按盤價 
《小傳日記》雖然經歷過多次大大小小嘅股災，但噚晚（２４日）見到花旗國魚缸一開波竟
然暴瀉千幾點，真係嚇到個心都離一離！又唔係金融風暴，又唔係科網潮爆破，點會……今次Ａ
場股災掀起嘅骨牌效應，真係不能小覷。雖然花旗國最終跌少咗，但都插低５８８點收
１５８７１，歐洲三大指數都重創約５巴仙，全球都「傷亡慘重」。
不過，香江魚缸噚日早已全軍覆沒，今日（２５日）反而嚟個絕地反彈！香江懶理Ａ場繼續
下試三千大關，開市只係碌低百幾點，旋即向上衝，之後仲最多反彈近６２０點至２１８７１。
點知Ａ場下半場宣告三千關淪陷，阿爺加大放水都無用，收２９６４點暴瀉近８巴仙；嚇到香江
一度倒插近４００點，全日高低波幅成千點。
「散」完之後，恆指又試上闖，收市都袋番１５３點報２１４０４，期指仲炒高水添；但國
指就繼續頭耷耷，跌８８點，收９５１４。大落大上復再大落大上嘅一日，全日成交１３４５億
銀。
＊Ａ仔繼續碌驚見二字頭，香江甚反覆國指續低收＊
魚缸過山車咁大上大落，唔少藍戰士都大波動，搞到缸友暈陀陀。ＱＱ（００７００）今日
就隨大市反彈，曾一度踢起８巴仙去到１３５﹒５銀，收市又回落返去到１３０﹒９銀，飛起
４﹒７巴仙，為大市貢獻９９點。
風大雨大嘅時刻，瑞信出嚟同大家推介幾隻股份，話可以聚焦一啲擁有強勁微觀經濟基礎，
並且較少受內地經濟增長影響嘅中港股票，當中包括友邦（０１２９９）同祖國移動
（００９４１），兩者飛高５巴仙同唔夠一巴仙。而下跌多日嘅生發發（００３８８）今日亦踢
高３巴仙，報１８０銀。
不過，揸大笨象（００００５）嘅缸友有無好唔開心呢？事關今日魚缸飛高咗，大笨象早段
６０蚊不失，以為必有後福，點知繼續碌低一個巴仙，收６１﹒７銀。
＊ＱＱ與邦邦靚絕眾藍籌，生發發急彈大象仍然憂＊
今朝券商氣勢如虹，中州證券（０１３７５）個仔攞到證券牌，中信証券（０６０３０）中
期賺多約２倍，純利１２４﹒７億，兩個分別試衝前近２１巴仙同一成。但跑得快，跌得快，下
晝見Ａ場三千大關終告淪陷，一班券商股即刻仆低。好在大部份兄弟尾市都能夠收復失地，中州
踢高近２巴仙，埋單３﹒６９銀，海通國際（００６６５）更加彈起６巴仙；但中信就唔見近３
巴仙，得１６﹒５８銀。
神州錢莊朝早反彈，之後一樣冇運行，建行（００９３９）及工行（０１３９８）逆市碌低
逾１巴仙，得番５﹒４６同４﹒６３銀。
ＥＴＦ就跟足神州步伐，海通滬深三百（０２８１１）插足逾７巴仙，報１２﹒９銀；華夏
滬深三百（０３１８８）亦瞓低近６巴仙，報３６﹒５銀，兩大ＥＴＦ孖寶都唔見３至４巴仙。
＊ＥＴＦ內銀繼續無運行，券商各走各油股甚閉翳＊
據報道，神州第一口深水鑽井南海完工，海工裝備又再次得到突破，不過好消息好似對油佬
無咩幫助。布蘭特原油期貨跌２﹒７７美金或６﹒１巴仙，結算價報４２﹒６９美金，盤中跌至
２００９年３月來近月合約最低價４２﹒５１美金。油佬呢幾日又會出成績，中海油
（００８８３）、中石化（００３８６）、中石油（００８５７）分別跌低２巴仙。昆侖能源
（００１３５）呢排跌到怕怕，今日終於成功踢高３巴仙，報４﹒８９銀。
Ａ仔場大插，人仔又有貶值壓力，三大中資航空Ａ股齊齊「墜機」跌到停賽，香江呢邊國航
（００７５３）、南航（０１０５５）同東航（００６７０）就分別唔見４巴仙至９巴仙。
中建材（０３３２３）宣布業績後，巴克萊叫減持。公司半年賺少５６巴仙，又唔派息，股
價今日愈落愈深，最終唔見１５巴仙，報４﹒５９銀。街坊安徽海螺（００９１４）同華潤水泥
（０１３１３）就分別唔見４巴仙同５巴仙。
＊飛機Ａ跌停Ｈ股亦慘情，長和放榜前粉絲來偷步＊
長和系今日放榜，長和（００００１）同長實（０１１１３）偷步行前２至４巴仙，報
１０２﹒３同５２﹒２銀，原來缸友又憧憬主席李超人會喺業績後增持股份。其他街坊就普遍弱
勢，新地（０００１６）仲一度得番９４﹒２銀，創逾一年新低，不過低位有人掃貨，埋單就跌
少好多，軟近２巴仙收９６﹒２銀，新世界（０００１７）同嘉華國際（００１７３）又唔見咗
超過１巴仙。
有「上海和黃」之稱嘅復星國際（００６５６）畀瑞銀唱好話「買入」，目標價微升到
１９﹒５蚊，股價自然「復升」，收穫逾８巴仙，報１２﹒３銀。
瑞聲科技（０２０１８）都畀大摩、高盛讚賞，話公司跑贏同業，最終近６億銀成交企高逾
４巴仙，報４０﹒０５銀，喺成交榜排４１名添。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
etnet榮獲HKEX Awards 2023 「最佳表現證券數據供應商」大獎► 了解詳情
