極速報價  |  詳細報價  |  互動圖表  |  成交  |  新聞  |  評論  |  影片  |  相關證券  |  公司資料  |  派息  |  賣空
06088 FIT HON TENG
即時 按盤價 升2.000 +0.060 (+3.093%)
大行報告

14/05/2018 17:12

《小傳日記》侵侵突放生中興,魚缸強勢六連升!

  《小傳日記》花旗國送上好消息!狂人「侵侵」(特朗普)突然失驚無神改變主意,由之前
堅決下令禁制中興(00763),改為話同習大大(習近平)一齊努力,幫助中興做番生意!
中興有救,缸友即時聯想到,貿易戰都有機會告一段落?點都好,有好消息就當然要慶祝一吓。
早排受牽連嘅手機佬舜宇(02382)就嚟個大反擊,軟件佬都發力收復失地!
  而有實力嘅魚毛好似AIA(01299)亦再創新高,喺75蚊山頂位插旗,收市都有逾
2巴仙落袋報74﹒35銀。加上萬眾期待嘅A股「入摩」終於來臨,MSCI明晟今晚凌晨就
會公布A股名單,一班券商佬都有鑊氣。
  連串好消息推動下,五連升嘅香江魚缸就再下一城,今朝(14日)高開376點後,仲最
多行前470點至31592,收市仍有419點進帳報31541,寫下六連升佳績!國指亦
唔執輸,中字輩都跳舞慶祝,漲199點報12544。全日成交1067億銀。

*貿易戰降溫舜宇好開心,瑞聲季績差跌到眼花花*

  神州國務院副總理劉鶴仲未出發去花旗國傾數,但總統侵侵突然轉軚,要商務部快D解封對
中興通訊嘅禁令,仲話中美貿易問題正展開緊良好嘅合作,正同神州習大大一齊努力,等神州嘅
電訊設備商同中興可以快D恢復業務。雖然缸友唔係好明點解侵侵突然間華麗轉身,但點都係一
個好消息,貿易戰降溫,手機設備佬都有得坐順風車,舜宇今朝一出閘就一馬當先升咗超過半成
,之後仲愈戰愈勇,最多彈高近9巴仙,高見155蚊,最後埋單就升咗近8巴仙,報
153﹒5銀,由今朝出賽到完場都一直領先所有藍戰士,勁!
  同屬藍戰士嘅瑞聲(02018)今朝仲跑喺舜宇後面屈居第二,半日埋單都升咗超過4巴
仙,但中午派嘅首季成績表完全令缸友失望,只係賺多咗6巴仙至11﹒26億人仔,差過孖屐
預期,一到下晝就當然被其他藍戰追上前,瑞聲跑包尾之餘,更加最多急插倒跌超過6巴仙,埋
單跣低近半成,報115﹒8銀。
  至於上個禮拜五發盈警嘅丘鈦(01478)話上半年賺少五成後急插超過三成,今日野村
再踩多腳,將「他屐」降到7蚊,評級降到減持,結果同瑞聲一樣被缸友唾棄,全日大插6巴仙
,報6﹒62銀。

*中興有得救摩比最樂透,晶片佬呆滯軟件佬發威*

  侵侵放生中興,有46巴仙嘅收入嚟自中興嘅摩比(00947)今朝一開賽就彈起一成,
但原來一成只係全日最低升幅,之後愈彈愈高,最多升咗超過42巴仙,高見1﹒28銀,最後
埋單就彈起超過32巴仙,報1﹒19銀。
  中興業務嚟緊有望重返正軌,即係話花旗國好大機會會再向中興供應返晶片,神州晶片商變
相冇望成為中興救世主,但似乎對今日晶片佬表現冇乜影響,中芯(00981)升咗超過2巴
仙,報10﹒78銀,華虹半導體(01347)彈起兩巴仙,報18﹒64銀。ASM太平洋
(00522)最巴閉,抽高近半成,報106﹒6銀。
  侵侵轉軚都帶挈神州軟件佬,中軟(00354)最多飆高超過13巴仙,最終升咗逾7巴
仙,報6﹒62銀。擎天(01297)抽高7巴仙,報3﹒41銀。金蝶(00268)都彈
起近6巴仙,報8﹒13銀。
  另一邊廂有好消息,中證監終於獲准寶島鴻海旗下嘅富士康入A場魚缸,下個禮拜四(24
號)就會正式發行19﹒7億股A仔,集資額高達272﹒5億人仔,成為A場巨無霸。消息一
出,鴻海系股價即時坐火箭,早排一直潛水嘅富智康嚟個報復式反彈,最多升咗超過22巴仙,
最終收升19巴仙報1﹒5銀。同樣都頹咗一排嘅鴻騰精密(06088)就抽高近8巴仙,報
3﹒23銀。

*入摩就揭盅券商預先衝,總理訪東瀛廣汽飛上天*

  大家講咗咁耐嘅「入摩」名單,終於會喺今晚凌晨公布喇。一個咁利好A股嘅消息,當然可
以刺激一眾券商齊齊跳起。信証(06030)衝前近6巴仙,報20﹒1銀,係最好表現國貨
佬,勁!街坊嘅表現一d都唔遜色,中國銀河(06881)踢高逾3巴仙,埋單報5﹒2銀。
華泰證券(06886)都彈高2巴仙,報16﹒1銀。
  至於有阿爺支持嘅魚毛,表現都寧舍唔同。國務院總理李克強近排喺東瀛訪問嘅時候,就去
咗參觀位於北海道嘅豐田汽車零部件工廠,身為豐田汽車在華主要合作夥伴,廣汽
(02238)當然Happy喇,升近4巴仙,埋單報14﹒72銀。

*新仔齊彈高捷榮叫聲好,意馬派特息跳起好招積*

  魚缸氣氛好,部分魚毛新仔都借機會彈高。「咖啡王子」捷榮國際(02119)上星期五
(11日)上場,喺上市儀式到話,預計將來嘅派息率唔會少過35巴仙,缸友當然受落喇,今
日上市翌日再飛起16巴仙,報2﹒75銀,高過招親價近39巴仙。同日掛牌嘅精雅印刷
(08391)都衝前近一成巴仙,報0﹒69銀。
  名仕快相(08483)首季虧損增加,不過解釋係因為一次性開支影響,所以都無影響到
缸友嘅心情,決定入貨支持,收市彈起32巴仙,埋單報0﹒9銀。
  意馬國際(00585)今日就勁喇,全因為話配股得嚟嘅部分款項會拎嚟派特別息,每股
有25仙,帶動佢向上飛近29巴仙,報1﹒25銀。請請!

  《編者按》本欄搜羅即日熱門傳聞,惟消息未經證實,《經濟通》亦不保證內容之準確性
       本文只供參考之用,並不構成要約、招攬或邀請、誘使、任何不論種類或形式
       之申述或訂立任何建議及推薦,讀者務請運用個人獨立思考能力自行作出投資
       決定,如因相關建議招致損失,概與《經濟通》、編者及作者無涉。

備註: 即時報價更新時間為 28/03/2024 18:00
  港股即時基本市場行情由香港交易所提供; 香港交易所指定免費發放即時基本市場行情的網站
專業版
HV2
精裝版
SV2
串流版
IQ 登入
強化版
TQ
強化版
MQ

觀落陰:什麼是觀落陰?人人都可參加地府自由行?遊地獄到底係點?

帶你探索全新主頁!輕鬆探索精選資訊!

全新etnet健康網購 賞維他命D3 (價值$108) 齊齊提升免疫力