《小傳日記》阿爺開水喉，魚缸卻掉頭；國貨頭耷耷，賭仔高高收！

　　《小傳日記》不知不覺，香江魚缸已經連升五日，今日（２７日）開市之後，一度想試衝二
萬五大關，只可惜升到去２４９９５點就掉頭而回，好友未能「屠熊」先被屠，士氣大挫之下，
曾經向下碌低近２４０點，被攻陷２４７００水平，慘！
　　其實阿爺今日已經出手呵護，向孖屐放水６００億銀人仔，等大家有多Ｄ銀彈過新年。不過
Ａ仔場竟然無反應，仲收跌近１巴仙報３３５２點。國指當堂無晒癮，散場跌１９７點或１﹒６
巴仙，收１２０３０；而大隻佬就喺大象（００００５）、友邦（０１２９９）、銀娛
（０００２７）、金沙（０１９２８）手拖手發功下，總算收復番逾半失地，埋單只跌１０２點
報２４８０７。
　　大市臨尾有番Ｄ力，缸友又放膽衝返入去，全日成交增逾１２巴仙至９４０億銀左右。

＊未演屠熊記好友先被屠，ＱＱ中移動今天齊回吐＊

　　香江魚缸未能延續六連升佳績，另一邊廂，股王ＱＱ（００７００）都唔能夠成功創下「七
連升」，可惜！今朝ＱＱ一開市彈高到１３８銀歷史新高之後，獲利回吐盤就起勢湧晒出嚟，下
半場仲曾經得１３３銀。不過ＱＱ見慣風浪，好快就站穩住腳，最終只跌近１巴仙收１３５﹒８
銀。
　　另一重磅藍戰士祖國移動（００９４１）都差唔多同一命運，之前升到去１０５﹒１銀高位
之後，就開始高處不勝寒，收報１０２﹒３銀；要守住得住紅底寶座，十天線（約１００﹒３６
銀）絕不能失！
　　溫馨提示，小傳留意到收市前幾分鐘，呢兩大藍戰士成交明顯急增，而且仲跌少咗好多，唔
通好友部署反擊戰？！

＊賭仔似否極花旗畀個讚，大隻型英帥細粒急急彈＊

　　頭先提過兩大藍戰士賭股表現都好強勁，帶挈晒一、二線街坊開Ｐａｒｔｙ！雖然今日有巴
克萊同大和兩間大行出嚟唱淡，但缸友睇到已經麻木晒，反而見到花旗出報告改口風，話今個月
嘅賭收可能無預期中咁差，此言一出，缸友決定跟好不跟壞，一於低位掃貨博反彈！
　　銀娛（０００２７）踢高６﹒５巴仙，收報４３﹒５５銀，連升五日，喺升幅最勁嘅藍戰士
。金沙（０１９２８）雖然相對失色咗少少，但都有３巴仙進帳收報４０﹒１５銀。街坊之中以
永利澳門（０１１２８）升得最勁，急升８﹒４巴仙收報２１﹒９銀，其他都有５至６巴仙進帳
。
　　仲帶挈一眾二線賭仔急起直追，沉淪咗好耐嘅海王（０００７０）同澳門勵駿
（０１６８０）表現一鳴驚人，分別炒高２６巴仙及２５巴仙，兩隻股今日都出咗支大陽燭，睇
嚟短線仲有力爆上去喎。　　　　

＊半新股好景輪流來炒上，大起大跌間扣好安全帶＊

　　半新股呢排真係好好命，齊齊排住隊創上新高。先睇有大成交配合嘅日成（０３７０８），
呢排幾直係如日中天，股價又再炒高１４巴仙，報１﹒８４銀，六日以嚟已經連爆咗約２倍！如
果當日抽中嘅友仲未賣，就真係發達囉！至於其他半新股都十分好景，隻迪臣建設
（０８２６８）噚日（２６日）因為發盈警而微跌，但誰不知今日竟然嚟個大爆發，一度飆高三
成幾，最後雖然回返ＤＤ，但都抽升近２８巴仙，報０﹒１０２銀。
　　新龍移動（０１３６２）都拋高逾１６巴仙，報１﹒３６銀。街坊泰加保險（０６１６１）
今日破頂見３﹒９７銀，四日累積飛升最多近１倍後，今日埋單都袋番逾４巴仙收報３﹒７３銀
，總算無驚無險頂得住。震昇工程（０２２７７）就弱啲，一度試圖發力衝破１蚊關，但原來係
虛張聲勢，好快就碌返落嚟，全日只係踢高近４巴仙，報０﹒８７銀。

＊趙薇忽入股阿里影業漲，偉俊兩兄弟你高我更高＊

　　其實公司發盈警都唔使驚，只要有個靚藝人拍住上，股價一樣可以照踢上。阿里影業
（０１０６０）就係好例子喇，公司發盈警，話２０１４年全年由盈轉虧蝕最多６億，不過同時
因為趙薇同丈夫黃有龍，斥資近３１億銀買入９巴仙公司股權，成公司第二大股東，令到股價即
刻「堅過石堅」！今朝一度抽高過逾一成，雖然最終只踢高５巴仙收１﹒６５銀，但發盈警都唔
使跌，就已經好好彩喇。
　　今日有對兄弟復賽表現就真係嚇死人，講緊嘅咪係偉俊集團（０１０１３）同偉俊礦業
（００６６０）兩兄弟囉。前者就話商討投資互聯網技術商，後者就諗住買能源業務，兩者盤中
試過爆升８８巴仙同１﹒５倍，勁！雖然升勢唔能夠持續，但偉俊集團最終喺逆市都有三成進帳
，偉俊礦業就有近６６巴仙漲幅，各收報０﹒０６５銀和０﹒１７９銀，已好叻仔啦！請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。