《小傳日記》息魔未殺到，魚缸即衝高；ＱＱ同中移，績後天與地！

　　《小傳日記》美聯儲局議息終於有結果，一如預期，當局真係刪除咗「耐性」一詞，但係就
將今年底利息預測減半，由１﹒１２５厘降至０﹒６２５厘，孖屐即刻推測「息魔」最快９月或
者１０月先殺到，道指噚晚（１８日）立即爆升二百幾點，收高於萬八大關！
　　老老實實，基本上香江缸友都預咗呢個結果，所以今日（１９日）一班香江磚頭都唔算太興
奮，但大市都強勢抽高３４８點或１﹒４巴仙，收２４４６８，輕易衝破５０天（２３４９２）
及２０天線（約２４３５７），都係全靠股王ＱＱ（００７００）同重磅股大象（００００５）
及友邦（０１２９９）聯手托起，分別貢獻１５２點、３０點及５２點，佔咗大市近七成升幅，
勁！
　　另一邊廂，Ａ場呢排升得太多，今日升勢放緩，唞一唞氣都好正常，中資股無咩出色表現下
，國貨指都跟大市彈高１４０點或１﹒２巴仙，收１２１２２。全日主板成交就當然不得了，有
１０２６億銀，千億成交配合大升市，仲補番３月初裂口，睇嚟下一關有望二萬五見。
　　
＊ＱＱ玩破頂升到你唔信，中移跌３蚊紅底股險失＊

　　今日孖屐焦點，相信ＱＱ敢認第二，都無人敢認第一。本來缸友都擔心ＱＱ份業績無咩驚喜
，唔知Ｄ大行會點睇。估唔到今日排住隊唱好，話廣告收入、手機遊戲都開始有增長，唔單止升
盈利預測，當中惹旗仲將目標價升到去１６０蚊。結果ＱＱ就由頭升到尾，竟然以９０億銀超大
成交炒高近７巴仙收１４５銀，收市前就曾經去到１４５﹒３銀上市新高，一日之內市值就增加
超過８８１億，缸友睇到不禁嘩嘩聲！
　　有人歡喜有人愁，大隻佬祖國移動（００９４１）食午飯嗰陣放榜，午收之前曾經倒升至
１０６銀，缸友滿心歡喜迎接派成績嘅一刻。點知全年跌一成至１０９３億人仔，僅僅符預期，
缸友大失所望，下半場一開市就不問價沽貨，搞到連紅底股都一度無埋，得番９９﹒９銀，散場
前掹車邊收報１００﹒１銀，跌逾３巴仙或３﹒４銀，慘！

＊花旗遲加息領匯最出色，九倉吐烏氣地主齋睇戲＊

　　花旗聯儲局又向孖屐派糖，一班息口敏感股都好受落，敏華（０１９９９）破頂升近４巴仙
，造７﹒３４銀。香江地主股表現參差，升得最勁嘅竟然係舊年成績麻麻地嘅嘉里建設
（００６８３）踢高逾５巴仙，收報２５﹒４５銀。業績啱啱新鮮出爐嘅太古地產
（０１９７２）雖然少賺２４巴仙，績後股價都有近２巴仙進帳收報２３﹒９５銀。四大家族反
而無乜睇頭，只有新地（０００１６）有逾１巴仙進帳收１１７﹒３銀，新世界（０００１７）
仲腳仔軟添！
　　藍戰士領匯（００８２３）表現都唔錯，抽高逾５巴仙，升幅僅次於績後爆升嚇你一驚嘅
ＱＱ；九倉（００００４）之前嚴重超賣，１４天ＲＳＩ連２０都無，今日一吐烏氣，再反彈逾
４巴仙收５３銀。

＊大行紛撐場吉利向上揚，機會要抓緊鐵路再起行＊

　　砵砵車今日見真章，吉利（００１７５）噚日出咗張唔多靚仔嘅成績表，但成班大行都老友
鬼鬼連群結隊出嚟力撐，股價繼續沿住條上升軌扶搖直上，飆高６巴仙有多，創超過１年高位，
報３﹒８３銀。不過，有時世事就真係同人唔同命，好似華晨（０１１１４）都有瑞信出嚟升目
標價，點知股價要倒跌近３巴仙，埋單報１４﹒８２銀。
　　國務院話要抓緊中西部鐵路嘅建設，唞咗一輪氣嘅鐵路股又再ｇｏ！ｇｏ！ｇｏ！。中鐵
（００３９０）以接近全日最高位收市，有６巴仙進帳，收報６﹒６２銀；街坊中鐵建
（０１１８６）都升近５巴仙，收報１０﹒１２銀。

＊賭仔春光照衰運消失了？海通突抽水缸友心都碎＊

　　近排衰開有條路嘅賭仔似乎又未衰得晒，今日齊齊表現鯉魚翻身。永利馬交（０１１２８）
就跳得最高，有６巴仙進帳報１６﹒０８銀。銀娛（０００２７）都放咗榜，舊年就賺多咗３巴
仙左右，唔派末期息，改派特別息０﹒２８銀，缸友好似收貨喎，今日升超過３巴仙報３５﹒５
銀。街坊金沙（０１９２８）都受惠，都漲超過３巴仙收３１﹒２銀。賭仔今日表現真係好醒神
，但係咪真係行完衰運就值得再觀望一排啦！
　　呢邊廂好似轉緊運，另一邊廂就想係孖屐度抽水。海通國際（００６６５）折讓三成供股，
抽水最多９０億，但缸友梗係唔多ＢＵＹ佢呢個決定，結果埋單插低７巴仙報４﹒９１銀。你抽
我又抽，東亞（０００２３）今次就向三井住友溢價唔夠１巴仙配股籌６６億，三井正式成為單
一最大股東。不過缸友睇嚟都唔多介意，東亞收市升近１巴仙報２９﹒６５銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。