《小傳日記》花旗鷹姿未升級，香江牛氣升勢急！

　　《小傳日記》終於揭盅！花旗國聯儲局一如預期加息四分之一厘，而缸友最緊張嘅「鷹姿」
就無進一步強硬，當局大部分官員都傾向今年加息３次，而耶倫姨姨都話３次係符合漸進加息原
則，不過就補充一句，即使加４次亦要循序漸進而行。
　　點都好，無壞消息傳出，道指噚晚開心彈起１１２點收２０９５０。香江今朝都跟勢開漲
３０９點慶祝，報２４１０１突破廿天線。再加埋中資股業績有睇頭，北水湧現買實力股，恆指
最終以全日最高位收市，大漲４９５點，幅度有２巴仙，收２４２８８，係舊年９月以來高位；
國指亦大步踏前２５３點收１０５２６。
　　牛氣再現，魚缸成交即時旺番晒，比噚日增加四成至１０２２億銀添，創一個月新高！

＊息魔威力降信置最合皮，海航瘋搶地市值即大升＊

　　聯儲局一如孖屐所料加息０﹒２５厘，會後聲明無再放「鷹」，維持今年加息總共３次嘅預
期。加息步伐未必加快，本地磚頭佬都鬆一口氣，新地（０００１６）獲瑞銀籲「買」，衝前２
巴仙，報１１４﹒３銀；信置（０００８３）、嘉華國際（００１７３）齊齊跳高近３巴仙，收
１３﹒４２同４﹒９８銀。
　　海航系繼續喺香江瘋狂買地，香港國際建投（００６８７）以７４﹒４億投得九龍啟德住宅
地，佢之前連跌８日唔見逾１７巴仙，今日一舉反彈逾２６巴仙，報４﹒６８銀，單日市值升
１１億銀。同系兄弟海航實業（００５２１）都跟住踢高近２巴仙，埋單０﹒２９５銀。

＊野村潑冷水生發發跑輸，粵革急彈起好消息跟尾？＊

　　噚日阿爺提到債券通，生發發（００３８８）連同一班券商都好興奮，生發發好識做咁話會
積極跟進，而阿爺就話具體方案會適時公布，但野村今日就潑冷水，話債券通短期對生發發影響
有限，仲話佢估值高咗Ｄ，將目標價由１６０﹒９５銀微降到去１６０﹒３９銀，重申「沽貨」
評級，結果生發發跟唔到大市飛升，只能輕輕踢高逾１巴仙，報１９７﹒４銀。券商佬方面，銀
證（０６８８１）Ａ場（滬：６０１８８１）就炒到漲停，但香江呢邊淨係升逾４巴仙，報
７﹒６８銀；中信証券（０６０３０）亦跑前逾２巴仙，報１７﹒０２銀。
　　另一方面，粵海系炒到好興奮，粵海制革（０１０５８）失驚無神彈起逾３２巴仙，報
１﹒０７銀；廣南（０１２０３）亦衝前７巴仙，報１﹒２２銀。唔通有好消息？！

＊聯通彈半成開支大刀削，美圖續變靚九陽功練成＊

　　聯通（００７６２）放榜，成績就唔係咁靚仔，全年純利下跌９４巴仙唔派息，不過多間大
行反而收貨喎，因為見到公司好有誠意咁大削資本開支，大摩摩通仲提高公司目標價，支撐股價
飛起逾５巴仙，報１０﹒０６銀，成為今日升幅最多藍戰士！
　　科技股近來都好有睇頭，慧聰網（０２２８０）年初發過盈喜，今朝錄２億銀大手，埋單計
踢起近１４巴仙，報７﹒３３銀。街坊整Ｐ圖Ａｐｐ嘅美圖秀秀（０１３５７）今日再衝前近５
巴仙，報１４﹒８８銀，比起招股價８﹒５銀高出７５巴仙，已經係連續第９日見陽燭，練成九
陽神功！
　　華能國際（００９０２）成交急增，今日飄起近６巴仙，報５﹒７２銀，叻仔！

＊倫姨唔放鷹金礦股招積，油王訪華夏三桶油特升＊

　　花旗國原油庫存跌，刺激油價一個禮拜以來終於首次上升，另外習大大同沙特簽６５０億美
金能源等合作協議，三桶油反應都好好，中海油（００８８３）踢起近４巴仙，報９﹒１３銀；
中石化（００３８６）都有３巴仙進帳，報５﹒９９銀；另外中石油集團打算投資沙特阿美，阿
仔中石油（００８５７）撐場，升起逾３巴仙，報５﹒８４銀。
　　花旗國加息後聯儲局主席耶倫講話被指唔夠鷹派，搞到美元指數回落，金價亦因此有所提振
，升至一個禮拜高位，中國黃金國際（０２０９９）飛起近１２巴仙，報１７﹒８銀；招金
（０１８１８）亦衝前逾４巴仙，報７﹒５５銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。