《小傳日記》山竹掃香江，魚缸倍滄桑；貿戰加關稅，好友心都碎！

　　《小傳日記》香江噚日（１６日）被「山竹」蹂躪到體無完膚後，侵侵（特朗普）再一盤冷
水撥埋嚟，話最快今日會向神州嘅２０００億美金進口商品徵收１０巴仙關稅，啱啱被十號風球
摧殘完嘅缸友心情即刻跌到落谷底，今朝仲要好似諾曼第登陸戰一樣一窩蜂湧入地鐵車廂趕住去
返工，加上今日係「Ｂｌｕｅ　Ｍｏｎｄａｙ」，仲邊到會有Ｍｏｏｄ入市掃貨呀，仲走夾唔唞
掟貨咩。
　　魚缸今朝低開２５６點，冇幾耐就連二萬七關都守唔住，重磅藍戰士全線插水，企鵝
（００７００）跌幅更係重磅股之冠，魚缸最多唔見咗５２３點，低見２６７６３點，好彩嘅係
，低位有唔少缸友入市撈貨，跌幅逐步收窄，但ＱＱ仍然要跣低近３巴仙，手機設備孖寶又繼續
領跌一眾藍戰士，魚缸最終全日蒸發咗３５３點或超過１巴仙，報２６９３２點，失守１０天線
（２６９７８點）。被颶風突襲完，缸友都冇晒心機，全日成交只有６４４億銀，較上個禮拜五
（１４日）少咗２６巴仙，仲要創埋超過１５個月新低！
　　Ａ場同樣冇運行，滬指埋報２６５１點，唔見咗２９點或超過１巴仙，最低仲潛到去
２６４７點，創２０１４年１１月以嚟新低。
　　藍戰士無一倖免統統插水，ＱＱ最傷，唔見咗超過３巴仙，報３１９﹒２銀。大象
（００００５）算比較硬淨，只係跌咗半巴仙，報６７﹒５５銀。ＡＩＡ（０１２９９）一樣撐
得住，跌近１巴仙，報６４﹒３５銀。生發發（００３８８）跣低超過１巴仙，報２１７﹒８銀
。

＊貿戰又鳴槍人仔又遭殃，錢莊立立亂磚頭未跌完＊

　　神州同花旗國嘅貿易戰再有唔明朗因素，皆因有報道話，侵侵已經指示要推進對神州
２０００億美元商品加徵關稅，雖然直至今日下午都仍未公布，但已經令避險情緒升溫，美元強
勢，人仔兌一美元中間價今朝就大跌１４７點子，報６﹒８５０９終止兩連升。神州錢莊率先受
累，建行（００９３９）唔見近２個巴仙，報６﹒５１銀；工行（０１３９８）無咗１個巴仙，
報５﹒４２銀；農行（０１２８８）同招行（０３９６８）亦唔見差唔多１個巴仙。
　　神州磚頭佬跌到牙痛咁聲，「給你一個五星級的家」嘅碧桂園（０２００７）又無２個巴仙
，報１０﹒７２銀；中海外（００６８８）同萬科（０２２０２）亦無咗２個巴仙，分別報
２３﹒７５銀同２５﹒３銀；四條三恆大（０３３３３）就唔見１個巴仙，報２６﹒４銀。
　　需要注意嘅係，調控未有遏止神州樓價升勢，８月份７０大中城市新建商品住宅價格指數環
比漲幅創兩年高，中央後續調控有加碼風險，即係磚頭佬隨時有暗湧！

＊蘋果滑鐵盧瑞聲要陣亡？數碼通爆上和電亦閃亮＊

　　今年蘋果概念抄唔起，加上被封為「最強蘋果分析師」嘅天風國際分析師郭明錤，發表研究
報告，話孖屐對「唉瘋　ＸＳ」興趣唔大，首周預售情況不似預期，反而消費者對ＸＲ同ＸＳ　
ＭＡＸ就有興趣多啲，一眾手機佬當然再次下滑喇，好似瑞聲（０２０１８）就跌近６巴仙，收
報７７﹒５５銀，仲要係最差嘅藍戰士！
　　主要為「唉瘋」供應前置鏡頭嘅高偉電子（０１４１５）就跣低近３巴仙，報１﹒１５銀。
專幫神州手機佬代工手機外殼嘅比亞迪電子（００２８５）一樣唔見咗３巴仙，報９﹒５２銀，
舜宇（０２３８２）都跌咗超過半成，報９０﹒９５銀。通達（００６９８）就最巴閉，全日坐
火箭升近４巴仙，報１﹒０５銀。
　　本地電訊佬今日十分威風，事關大摩今日吹起「摩笛」，話香港電訊（０６２３８）加價終
止咗行內減價戰，相信同業和電香港同數碼通會跟隨，升和電（００２１５）同數碼通
（００３１５）兩個嘅評級至「增持」，和電「他屐」由３﹒２銀升至３﹒４銀，數碼通就由
９﹒５銀升至１０﹒５銀，和電收報２﹒９６銀，彈起半成；數碼通收報９﹒１４銀，爆上近６
巴仙；香江電訊跳高超過３巴仙，報１０﹒３６銀。

＊颶風襲馬交山竹大咆哮，瑞信踩一腳賭股卻低躍＊

　　颱風「山竹」噚日突襲馬交，馬交懸掛十號風球超過９個鐘，全馬交嘅賭場都要「熄燈」唔
開工。冇生意做，賭收自然受到影響，瑞信報告就話，所有賭場暫停營業３３小時，預計會對馬
交今個月賭收影響８巴仙，但認為颱風對賭場物業損毀影響有限，預料恢復進度會較快。馬交博
彩佬今朝一度全線插水，但午後低位反彈，金沙（０１９２８）收高１個巴仙，報３５﹒６５銀
；美高梅（０２２８２）亦彈起近２個巴仙，報１２﹒７２銀；新濠國際（００２００）揚１個
巴仙，報１６﹒４銀。
　　另一方面，江蘇省上禮拜四召開全省減煤工作專題推進會，要確保今年煤炭消費總量削
１８００萬噸，今日煤炭佬亦全線受壓，龍頭神華（０１０８８）唔見３個巴仙，報１６﹒４４
銀；兗煤（０１１７１）無咗近２個巴仙，報８﹒２２銀；中煤（０１８９８）就無咗近１個巴
仙，報３﹒１３銀。

＊依波路爆升缸友好高興，嘉里今除淨股價依然勁＊

　　本地薑消費佬冠城鐘表（００２５６）以每股作價１﹒８５銀，即係使咗近４億銀，買起依
波路（０１８５６）近六成股權，冠城鐘表同依波路今朝孖住復賽，前者無郁到報１﹒６８銀；
後者今日就坐火箭，全日飛高高，爆升超過２４巴仙，報１﹒７９銀，仲順便喺超過兩年新高
１﹒９７銀插旗。
　　星光文化（０１１５９）以總代價３﹒３億銀轉讓３﹒７億股予國投中聯，佔已發行股本約
５５巴仙，每股作價０﹒８９銀，較上一日收市價３蚊折讓七成咁多，缸友即掟貨散水，股價今
朝復賽後一度唔見咗近１７巴仙，但埋單就回升近半成，報３﹒１４銀。
　　嘉里物流（００６３６）雖然今日除淨，特息連中期息派２１仙，但缸友一於少理照入市炒
返一轉，全日最高見１２﹒７６銀兼創近五年新高，埋單升咗近半成，報１２﹒６銀。
　　時代集團（０１０２３）截至今年六月底止年度賺咗２﹒６億銀，多咗近２２巴仙，不過似
乎唔合缸友們預期，全日仆低近１個巴仙，報２﹒２銀。
　　被喻為「最貴新丁入場費」嘅海底撈（０６８６２）今日中午就截飛，可惜身為佢
Ｂｕｄｄｙ嘅頤海（０１５７９）都仲喺唔受缸友們「十卜」，全日走低超過４個巴仙，報
１７﹒２４銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。