《小傳日記》眾安臨尾太糟糕，不如轉戰金多寶！

　　《小傳日記》花旗國揸Ｆｉｔ人侵侵言行舉止不嬲都相當出位，噚日出嚟Ｓｅｌｌ佢嗰份
「孖屐」大家期待已久，兼有史以嚟減稅減得最勁嘅稅改方案，而「孖屐」似乎都幾受落；加上
方案有望獲得國會通過，花旗三大魚缸全線跳彈床。美金都一樣繼續強勢，美匯指數升咗
０﹒４２巴仙，報９３﹒３６１。
　　神州缸友就嚟放足８日長假，而「北水」今日起已經閂水喉。香江缸友唔知係咪都受到影響
，搞到無心戀戰。噚日魚缸彈高１２９點，今朝高開１８點，之後只係係咁意最多升過２２點就
全日潛水，臨尾仲愈跌愈急。結果，恆指埋單跣低２２０點，報２７４２１，條５０天線
（２７５４６）都失守埋。國貨佬指數跌得仲甘，唔見咗１６１點或１﹒５％，報１０８７４。

＊眾安有頭威可惜失尾陣，三馬在哪兒高追暈一暈＊
　
　　今日全缸焦點，盡在眾安在綫（０６０６０）。隻股登場無耐，就升破７０蚊，高見
７０﹒５０銀，點之Ｃｈｏｋ下Ｃｈｏｋ下，愈Ｃｈｏｋ愈低，臨尾真係無眼睇。結果，呢隻挾
住三馬盛名嘅新股，幾乎以全日最低位收市，報６５﹒２銀，但仍比招股價高出９％。如果你以
實彈認購，一手唔計使費賺５５０銀。
　　長周末臨近，加上無北水，成交只得８９２億，如果扣除眾安嗰６５億，就仲奀之之；唔通
大家都掛住今晚攪珠嘅８０００萬六合彩中秋金多寶，無心戀戰？如果小傳中咗……

＊壽仔與平保今天有點糟，麥記降評級友邦難風騷＊
　
　　神州保險佬人保（０１３３９）早前獲中證監受理Ａ場ＩＰＯ，但人保今日就窄幅上落；盤
中高見３﹒５５銀，結果收市跌近１個巴仙，報３﹒４８銀。平保（０２３１８）、國壽
（０２６２８）近收市跌多咗，前者腳軟近３個巴仙，後者唔見近２巴仙，分別報５９﹒４銀同
埋２３﹒２５銀。
　　大價藍籌保險佬ＡＩＡ（０１２９９）亦唔太好彩，事關佢被麥格理降投資評級，評級由
「中性」降至「跑輸大市」，「他屐」則由５４銀下調至５３銀，結果全日無奈腳軟近１巴仙，
埋單５８銀。
　
＊旺旺頻回購逆市高高收，瑞士佬掟貨黑鴨眉頭皺＊
　
　　旺旺（００１５１）喺呢兩日用咗近１６００萬港紙回購咗３００萬股，今日升咗近３巴仙
，報５﹒３３銀，仲要一嘢升穿咗幾條平均線，做埋今日最勁藍戰士。
　　蒙牛（０２３１９）今日好Ｃｈｏｋ，今朝都仲喺低位潛水，最多跌咗近３巴仙，但食完晏
返嚟彈高咗超過１巴仙，高見２１﹒４銀，再創超過兩年新高，最後埋單又插咗超過１巴仙，報
２０﹒９銀。周黑鴨（０１４５８）被瑞銀掟貨掟咗３３８萬股，套現２５７８萬銀，股價全日
就跌咗近３巴仙，報７﹒４１銀。
　　之前聲寶向花旗國投訴話進口至花旗國嘅電視侵犯咗佢嘅專利，神州海信集團成為咗主要調
查對象，佢個仔海信科龍（００９２１）今日就「中招」成為缸友掟貨對象，全日插咗超過４巴
仙，報８﹒６３銀。

＊超級黃金周濠江遊一遊，賭股返來了拍住高高收＊
　
　　「孖屐」都憧憬同胞們會趁住超級黃金周，去馬交玩返兩手，唔少大行都好睇好馬交１０月
賭收會幾省鏡。永利（０１１２８）今日畀大和升「他屐」，升幅有成近兩成半，至１９﹒３銀
，全日一馬當先升咗近兩巴仙，報２１﹒０５銀。金沙（０１９２８）同銀娛（０００２７）一
樣巴閉，喺近三年高位４０﹒５銀同５４﹒８５銀插旗，金沙埋單升咗超過１巴仙，報
４０﹒３５銀；銀娛就升咗唔夠一巴仙，報５４﹒３銀。
　　神州磚頭噚日跳完彈床之後就冇氣要唞唞，百仕達（０１１６８）噚日升咗９巴仙，今日佢
話有揸住眾安內資股，可以賣出去嘅貨仔有成超過４８億，佢嘅資產淨值仲多咗成４４巴仙至
９３﹒３１億銀，但今日竟然倒插近１６巴仙，報１﹒３３銀，跑輸所有街坊。其他大隻磚頭都
只係受輕傷，四條三恆大（０３３３３）跌超過１巴仙，報２６﹒６５銀；萬科（０２２０２）
跣低近３巴仙，２５﹒７銀。噚日升咗近１７巴仙嘅華南城（０１６６８）就跣低超過４巴仙，
報１﹒９８銀。
　
＊內房全洩氣百仕達急插，半新丁熱炒低撈認真發＊
　
　　今日眾安掛牌，帶動晒成個半新丁孖屐氣氛，Ｃｏｏｌ　Ｌｉｎｋ（０８４９１）埋革飛起
近１４巴仙，報０﹒８２銀，高見１﹒０２銀上市新高。津上機床（０１６５１）高見８﹒３５
銀創上市新高，堆單有１３巴仙進帳，收報８﹒２５銀。萬成金屬包裝（０８２９１）都有近８
巴仙落袋，報１﹒９３銀，勁！
　　正恆（００１８５）用成接近１１億銀向非執董購買神州房產公司，孖屐借勢大炒，令股價
一舉衝破晒十天、廿天、五十天同一百天線，最後有２５巴仙落袋，收報０﹒２５５銀。嘉年華
（００９９６）宣布「四供一」得９３巴仙有效接納，盤中低見０﹒４銀，見逾３年半低，收報
０﹒４４銀，跪低逾８巴仙！請請！
　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。