《小傳日記》不怕加息加個夠？最怕北水不南流！

　　《小傳日記》花旗聯儲局「揸ｆｉｔ人」耶倫姨姨，已經放晒風，暗示如果就業同通脹數據
繼續咁勁，今個月就可能加息。息魔愈逼愈近，花旗缸友都唔敢輕舉妄動，道指上星期五（３日
）只係象徵式微升２點收２１００５點。
　　花旗３月加息似無懸念，但缸友最怕北水斷流。香江今朝（６日）就輕輕跳起４７點，之後
大部分時間都喺２３６００水平窄幅上落，埋單升４３報２３５９６；國指就揚２６點報
１０１７１。
　　魚缸無睇頭，兩會又無好消息沖喜；喺少咗北水潤澤下，全日成交得番６２３億銀，比上星
期五少咗近１８巴仙。反而，缸外特首選舉已開始入戲肉，噚晚（５日）林鄭同胡官就展開咗第
一場辯論賽，花生指數愈升愈高喇！

＊姨姨再放鷹花旗唔多醒，特首戰直路觀戰坐定定＊

　　大隻佬指數今日正式執位，吉利（００１７５）正式染藍，但呢個好消息已經消化得七七八
八，全日跌近１巴仙，報１０﹒６４銀。不過，被踢走既利豐（００４９４）就嚟個報復式反彈
，全日升逾３巴仙，報３﹒６２銀。利豐更加係連彈兩日，加埋都有成近７巴仙進帳，表現勁過
唔少藍戰士。
　　國貨佬指數今日都有小小郁動，郵儲行（０１６５８）正式加入國貨大軍，表現都算有交功
課，全日升逾１巴仙，報４﹒８６銀。中國啤酒大佬之一的青島啤酒（００１６８）就慘被踢出
國貨行列，仲要面臨空軍壓境，走低逾３巴仙，報３５﹒３銀。
　　周黑鴨（０１４５８）今日起正式加入恆指綜合大中型股指數，表現大有睇頭，全日坐火箭
咁升左接近一成報７﹒５２銀，仲順便創埋上市以嚟既新高７﹒６７銀，仲紅過當紅炸子雞。

＊周黑鴨入指當紅炸子雞，青啤被叮叮難怪表現曳＊

　　鐵鳥股展翅高飛，劇飛（００２９３）飛得最遠，升逾４巴仙，報１１﹒８銀，係最巴閉藍
戰士。原來里昂話美國貨件空運需求復甦，夏天空運需求大，目標價由８銀升到去１１﹒７銀，
評級就由沽出升到去跑輸大市。
　　中資鐵鳥東航（００６７０）同南航（０１０５５）就唔好彩比高盛降級，主要係話三大中
資鐵鳥既國內航線運力見增長，搞到機票價格下跌；東航更加係被高盛踢出亞太區買入名單，評
級降至中性，目標由４﹒１銀降到去３﹒９銀。東航最終低飛逾１巴仙，報４﹒０９元。另外，
高盛話南航既國內航線係最多，受既影響會係最大，評級由中性降至沽售，目標價下調９巴仙至
４銀。不過南航都頂得住，飛起１巴仙收４﹒９４銀。

＊鐵鳥齊高飛劇飛最好揮，房產稅立法內房不閉翳＊

　　兩會提到會加快房地產稅立法，另外人行就強調樓唔係用嚟炒，要用嚟住，要防範風險。之
不過，內地磚頭今日表現都唔錯。萬科（０２２０２）２月銷售金額按年多咗１﹒４倍去到
３８５億人仔，全日踢高１巴仙，收報１９﹒７８銀；給你一個五星級的家嘅碧桂園
（０２００７）同埋雅居樂（０３３８３）分別跳起近３巴仙同近５巴仙。
　　兩會仲提到要鋼鐵去產能五千萬噸，鋼鐵股都好興奮，馬鋼（００３２３）衝前超過３巴仙
，收報３﹒０２銀；鞍鋼（００３４７）亦都有近２巴仙進帳，報６﹒１３銀。

＊鋼鐵去產能開心到跳起，麥記升目標ＡＳＭ真肥＊

　　砵砵車今日普遍繼續向後退，長汽（０２３３３）唔見咗２巴仙，報９﹒０３銀，係最渣國
貨佬，比亞迪（０１２１１）都趴低近１巴仙，報４４﹒５銀；廣汽（０２２３８）２月汽車銷
量按年多咗６７巴仙至超過１１萬部，獲瑞信讚條數好過預期仲升埋目標，結果都係要軟近１巴
仙，報１２﹒７４銀。
　　ＡＳＭ（００５２２）績後繼續獲多間大行垂青，再獲麥格理、德銀同埋花旗升目標，今日
彈高半成，報１０４﹒６銀。
　　另外，中韓關係惡劣下，早前急瀉７１巴仙嘅陸慶娛樂（０８０５２）今日再插多３３巴仙
左右，報０﹒１７１銀，係表現最渣個股。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。