《小傳日記》連跌五天存暗湧，股仔亂飛多人擁！

　　《小傳日記》缸外「地溝油」風波愈演愈大，依家寶島嗰邊又調番轉頭，話由即日（１１日
）起禁止香江豬油入口，事件主角嘅強冠仲話要向香江金寶運公司索償添。家陣搞到人心惶惶，
真係唔知可以食咩至安全。
　　缸內都開始靜靜起暗湧，噚日（１０日）小傳已經提醒大家，「死亡交叉」已經出現咗。雖
然今朝魚缸開市無耐，就因為祖國ＣＰＩ增幅低過預期，孖屐又憧憬阿爺會出手救市，所以倒升
番最多１１５點，但係好快就打回原形碌番落去。恆指收市唔見４２點報２４６６２，差少少就
跌穿月初嘅２４５７６支持位。國貨佬就跌得多過大隻佬，完場無咗８４點收１１０３２。全日
成交唔太曳，都有７０９億銀左右。
　　再睇清楚公仔圖，魚缸已經喺不知不覺間連跌五日，「三頂背馳」亦早已殺埋身，如果連支
持位都穿埋，就隨時下試５０天線（約２４１７３）架啦！

＊三護法發力撐起半邊天，主席趁高沽聯想變重傷＊

　　今日三大重磅股，排名不分先後，包括祖國移動（００９４１）、大象（００００５）及友
邦（０１２９９）都盡力撐住，「三大護法」完場升咗大約０﹒５至約１巴仙左右，共貢獻咗
５４點。
　　不過聯想（００９９２）就無咁好彩啦，以近７億銀成交急跌逾４巴仙收１１﹒８８銀，做
咗全日最差大隻佬。本來聯想近排走勢都幾穩陣，仲升到去逾１４年新高，點知主席楊元慶上星
期趁高位沽貨袋咗２億銀走人，難怪今日表現咁差啦。
　　相反，一直身體力行支持恆地（０００１２）嘅四叔，近排喺多次增持下，恆地股價又升到
去５６﹒１銀，離上市新高６０﹒１３銀不遠啦！
　　　　　　
＊四叔來錫錫恆地逼新高，醫藥與光伏齊齊高高高＊

　　雖然個市無咩力，但有兩大類股份今日逆市抽上。呢排強勢嘅藥股總係逆流而上，跌市先特
別大升，四環（００４６０）自從噚日高血壓藥獲批試驗，股價就冇一路升無停過，加埋今日被
德銀升埋目標價，成功創埋上市新高見６﹒２３銀，最終收報６﹒０９銀，強。街坊國藥
（０１０９９）今日都一樣咁勁抽，股價升逾３巴仙，報２９﹒２銀，創逾３年半新高。
　　至於早前成日上榜嘅光伏股，熱力一樣夠猛！信義光能（００９６８）噚日被摩通上調目標
價到３﹒８銀，繼續維持增持評級後，今日股價就爆高咗上嚟，急飛近８巴仙，收報２﹒６７銀
。其他太陽能股一樣好鬼勁，龍頭協鑫（０３８００）繼續企過於３蚊樓上，全日逆市漲逾１巴
仙，報３﹒０４銀。細粒啲嘅漢能（００５６６）都升近２巴仙，報１﹒３１銀。

＊炒股不炒市細價股抬頭，中播來落鑊嘭嘭升一倍＊

　　雖然魚缸食完午飯返來後，又再次腳仔軟，但有啲股就愈升愈有；好似今日復牌嘅中播
（００４７１），公司話簽咗份備忘錄想買衛星使用權，未成事嗰價已經升到「嘭嘭聲」。開市
冇耐已經升超過廿幾巴仙，之後各方炒友跟風掃貨，臨收市仲飆高足足１倍添。不過又有啲股冇
利好消息都可照爆升，森信紙業（００７３１）午後突爆升成３７巴仙收報０﹒６１元，升幅僅
次於中播排第二。
　　細價股一向都零舍易落鑊，好似萬威（００１６７）個大老細諗住出售公司股份，家陣只不
過討論緊，但係今日個價已經曾經有兩成進帳，創逾６年半高位，有貨嘅缸友仲唔把握機會割禾
青？！仲有呢排升到唔識停嘅中國天然氣（００９３１），就同內蒙古鄂爾多斯市訂咗天然氣框
架協議，睇嚟又多條水路，抵佢又升多逾２３巴仙。

＊老細洽售股萬威續抽上，盛明與標準高位回得急＊

　　不過，細價股一向升得快，跌得快，高誠資本（０８０８８）今朝宣布用７５００幾萬入主
手遊應用程式。本以為同「手遊」拉上關係都可以炒番轉，點知一開市彈一彈到２﹒０３銀高位
之後，就「笨豬跳」咁插低近１３巴仙，收１﹒６銀。
　　仲有仙股代表中國管業（００３８０），呢個月無啦啦炒咗上去，公司噚日已經發咗不明聲
明，話唔知點解升得咁勁。今朝一開市就率先升到去０﹒０７２銀逾三年新高，就即刻跌番逾一
成落嚟收０﹒０６２銀。仲有盛明國際（００２３１）同標準資源（０００９１）都由高位跌番
落去，齊齊碌低一成及７巴仙。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。