《小傳日記》內房爆股災，高追好悲哀！

　　《小傳日記》香江魚缸今日（２５日）過咗個「傷心星期一」，先係金仔同侵侵嘅對立關係
愈嚟愈緊張，北韓仲話導彈襲花旗係在所難免，嚇到缸友心都離一離。點知一波未平一波又起，
阿爺突然出手加碼調控８個城市，其中６個更實施限售，最怕就係調控陸續有嚟呀！
　　忽然間壞消息一湧而上，恆指本來只係微微低開２８點，不過恐慌指數升溫，再加埋國慶中
秋黃金周在即，北水準備收爐，個市一插就毫無承接。缸友相繼離場保命，早排熱炒嘅祖國內房
股傷亡慘重，砵砵車股升咗咁多，自然都難逃一劫，恆指一度低見２７４７６，連５０天線（約
２７４８８）都宣告失守；雖然最終掹得住失而復得，但恆指已重挫３８０點報２７５００，
２０天線（約２７８６５）就正式被攻陷。國指亦碌低１９６點，報１０９１２。
　　總結全日賽果，魚缸成交高達１１１０億銀，近１４００隻魚毛陣亡；而藍戰士方面，小象
（０００１１）夠晒巴閉，逆市中一度破頂見１８４﹒８銀，埋單都穩收１８３﹒９銀；媽媽大
象（００００５）臨收市一刻腳唔穩，跣低ＤＤ收報７６﹒１５銀，不過都已經叫做好叻㗎喇。
　
＊傷心星期一有貨有所失，調控忽加碼內房被狂質＊
　
　　阿爺突然加碼樓市調控措施，當中有６個城市更實施限售添，搞到神州磚頭佬都大插水。大
阿哥中海外（００６８８）盤中低見２５﹒３銀，收市都仲無咗近７巴仙報２５﹒４５銀；潤地
（０１１０９）就有交銀國際維持「中性」評級，「他屐」就維持喺２６﹒４９銀，結果今日仍
然逾７巴仙，報２３﹒７５銀，仲跌穿多條平均線添；萬科（０２２０２）都無奈跌近８巴仙，
報２４﹒８銀。
　　而近月升得至勁嘅，今日就跌得最傷。融創（０１９１８）冇咗近８巴仙報３２銀；佳兆業
（０１６３８）亦碌低近１６巴仙，報５﹒６銀；碧桂園（０２００７）今日收市就冇咗近１１
巴仙，報１２﹒１銀；恆大（０３３３３）就跌低近９巴仙，埋單２６﹒９銀。仲有奧園
（０３８８３）冇咗１９巴仙。內房股爆股災，真係傷、傷、傷！
　
＊車仔雙積分缸邊打倒褪，新瘋未旺場瑞聲震一震＊
　
　　阿爺將會喺今個月底公布砵砵車碳排放雙積分制嘅正式方案，但有傳話目前得北汽同江淮可
以無壓力咁接受雙積分制，其他神州砵砵車都做唔到比例要求。車佬今日拖住手一齊跌低，吉利
（００１７５）跣低近６巴仙，報２２﹒０５銀，保唔住條１０天線（２２﹒１４５銀）；街坊
華晨（０１１１４）就再差少少啦，瞓低６巴仙報２１﹒２銀，低見２０﹒７銀，一次過插穿
１０天同２０天線。廣汽（０２２３８）就跌低近５巴仙穿１０天線（１７﹒６６６銀），報
１７﹒７銀。
　　蘋果新出嘅「唉瘋８」銷情平平，搞到蘋果喺花旗國嘅股價連跌３日，瑞聲（０２０１８）
亦都被拖累埋一份，碌低近７巴仙兼且失守１０天線（１３９﹒３８銀）同２０天線
（１３９﹒９９銀），收報１２７﹒５銀，喺藍戰士入面排倒數第三。
　　中興通訊（００７６３）早前就連同華為等合共４間公司，中標中移動物聯網項目，刺激佢
曾經高見２６﹒５銀破頂，不過之後都跟隨大市倒跌，最終瞓低５巴仙報２３﹒６銀。
　
＊網龍伸伸手險守批盪價，國銳與大地跌市成奇葩＊
　
　　網龍（００７７７）按每股２５﹒４銀折讓差唔多７巴仙配股，淨籌９﹒６８億銀，話想用
資金嚟發展「一帶一路」咁話。話時話呢隻股自月初見過３４﹒２５銀高位之後一路都走下坡，
今日仲要喺大跌市中抽水，難怪埋單唔見６巴仙，報２５﹒７銀，險守配股價。
　　九號運通（００００９）上星期二（１９日）停賽，去到今朝終於復牌啦！原來係主要股東
朱生用溢價近６巴仙提出要約，刺激九號仔今日衝前近１０巴仙，報０﹒２８銀，一次過衝破晒
所有平均線，認真厲害！
　　至於數到最勁抽嘅股仔，國銳地產（００１０８）大跌市都炒高２８巴仙報１﹒１４銀，勁
！排第三嘅大地教育（０８４１７）雖然控股股東宏勇配股，涉及股份最多佔已發行股本約２４
巴仙，缸友可能憧憬有大戶接貨，大跌市下無懼入貨，最終彈高近２３巴仙，報０﹒８６銀。
　
＊ＧＩＣ減持中金即跣低，玖紙失後勁７０８威威＊
　
　　中金（０３９０８）上星期夠晒出位，累計飆咗２７巴仙，不過升勢就無辦法持續到今日啦
；加上星洲政府投資公司（ＧＩＣ）上周四（２１日）就減持咗中金約４３３萬股，本身揸住佢
１６﹒１６巴仙股權，依家降到得返１５﹒８７巴仙，搞到中金今日跣低咗近１１巴仙，報
１６﹒２銀。
　　紙業佬前排個勢都好勁，估唔到今日玖紙（０２６８９）喺大跌市下一度再創逾９年半高啊
！據報原來玖紙喺上周四（２１日）再加過箱板價格，已經係今個月第四次啦，大和話仲有可能
再升喎。而元大證券仲將目標價大升４２巴仙去至２０﹒６銀。可惜最終玖紙都被大市拖低近
２巴仙，報１６﹒１２銀。
　　恆大（０３３３３）囝囝恆大健康（００７０８）今日ＤＤ咁啲力，結果今日再彈高８巴仙
，盤中高見３﹒４３銀終於創新高啦，收報３﹒１１銀。
　　有人歡喜有人愁，亞洲煤業（００８３５）被聯交所列入除牌程序，今日就插近３９巴仙，
報０﹒０３６銀。請請！
　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。