按盤價 
《小傳日記》花旗國魚缸噚晚（５日）受到稅改嘅樂觀情緒，同埋強勁經濟數據刺激，三大
指數再創收市新高，當中道指收漲１１３點報２２７７５，牛氣沖天！
香江呢邊一樣咁「牛」！恆指今朝（６日）一開市就強勢彈起２４７點報２８６２６，亦係
全日最高，唔單止成功衝破２０１５年「大時代」２８５８８點高位，仲差唔多去番十年前嘅水
平，勁呀！仲有三馬概念嘅眾安在綫（０６０６０）今朝都一口氣爆升兩成去到９６﹒１銀，
「紅底」在望，真係緊張到嘩嘩聲呀！
不過，多隻藍戰士，股王ＱＱ（００７００）、ＡＩＡ（０１２９９）、吉利
（００１７５）等完成任務，都要休息唞一唞，雖然恆指埋單得番７８點報２８４５８，但能夠
攻破大時代高位，對好友來講，意義重大呀！國指方面，都升幅收窄再６１點報１１４５９。全
日魚缸成交都有１０３０億銀，夠晒旺。
仲有，Ａ場下星期一（９日）長假後復市，唔少缸友都估，大媽們會掃番放假時買唔到嘅祖
國錢莊，到時香江魚缸又可以叨吓光，話唔定二萬九關不是夢哦！
＊貨源歸晒邊眾安搭火箭，揸住內資股百仕達超發＊
星味濃郁嘅眾安貨源歸邊後，今日又繼續搭火箭喇！最多曾經爆升過近兩成，高見９６﹒１
銀，向著「紅底」大關出發，身為眾人焦點嘅佢亦都係成交最多嘅股仔，最終就跳起近１７巴仙
，報９３﹒６５銀。
百仕達（０１１６８）手上就揸住眾安８１００萬股內資股，當然就可以叨光飛起埋一份啦
！今日一躍而上收復十天線（１﹒５０５銀），彈高４巴仙，報１﹒５銀。而百仕達持有逾３６
巴仙股權嘅威華達（００６２２）都踢高近４巴仙，報０﹒１８７銀。
其他街坊都有被旺市嘅氣氛感染到，齊齊飛高，平保（０２３１８）衝前逾１巴仙破頂，報
６３﹒８銀。
＊吉利開ｔｕｒｂｏ迪仔望紅底，蒙牛闖高位復星高陞照＊
勢估唔到吉利連升三日之後仲有力再上啊，自從早排大摩決定大升目標價，由１５銀飛上
３０銀，仲將評級由「持有」上調至「增持」，吉利就開盡ｔｕｒｂｏ。今日單日又跳起近６巴
仙，報２７﹒３５銀，成為是日最佳藍戰士，累計４日合共彈起逾２４巴仙，厲害！街坊比亞迪
（０１２１１）之前都炒「紅底」憧憬，今日亦都唔執輸，衝前近２巴仙報８０﹒４５銀，盤中
高見８１﹒９銀，創逾七年嚟嘅新高。
要數到其他出位嘅藍戰士，就要提到蒙牛（０２３１９）啦！今日隨市彈起３巴仙，報２２
銀，盤中高見２２﹒３銀再創逾兩年新高，９月份累升近２０巴仙。
有「上海和黃」之稱嘅復星（００６５６）就衝前逾７巴仙，報１７﹒９銀。早前佢就同囝
囝復星醫藥（０２１９６）聯合公布，話完成收購印度製藥商Ｇｌａｎｄ Ｐｈａｒｍａ，而復
星醫藥就跳起逾５巴仙，報３５﹒０５銀。
＊金九冷清清四條三腳軟，５Ｇ概念勁中興ｈｉｇｈ到爆＊
據新華社嘅「新華視點」報道，今年「金九銀十」期間，神州一二線熱點嘅樓市普遍行情清
淡，但部分三四線樓市就比較活躍，而一眾神州磚頭佬今日仍然醒神，融創（０１９１８）升咗
２巴仙，盤中高見４２﹒３５銀破頂，結果全日報４０﹒８銀；「四條三」恆大（０３３３３）
午後就腳仔軟近２巴仙收報３０﹒２銀，但今日盤中曾經高見３１﹒６銀破頂架；華南城
（０１６６８）都踩行油，全日都飛起近３巴仙，報２﹒４１銀。
５Ｇ概念佬繼續受追捧，中興通訊（００７６３）畀麥格里喺前日（４日）維持「跑贏大市
」評級，「他屐」就維持３５銀，今日盤中高見３０﹒４５銀，仲創埋上市新高添，最後全日升
咗近８巴仙，報３０﹒１銀；街坊京信通信（０２３４２）亦都吹起咗近７巴仙，埋單１﹒５８
銀。
＊旅客人數跌賭仔要損手，細股開派對太睿復牌升＊
十一黃金周到訪馬交嘅旅客人數由升轉跌，喺１０月內頭四日暫錄４６﹒９萬人次，比去年
同期就少咗２個巴仙，雖然賭仔銀娛（０００２７）獲大摩重申「增持」，但「他屐」只維持喺
５３﹒５銀，銀娛現價都已經升有凸，難怪最終全日冇咗近２巴仙，報５５﹒４銀；街坊金沙
（０１９２８）就逆市插近３巴仙，報３９﹒６銀，睇落賭仔真係冇乜運仔喇！
另一邊廂，細股就開晒Ｐａｒｔｙ，停賽逾兩年嘅太睿（０１０１０），控股股東耀正完成
咗配售７３２４萬股後，今日終於復賽喇！結果今日起勢追番兩年嘅光陰，應聲彈高近６５巴仙
，報２﹒８銀，係最威水魚毛；近排跌到唔識停嘅正力（０８２８３）錄得「十三連陰」累跌大
嗱嗱８２巴仙之後，嚟個大反擊，飆高近２６巴仙，報２﹒３９銀；中國投融資（０１２２６）
都唔輸蝕，全日都有近２６巴仙進帳落袋，報０﹒０８８銀，真係可喜可賀丫！假期愉快，請請
！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
全新節目《說說心理話》青少年不可以戀愛！？真實個案講述驚心動魄經歷► 即睇
