《小傳日記》房策終出爐，地主速速逃！

　　《小傳日記》今日（１１日）缸友坐定定，等新特首林鄭月娥喺１１點宣讀任內首份《施政
報告》。揭盅之前，磚頭佬食住噚日（１０日）個勢，帶動港股今朝高開１３１點報２８６２２
。不過，林鄭宣布首置計劃後，孖屐擔心會影響私樓細單位，加上磚頭佬早幾日已經偷步炒高，
今日缸友就順理成章，趁消息出貨；恆地（０００１２）首當其衝急回近５巴仙，做埋第二差藍
戰添。好傷喔！
　　唔單止磚頭佬調頭向下，大象（００００５）同生發發亦急急回，加上中字輩無晒力；結果
，恆指調頭碌低１０１點收報２８３８９，國指算硬淨只係跌７點收１１４１１。
　　施政報告都塵埃落定，另一重頭戲「十九大」將會喺下星期三（１８日）召開。未有特別好
消息下，早排熱炒嘅中字輩今日都出現獲利回吐，難怪全日魚缸成交高達１１２３億銀喇！
　
＊施政報告前地主齊歡呼，無提換農地即時變得灰＊
　
　　本地磚頭股今朝仲好地地，到施政報告提及綠置居、白居二，同埋特別為香江人而設嘅「首
置上車盤」，大家趁消息出貨，加上無提及換農地，地住們齊齊由升轉跌，下半場跌得仲勁咗添
！當中，恆地朝早曾經升至５６銀創上市新高，但缸友獲利離場，午後更一度急挫至５２﹒４５
銀添，最終全日冇咗近５巴仙報５２﹒５５銀，係表現第二差藍戰士。
　　新世界發展（０００１７）今朝仲高見１２﹒７８銀創近七年新高，但收市都要跟大隊瞓低
，全日倒跌１巴仙，報１１﹒９２銀。街坊新地（０００１６）亦都跌近２巴仙報１２９﹒５銀
；長實集團（０１１１３）亦都唔例外，剷低咗逾１巴仙，報６４﹒３銀。
　
＊昨天好威威今天卻曳曳，ＱＱ眾親戚忽然失氣勢＊
　
　　股王ＱＱ（００７００）Ｄ親朋戚友噚日夠晒出位，不過今日就齊齊失威，ＱＱ當然力企得
穩報３５１﹒６銀。不過，噚日已經彈高３４巴仙嘅華誼騰訊（００４１９），今日雖然見過
０﹒６３銀創逾一年高，但之後打回原形，散場跣低近３巴仙收報０﹒４９５銀。
　　至於恆騰網絡（００１３６）由ＱＱ同恆大（０３３３３）揸住，不過早排升咗太多，今日
拉埋恆大同恆大健康齊齊散水。恆騰收市前最多急瀉近２７巴仙，雖然埋單只係跣低近１１巴仙
報０﹒３８銀，但缸友都嚇到嘩嘩聲了。恆大健康亦好傷，蒸發咗逾兩成收３﹒３３銀，阿媽恆
大都唔見６巴仙收２７﹒７５銀，今次真係受重傷喇！
　　神州媒體話收到風長汽（０２３３３）會同寶馬孖住搞合資。缸友懶理消息係真係假，股價
先跳高１４巴仙，報１１﹒３銀，盤中高見１１﹒７８銀，創咗自２０１５年６月以嚟嘅高位啊
！不過街坊華晨（０１１１４）就差啲啦，雖然跳起過７巴仙，不過之後就倒跌，最終跌低２巴
仙，報２１﹒２５銀。
　
＊長汽拍寶馬升到誇啦啦，忽聞又調控內房表現差＊
　
　　阿爺早前表示，神州磚頭個孖屐近年來出現城市間分化加劇嘅現象，仲話有可能會出台調控
長效機制，嚇到神州磚頭佬今日齊齊瞓低。融創（０１９１８）噚日升咗逾３巴仙後，今日就腳
軟軟喇，仲一度失守１０天線（３６﹒９９５銀）添，全日就跌低咗逾７巴仙，報３７銀；中國
奧園（０３８８３）亦都跣低近７巴仙，報４﹒３９銀。
　　瑞信一口氣插低多隻賭仔嘅「他屐」，賭仔就逆市向下喇。金沙（０１９２８）被降「他屐
」，由４３﹒５銀削至４０﹒０銀，評級就由「跑贏大市」降至「中性」，結果全日瞓低咗近
３巴仙，報３７﹒９５銀；街坊銀娛（０００２７）「他屐」就由６２銀跌至６１﹒５銀，但評
級仲維持喺「跑贏大市」，結果全日就冇咗近２巴仙，埋單５３﹒２銀。
　
＊瑞信降評級賭仔有所失，中興與萬洲今天被狂質＊
　
　　俄鋁（００４８６）市前錄得多手共４﹒０８億銀嘅市前交易，涉資２２﹒０４億，咁啱就
有消息傳佢嘅兩個主要股東合共會賣４﹒５６億股，佔已發行股本約３巴仙，令俄鋁最多插過　
９巴仙，最終跣低近７巴仙，報５﹒４５銀。
　　５Ｇ概念股已經炒咗幾日，中興通訊（００７６３）今日就現回吐，盤中最多跌低過近９巴
仙，最終瞓低８巴仙，報２７﹒７銀。
　　肉類股捱沽，當中萬洲（００２８８）此前雖然高盛同瑞信唱好，帶動噚日曾經破頂，不過
今日就現回吐，跌低近５巴仙，報８﹒２銀，係今日表現最差啲藍戰士。
　　瑞信降低大象（００００５）嘅評級至「跑輸大市」，升目標價去到６２﹒９銀，但仍然低
過現價，今日都輕微跌低０﹒６巴仙，報７８﹒１銀。請請！
　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。