《小傳日記》ＱＱ唔失禮，港所好好揮！

　　《小傳日記》唔經唔覺好快就到聖誕，過完聖誕，缸友都就快要同２０１７年講Ｂｙｅ　
Ｂｙｅ。若果以上周五（１５日）埋單計，道指同恆指今年已分別升咗近兩成半同超過三成，相
當巴閉。花旗國侵侵誓要做找數真漢子，點都要兌現喺競選時減稅嘅承諾，仲講到明話想喺聖誕
節前通過；嗰邊嘅缸友即時士氣大漲，美股上周五又再破頂，若然減稅方案真係成功通過，道指
今年有望更上一層樓。
　　香江呢邊除咗受美股帶動外，生發發（００３８８）終於放寬同股不同權嘅上市規定，話希
望吸引更多創新企業過嚟香江上市。生發發今朝一出閘就已經一馬當先，跑贏所有藍戰士。雖然
魚缸朝早一度倒插２６點，低見２８８２１點，但午後其他重磅股愈升愈有，ＱＱ
（００７００）仲一度升超過兩巴仙，魚缸即時重拾氣勢，午市大部分時間都有超過２００點進
帳。恆指最終埋單升２０２點，報２９０５０點。國指都唔執輸，升咗４９點，報１１４１５點
。
　　雖然魚缸今日表現省鏡，但聖誕前夕愈嚟愈多缸友無心戀戰，成交得返９２０﹒８４億銀，
打破咗六個星期以嚟千億成交嘅紀錄。
　
＊舜宇失紅底街坊亦閉翳，節日氣氛濃成交有點曳＊
　
　　一場遊戲一場夢，喺仲未出「唉瘋Ｘ」同「唉瘋８」嘅時候，手機設備股係威係勢，舜宇
（０２３８２）晉身紅底之餘仲順利染藍。不過，現實總是不似預期，「唉瘋Ｘ」冇咗指紋解鎖
，令部分粉絲相當失望，加上價錢又唔平，已陸續開始有分析師睇淡「唉瘋Ｘ」出年嘅銷售，相
關股份喺上個月破頂後就冇咩運行。蘋果雖然唔係舜宇嘅主要客仔，但股價表現都受到牽連，今
日就跣低超過兩巴仙，報９９﹒８５銀，為８月以嚟首次失紅底。１２月到而家，舜宇已經急插
咗超過２３巴仙！
　　瑞聲（０２０１８）雖然冇咁重傷，但今日亦跌咗近兩巴仙，報１３７﹒１銀。若然由喺
１１月頭創下嘅１８５蚊山頂位計，已經累跌咗超過２６巴仙。
　　舜宇嘅街坊丘鈦（０１４７８）一樣受重傷，最近仲要被中信建投降評級，由「掃貨」降至
「持有」，今朝突然間急插近１２巴仙兼失守十蚊關，低見９﹒９６銀，埋單跌近９巴仙，報
１０﹒２６銀，並且連跌六日，加埋累跌兩成半！
　　　　
＊同股不同權兜轉生發發，汽車零部件跳起無花假＊
　
　　要數今日最靚仔嘅藍戰士，當非生發發莫屬啦。生發發上星期五宣布放寬同股不同權嘅上市
規定，希望吸引更多創新公司來香江上市。另一方面，又取消由創仔轉做主板嘅簡化申請，同時
延長創板股東嘅禁售期。生發發獲得中金維持「掃貨」評級，今日股價扶搖直上，跳起逾４巴仙
，報２３６銀。
　　砵砵車零部件同相關股今日亦彈起，信義玻璃（００８６８）跳高逾４巴仙，報９﹒１５銀
，收復十天線（８﹒９５５銀）、街坊耐世特（０１３１６）亦收復咗條十天線（１７﹒６３銀
），全日衝前逾６巴仙，報１８﹒０８銀，離上市新高１８﹒６２銀又近一步，勁！
　
＊中興再碌低懶理好消息，玖紙發盈喜融創軟無力＊
　
　　通訊設備佬近排都一樣冇運行，中興通訊（００７６３）上個周五先話旗下嘅５Ｇ產品已經
參與緊國家５Ｇ第二階段測試，但缸友就選擇趁好消息出貨。隻股繼上周五插咗近４巴仙後，今
日再跌過，再跣低近４巴仙，收報２７蚊，守唔住條十天同五十天線。
　　其實，唔少通訊設備佬同手機設備佬一樣今年都升咗唔少，係時候計計數。神州光纖一哥長
飛光纖（０６８６９）今日雖然跣低近７巴仙，報３２﹒９５銀，但今年以嚟加加埋埋都升咗超
過一倍。
　　神州資源佬炒高一排之後就冇晒蹤影，而紙業一哥玖紙（０２６８９）就發盈喜，話如果撇
除匯兌虧損，截至今年１２月底嘅六個月就起碼多賺九成。缸友收到風都好受落，加上星期三
（２０日）除淨，每股派末期息２５分人仔。隻股全日彈高近６巴仙，報１３﹒０４銀。
　　融創（０１９１８）上周五因配股抽水７８億銀而大插近１１巴仙後，今日又再嚟料，最多
插咗近６巴仙，低見２９﹒８銀，最後埋單勉強守得住３０蚊大關，跌咗近半成，報３０﹒０５
銀。
　
＊正通伸伸手復牌玩低收，基建各自走有喜亦有愁＊
　
　　正通汽車（０１７２８）上周五停牌，到今朝終於復牌啦，原來係折讓半成配股，抽水
３﹒７７億銀，用嚟發展金融科技平台。雖然早段升過一浸，但之後就愈走愈低啦，最終碌低６
巴仙，報７﹒５２銀，穿十天線（７﹒８４５元）。
　　基建佬今日真係有人歡喜有人愁，全都因為大和分析咗行業研究報告。中車時代
（０３８９８）得到「跑贏大市」評級，兼得到５０銀「他屐」，認真厲害！跳起逾２巴仙，報
４９銀，錄得四連揚，累計升逾９巴仙，仲做埋今日第二好表現國貨佬添！之不過，街坊中鐵
（００３９０）就慘豬豬，被大和將評級由「跑贏大市」下調至「持有」，「他屐」都降到去６
銀，搞到今日跌低近２巴仙，報５﹒６５銀，係今日第二最差表現國貨佬。請請！
　
　　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。