《小傳日記》等待十九大，好友掃貨快；生發發超正，ＱＱ再破頂！

　　《小傳日記》颱風「卡努」來去匆匆，而今次已經係今年第三次喺周日高掛八號波。風球過
後，今日（１６日）大家都收拾心情返工，但缸外天氣都仲係好唔穩定，時不時就「倒水」咁，
缸友們近排都係遮不離身好Ｄ喇！
　　缸內係另一個世界，簡直陽光普照，熱到不得了；全日成交有１０３３億銀！皆因孖屐傳出
，生發發（００３８８）要求港府削減，甚至係取消股票印花稅。雖說減唔減稅主導權喺政府度
，正如打工仔好想加人工，但主導權喺老闆度。之不過，好友收到消息，就視為出兵進攻３８８
嘅大好良機！港股牛市沖天，一度急漲３１５點高見２８７９２添！
　　到午後生發發ＣＥＯ李小加回應傳聞，大市升勢就回番Ｄ，但都有２１６點落袋收報
２８６９２。但點都好，今個星期三（１８日）就係「十九大」，憧憬阿爺穩維下，好友信心都
唔細，股王ＱＱ（００７００）今日更以３５５﹒６銀歷史高位收市。勁！
　　國指收市就有８３點進帳報１１６００點，總算皆大歡喜。
　
＊減稅不減稅由政府話事，先炒個痛快港所追落後＊
　
　　今日香江「孖屐」傳出，話生發發諗住提議政府減印花稅，跟住都有唔少大行跟風唱好，仲
話如果呢個提議「得咗」，香江魚缸嘅成交仲會大大提升，所以本地薑嘅券商同生發發都有望會
比之前賺多啲。缸友收到風，加上眼見隻３８８可追落後，於是就起勢咁掃入。不過ＣＥＯ李小
加食完飯後回應有關傳聞，仲話呢Ｄ只係孖屐猜測，印花稅係政府重要收入，預料唔會輕易改變
。結果，生發發縮晒水，最終只係升近３巴仙，報２２５﹒６銀，但都係最威藍戰士。香江券商
耀才證券（０１４２８）表現一樣省鏡，升咗近半成，報２﹒７銀；嘅富強金（００２９０）更
一馬當先升咗近８巴仙，報０﹒２１９銀。
　　Ａ場今日一度上返三千四，但可惜又係高處不勝寒，臨尾仲要倒跌１２點，報３３７８。神
州券商自然跟住腳軟，廣發證券（０１７７６）同中信證券（０６０３０）朝早勢頭都算強勁，
升咗超過兩巴仙；但到收市廣發都只係升咗１巴仙左右，報１７﹒８６銀，而中信得返唔夠一巴
仙嘅升幅，報１８﹒０２銀；東方證券（０３９５８）仲慘情，倒跌咗唔夠一巴仙，報８﹒２７
銀。
　
＊曾上三千四Ａ仔收市曳，Ｍｉｎｉ傾合作長汽好氣勢＊
　
　　早排「孖屐」不斷爆料傳出，長汽（０２３３３）要同德國車佬寶馬旗下嘅Ｍｉｎｉ搞合作
，而長汽亦都證實咗呢單嘢唔係「流料」，只不過而家仲傾緊，即係話仲未有實質嘅嘢搞緊。長
汽喺上個禮拜三（１１日）爆升咗超過１４巴仙之後就停賽，今朝復賽似乎都餘威未盡；喺同德
國佬傾緊合作呢單「堅料」帶動下，今朝就即刻爆上近７％，喺超過兩年高位插旗，但之後腳軟
碌返落嚟，埋單倒跌近３巴仙，報１１蚊。
　　雖然今日中汽協話神州四個轆經銷商９月份綜合庫存系數為１﹒２１，環比跌咗１１巴仙，
按年就升咗７巴仙，庫存水平都仲喺警戒線以下，但四個轆今日幾乎全線都冇乜點畀油向前行，
吉利（００１７５）跌咗超過１巴仙，報２６﹒６銀；神州電動車一哥比亞迪（０１２１１）今
日唔係好夠電，跌咗唔夠１巴仙，報７７﹒７５銀。不過，廣汽（０２２３８）就跑贏所有街坊
升咗超過兩巴仙，報１９﹒７２銀。
　
＊售中環中心涉逾四百億？粉絲即搶高長實好有力＊
　
　　神州保險佬平保（０２３１８）就相當醒神喇！全日試過喺６５﹒４５銀高位插旗，仲創埋
上市新高添，埋單計都升咗逾１巴仙，報６４﹒７銀，真係可喜可賀！
　　孖屐有消息傳出，長實集團（０１１１３）將會以大嗱嗱４０２億銀出售位於皇后大道中
９９號嘅中環中心７５巴仙嘅股權，若然呢單Ｄｅａｌ真係屬實，咁就會成為香江歷史以來最高
單價商廈嘅成交紀錄喇，結果全日彈高咗近３巴仙，報６６﹒５銀。
　　５Ｇ股份一哥中興通訊（００７６３）今日都好醒神，事關瑞信升佢「他屐」，由２１﹒８
銀升至２８﹒１銀，評級就維持喺「中性」，結果佢全日吹起咗近４巴仙報３０﹒２５銀。
　　水泥佬中建材（０３３２３）附屬北新建材頭個９個月錄得淨利潤，仲按年升咗成１倍添，
而營收就按年飛升３８巴仙，中建材開心跳起咗逾５巴仙，報５﹒８５銀。
　
＊瑞信升他屐中興跳一跳，十九大前夕光伏開心笑＊
　
　　祖國十九大前夕，孖屐憧憬神州會出台新能源發展同埋環保政策，同時仲話會出台光伏發電
產品增值稅，即徵即退５０巴仙嘅政策，並且從２０１８年底延長到去２０２０年底，從而有助
大大降低光伏成本，刺激需求喇，其中保利協鑫（０３８００）就升咗逾４巴仙，報１﹒２５銀
，盤中高見１﹒２８銀，創逾兩年新高，勁！
　　另外，保利協鑫用咗２億銀入股林達（０１０４１），結果林達應聲彈高咗逾３０巴仙，報
０﹒５８銀，盤中高見０﹒５９銀，仲創咗一年半年新高添！
　　其他光伏佬都相當省鏡，仲圍埋一齊開Ｐａｒｔｙ添。陽光能源（００７５７）跳高咗逾
３２巴仙，報０﹒３５銀；街坊熊貓綠能（００６８６）今年第三季嘅發電量就按年大升
４２﹒９巴仙，結果全日亦都飛起逾６巴仙，報１﹒２銀。請請！
　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。