《小傳日記》魚缸整固等闖關，內險回勇畀個讚！

　　《小傳日記》特首林鄭月娥噚日（１１日）宣讀完任內首份《施政報告》之後，一班磚頭佬
即時無晒心機調頭向下走，今日（１２日）唔少大行都出報告話，對於林鄭無提及農地轉換嘅規
模同詳情，都令孖屐感到失望。不過都有力撐林鄭嘅聲音，有部分仲調高地主佬目標價添！結果
，缸友跟好不跟醜，新世界（０００１７）、恆地（０００１２）今日下半場都拗腰衝番上去，
勁。
　　仲有中字輩唞咗幾日，今日一班內險佬，好似眾安在綫（０６０６０）、新保
（０１３３６）都發力反攻，結果恆指今朝高開４１點後，一度踢起１３９點至２８５２８。可
惜，股王ＱＱ（００７００）再創高峰見３５３﹒８銀後無力，最終恆指收市就只漲６９點，收
２８４５９；國指喺下星期三（１８日）十九大開幕前表現都唔錯，收升８８點報１１５００。
全日魚缸成交約有９０６億銀。

＊眾安組合營今日好生性，新保坐火箭平保亦衝前＊

　　眾安除咗交投好旺之外，發展業務方面亦都好活躍，佢打算同百仕達（０１１６８）合作成
立小額貸款合營，註冊資本３０億人仔，眾安會負責七成。眾安腳軟足三日累跌近８巴仙之後，
今日彈番起近３巴仙，報８８﹒７５銀；百仕達更加飛起近９巴仙，報１﹒４６銀。
　　其他內險今日都好好反應，早前獲招商證券重申「買貨」嘅新保好威水，開賽後愈升愈有，
最終衝前超過６巴仙，報４８銀，係最叻國貨佬；財險（０２３２８）緊隨其後，亦跑前近半成
，報１５﹒０８銀；藍戰士平保（０２３１８）就有近３巴仙進帳，報６３﹒９５銀，藍戰士中
第二叻。仲有太平（００９６６）都好勁，收升逾７巴仙添報２３﹒８銀，讚！

＊傳阿爺入股ＱＱ粉絲沽，劇飛獲讚美全力向上飛＊

　　有報道指阿爺打算入股股王ＱＱ、微博、阿里巴巴旗下優酷土豆等科技公司１巴仙權益，監
管機構希望喺呢Ｄ企業嘅決策上可以扮演直接角色。結果ＱＱ高見３５３﹒８銀破頂之後見沽壓
，全日腳軟唔夠半個巴仙，報３５０﹒２銀。
　　高盛將劇飛（００２９３）納入「確信買入」名單，睇１４﹒６銀，話佢盈利同埋股價轉為
較正面，又預料上半年客運收益率已經見底，劇飛因此飛番高近３巴仙，報１２﹒２８銀，做埋
最叻藍戰士添！
　　砵砵車寶馬唔評論之前傳出同長汽（０２３３３）搞合資公司，但就同華晨（０１１１４）
嘅合資協議提前延長至２０２８年，另外華晨獲高盛升目標價一倍去到２８﹒８銀，最終華晨行
前逾１巴仙，報２１﹒５銀；長汽就今朝開賽之前宣布停賽，待發澄清報道嘅公告。而其後，小
傳就收到風，話原來寶馬想將祖國Ｍｉｎｉ車生產外判畀長汽！家陣傳聞滿天飛，長汽要盡快復
賽澄清先得喇！

＊大行齊唱好舜宇卻仆倒，信利跳彈床缸友心花放＊

　　神州手機鏡頭一哥舜宇（０２３８２）今日公布咗９月份鏡頭出貨量數據，手機鏡頭按年升
咗近６７巴仙，但係「孖屐」都唔買帳，皆因按月計升咗唔夠１巴仙，即使後來有幾間大行出嚟
唱好話，嚟緊第四季訂單增長依然強勁，但舜宇一樣難逃厄運，全日插咗近半成報１２１﹒６銀
。
　　不過，專搞顯示器嘅信利（００７３２）之前因為業績唔靚仔而頹咗好幾個月，但自從神州
大大聲話會喺２０１９年成為全球最大嘅平板顯示生產基地，信利就借咗呢個好消息谷底翻身，
今日都爆升咗超過半成，報３﹒５銀，成個禮拜就大嗱嗱升咗超過３６巴仙，勁！街坊華顯光電
（００３３４）就升咗近３巴仙，報１﹒０７銀。
　　魚缸半導體大佬ＡＳＭ太平洋（００５２２）下晝畀大戶大手掃貨，總共有六手大手交易，
差唔多手手都億億聲，全日成交有成９﹒５億銀，股價全日彈高近３巴仙報１１６﹒４銀。

＊ＩＭＦ批評渣打無心情，中旅獲唱好表現好風騷＊

　　渣打（０２８８８）、德銀同花旗等幾間國際錢莊今日好「有幸」畀國際貨幣基金組織
（ＩＭＦ）點名睇中，除咗係話佢地喺賺錢方面會有阻滯之外，仲踩多腳話喺２０１９年，佢地
嘅股本回報率可能會低於８巴仙，但渣打似乎冇乜受影響，反而都算幾硬淨，全日只係跌咗唔夠
一巴仙，報７８﹒５銀。
　　香江中旅（００３０８）獲中金唱好，話佢嘅香江磚頭潛在價值大嗱嗱有近１５０億銀，如
果賣到出去，仲估佢會豪派特別息，兼且預期佢嘅盈利會因為港澳酒店業反彈同香江旅遊項目加
快發展而搭順風車，中金亦都順勢將佢「他屐」由２﹒６４銀升至３﹒８８銀，評級由
「Ｈｏｌｄ住」升至「掃貨」，全日股價就爆升咗超過６巴仙，報２﹒９７銀，仲喺３﹒０３銀
創咗２１個月新高。
　　會德豐（０００２０）囝囝九倉（００００４）將觀塘一楝商廈，以９０億銀賣比神州磚頭
綠景（０００９５），九倉有錢落袋就最Ｈａｐｐｙ，全日升咗超過２巴仙，報７２﹒５銀，會
德豐升咗唔夠１巴仙，報５６﹒９５銀；綠景話個楝商廈食正「沙中綫」概念，好睇好物價升值
空間，缸友反應都係一般，全日只係升咗唔夠１巴仙，報２﹒３４銀。
　　本地地主佬噚日急回，今日好快生猛返，新世界升高超過２巴仙，收１２﹒２銀；四叔恆地
亦彈近１巴仙報５２﹒９５銀；新地（０００１６）亦有大約２個巴仙進帳，報１３１﹒９銀。
地主佬復原能力之強，咪話唔勁揪！請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。