巴仙收１３１﹒３銀。　
　　講完咁多大隻股，又係時候睇吓禾雀飛升點。望一望頭５０大升幅榜，頭３０名股份，升得
最少嘅都有一成進帳，最多嘅就由粵首環保（０１１９１）奪得，全日飆升三成收０﹒２８５銀
。今均真係大細股都咁有得升！請請！　　

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。