《小傳日記》好友午後突進攻，藍籌回勇好威風！

　　《小傳日記》花旗國魚缸噚晚（１４日）開Ｐａｒｔｙ，鬼咁熱鬧，皆因科技股表現省鏡，
加埋美金又轉弱，跌到去四個月低位，熱錢又流番入缸內尋寶，道指、標普都結束三日弱勢，前
者收漲１９１點，後者仲升到去２１２１點，創埋收市新高添！
　　外圍氣氛咁強，就算今日（１５日）Ａ場有Ｄ腳軟都無問題，香江魚缸一開市就彈高１７３
點，點知好友喺下晝兩點鐘左右，先正式發動更強攻勢，推高晒一大班重磅大隻佬，好似祖國移
動（００９４１）、長和（００００１）、大象（００００５）、友邦（０１２９９）。大市一
度急升６４２點直逼二萬八；雖然之後略見回順，但收市都有５３５點進帳，報２７８２２；國
貨佬就收漲２３３點報１４００９，主板成交１３７８億銀左右。

＊午後忽爆上周圍搵理由，阿爺再寬鬆深港通開通？＊

　　個市失驚無神爆咗上去，市場又周圍搵理由。有說話阿爺會好快再降準，之不過，點解Ａ仔
又唔升呢？另邊廂，孖屐即刻諗係咪炒「深港通」開車，不過生發發（００３８８）發言人接受
《經濟通通訊社》查詢嗰陣，就話今日無相關安排或消息。小傳就覺得，可能因為好友彈藥多番
，而２７７００至２７７９９係熊證重貨區，所以好友就上演一幕「屠熊記」。究竟係咩原因都
好，起碼喺「五窮月」沖一沖喜，都係一件好事！
　　大市有番Ｄ生氣，生發發當然最開心，成交急增至約５１億銀，收升５巴仙報２８９﹒６銀
，係第二巴閉藍戰士！長和、和黃（０００１３）兩父子都相當受歡迎，齊齊踢高約４巴仙，霸
佔第三及二名。友邦同祖國移動都發力收復早排嘅失地，前者報彈高４巴仙收５２﹒３５銀，重
越十天及廿天線。其實友邦早排跟大市回番落去５０蚊水平，支持力都幾強，現價入貨作中長線
投資都唔錯呀！

＊長和生發發拍住嘭嘭升，ＡＨ折讓股今天特別醒＊

　　香江磚頭表現都唔錯，普遍都有１至２巴仙落袋，而九倉（００００４）今日就開股東會，
即將退任主席嘅吳光正除咗講公司前景之外，仲大談香江政治。吳光正亦講到明公司無意重組，
而自己都唔會參選做香江「揸ＦＩＴ人」。無咩特別消息刺激下，九倉同會德豐（０００２０）
就輕輕踢高１巴仙收市。
　　頭先提過「深港通」暫時未有消息，不過一班ＡＨ折讓股都有Ｄ鑊氣，好似淅江世寶
（０１０５７）、山東墨龍（００５６８）都有４至７巴仙進帳。而香江嘅券商股都趁機會衝高
，南華金融（００６１９）飆升近１３巴仙，海通國際（００６６５）同英皇證券
（００７１７）都各彈高６巴仙及一成！

＊生意滾滾來券商有苗頭，電信齊翻身追到無氣唞＊

　　早前李克強總理話要減寬帶費用，工信部今日就話要將１Ｇ手機流量費降至５０蚊人仔以下
，三大電訊商都表態話會響應國務院號召。碰正魚缸下半場曾經急升超過６００點，幾間電訊商
都嚟個鯉魚翻身。中電信（００７２８）升得至勁，有近４巴仙進帳，收報５﹒７３銀，奪得最
巴閉國貨佬寶座。祖國移動、聯通（００７６２）都分別升３﹒６巴仙同２巴仙，收１０９銀及
１４﹒１２銀，勁！
　　魚缸無啦啦彈高咗，當然唔少得中資金融股做引擎喇！平保（０２３１８）盤中見過１１１
銀，埋單升幅收窄都有２巴仙多啲，報１１０﹒４銀。街坊財險（０２３２８）就抽高逾３巴仙
，係第二威水國貨佬。

＊股仔再埋鑊難免大上落，扣好安全帶假期更歡樂＊

　　唔少細價股乘勢異軍突起。先講吓復賽嘅華鼎（０３３９８），有第三方同控股股東洽購股
份，刺激股價全日飆高逾３１巴仙，盤中最高見過０﹒８６銀，創近４年高位，收０﹒７１銀。
另一隻復賽嘅環能（０１１０２），主席就出售四成股權畀有「殼王」之稱嘅孫粗洪，難怪股價
踢高２９巴仙，收報０﹒２２３銀。
　　不過好多時唔一定要有利好消息先炒上，今日有隻股完全無消息，但係可以踢高超過七成，
講緊嘅咪係莊勝百貨（００７５８）囉，係表現最強勁嘅個股。至於噚日（１４日）復賽嘅２１
控股（０１００３），獲馬雲通過入主瑞東（００３７６）參股，股價今日試過再抽高５４巴仙
見６﹒８銀，不過之後收晒火，埋單只得近１１巴仙收４﹒８８銀。假期愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。