《小傳日記》中美貿易戰鳴槍，香江脫險定遭殃？

　　《小傳日記》缸友等咗咁耐，終於等到花旗國喺今日（６日）香江時間中午落實，向總值
３４０億美金嘅祖國商品徵收關稅，咁就可以睇埋阿爺會有咩反應，大家就唔使心驚膽跳，日日
都得個「等」字。
　　喺關稅實施前，今朝香江魚缸就仲跟住道指，輕輕高開７２點報２８２５４，但之後見到Ａ
場竟然連二千七關都穿埋，創２８個月新低，嚇到香江缸友無鞋挽屐走，大市又調頭向下碌低
２５６點報２７９２５，心血少Ｄ都唔掂。
　　直至到中午１２點，對華關稅正式實施，阿爺話中方不得不反擊，但又無再講清楚有咩更加
勁嘅報復行動，只係話對花旗國加徵關稅反制措施喺１２點０１分正式開始。缸友反而當好消息
咁炒，魚缸拗腰彈高近４００點至２８５５４添！只係缸友好快就冷靜落嚟，結果魚缸收市就得
１３３點升幅收２８３１５，但至少三連跌終於斬纜喇；國指就象徵式收高１４點報
１０６２２。再睇埋成交只得近９８５億銀，就知道呢個反擊幾咁不堪一擊喇。
　　
＊大隻佬唔郁大市難收復，內銀與內險無力去作戰＊

　　其實只要睇吓Ｄ大隻藍戰表現，就大約睇得出缸友對個市有返信心未。股王ＱＱ
（００７００）明顯無咩力，窄幅浮沉收市，報３８６﹒６銀；大象（００００５）又係行唔郁
，只收報７２﹒６銀升１亳子；ＡＩＡ（０１２９９）就算係表現比較好，有近１巴仙進帳收６
７﹒６５銀。
　　仲有中字輩內險及內銀佬，捱沽咗咁耐，但都係死氣沉沉，就算噚日實施降準放水，今日班
內銀佬都無力向前行，建行（００９３９）微微收升唔夠１巴仙收７﹒１５銀，工行（０１３９
８）平手完場，中行（０３９８８）更加腳軟軟收場。內險佬就仲無癮，市升果陣又無得跟住向
前衝，又成日受Ａ場拖累，國壽（０２６２８）今日又一度低見１８﹒８８銀，埋單唔見０﹒４
巴仙收１９﹒１６銀，平保（０２３１８）就只係微微踢起０﹒４巴仙報６９﹒７銀，認真無奈
。

＊貿易戰開槍無震到市場，滬指腳仔軟券商好憂怨＊

　　市場驚咗咁耐嘅貿易戰，終於由花旗國打咗「第一槍」，花旗國喺香港時間中午，率先對祖
國３４０億美金商品加徵２５巴仙關稅生效，目前未見中方加碼反擊，消息暫時得以消化。一直
因為貿易戰消息受壓嘅舜宇（０２３８２），午後都彈返上去，埋單衝前近３巴仙，報１４２銀
，係是日最勁揪藍戰士！至於中興（００７６３）就出公告話，獲得花旗國商務部解除部分限制
，踢高近４巴仙，埋單報１２﹒７銀。
　　今日Ａ場曾經失守兩千七關口，搞到成班券商都跟住碌低。午後滬指彈返起，券商嘅跌幅都
收窄唔少，有幾位甚至有力倒升添。信証（０６０３０）踢高０﹒４巴仙，報１５﹒０２銀；廣
發証券（０１７７６）衝前０﹒９巴仙，報１０﹒９６銀。ＨＴＳＣ（０６８８６）就差Ｄ喇，
跌低咗２巴仙。

＊領展創新高缸友齊叫好，食品佬跳起統一最歡喜＊

　　魚缸好似坐過山車咁，一時升一時跌，缸友都唔敢太冒險，資金就流入咗呢排好少提嘅領展
（００８２３）喎，呢條魚毛噚日就進行咗３月以嚟嘅首次回購，今日開心高見７４﹒１銀破頂
。雖然之後就冷靜返些少，埋單只係踢高２巴仙，報７４銀，但表現都相當唔錯。
　　仲有近排失寵嘅石藥（０１０９３），都跟住魚缸彈返起，飛起逾２巴仙，報２１﹒９銀。
　　缸友亦都揀咗食品佬嚟避險，有幾位街坊都因而落鑊。當中，統一（００２２０）就最勁揪
喇，愈升愈有，最多跳起過近９巴仙，高見９﹒５３銀，仲以全日最高位收市，突破埋廿天線（
９﹒３４９銀）同埋十天線（９﹒４５９銀）。至於街坊康師傳（００３２２）都唔差，跟住衝
高半成，收報１７﹒５８銀。

＊大慶變火鍋無咩運行喎，永保恐被趕粉絲標冷汗＊

　　停牌足足六年嘅大慶乳業（０１００７）今朝終於復牌，全因為獲祖國連鎖火鍋店「小輝哥
火鍋」借殼上市。不過變身火鍋店嘅呢條魚毛，就無咩運行喇，始終停咗賽咁耐，缸友都失去晒
信心，今朝一開波就急不及待掟貨，搞到大慶乳業跌到唔識得停咁，最終要挫近九成，報０﹒２
９銀，係是日最差魚毛。
　　跌到停唔到嘅仲有永保林業（００７２３），被列入除牌第一階段，並收到上市委員
會贊同上市部，對暫停買賣呢條魚毛決定嘅函件。有可能今個月１６號起就要停牌，今日碌低
２５巴仙，報０﹒０２１銀。
　　匯隆（０８０２１）噚日尾市突然間急插三成，今日都仲要再跌過，全日插近５６巴仙，報
３﹒１仙，不過就未知道係咩原因，要等魚毛自己出嚟解釋下喇。周末愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。