《小傳日記》貿談未揭盎，人仔好風騷；魚缸升勢好，漲及半年高！

　　《小傳日記》花旗國噚日（１９日）國魚缸假期後首日復市，但表現就唔算太標青，都係上
上落落反覆靠穩。有傳花旗國喺中美貿談入邊，將要求神州保持人仔穩定，成為兩國貿易協議條
款嘅一部分，刺激離岸人仔大漲，兼創兩個星期新高，令到今日（２０日）一班中資佬彈起。
　　魚缸今日高開１７６點報２８４０４重上牛熊線（約２８３０５點），其後最多升３７１點
報２８５９９創半年新高，但中美貿談始終未有實際成果公布，缸友都唔敢買咁多貨，所以魚缸
升幅都略見收窄，最終全日收報２８５１４升２８５點或１巴仙，主板成交１０８６﹒４５億元
增加１２巴仙。國貨收報１１２２９，收升１１２點，同樣升１巴仙。
　　神州魚缸同樣造好，上證綜合指數收２７６１，升５點，成交２０５４億人仔。
　　大隻藍戰士方面，除咗大象（００００５）再受業績拖累股價受壓，其他都有進帳。大象全
日唔見１毫，收報６６﹒０５銀。有傳神州會停新視頻遊戲許可申請，以處理上年積壓嘅申請，
ＱＱ（００７００）聽到網遊審批加快，今日當然開心笑，全日上漲逾１巴仙，收報３４１銀。
ＡＩＡ（０１２９９）自從公布咗會喺神州插旗就順風順水，今日仲見股價新高７６銀，埋單仲
升逾２巴仙報７５﹒７５銀。生發發（００３８８）就再升１巴仙，報２６０銀。祖國移動
（００９４１）升１毫，報８２﹒７銀。

＊藥品又冧價藥股急向下，附屬表現好新濠被捧高＊
　　
　　今日魚缸上漲，不過有一歡喜有人愁，講緊嘅就係堆醫藥佬。噚日神州醫保局就話，今年將
會開展新一輪醫保藥品目錄調整工作，納入更多藥入醫保，同時以談判同以量換價，降低抗癌藥
價格。嘩！缸友聽到當然即走啦，事關上年１７種抗癌藥納入目錄範圍之後，醫保支付標準比零
售價平均降幅已達五成七咁多。中生製藥（０１１７７）今日係最差表現藍戰士，唔見近２巴仙
，報６﹒４１銀；石藥（０１０９３）亦蒸發近１巴仙，報１２﹒８６銀。國藥（０１０９９）
亦跌逾３巴仙，報３３﹒６５銀，係表現最差國貨佬。藥明生物（０２２６９）盈喜，話因為市
場佔有額擴大，所以預計純利可以多賺倍半，刺激股價急漲３巴仙，報６９銀，但阿媽藥明康德
（０２３５９）就唔見６巴仙，報８４﹒８５銀。
　　馬交賭佬方面，新濠國際（００２００）花旗國上市嘅附屬新濠博亞，上季多賺五成七，缸
友聽到齊齊買貨，帶動新濠國際今日急升７巴仙，報１８﹒７６銀；一哥銀娛（０００２７）都
升３巴仙，報５４﹒７銀；美高梅（０２２８２）同澳博（００８８０）齊齊升２巴仙，分別收
報１５﹒６元同８﹒４元；金沙（０１９２８）就漲１巴仙，收報３７﹒５５銀；永利馬交
（０１１２８）升４巴仙，報１９﹒４２銀。

＊黃金價續升壇金好前景，鈷銅產量削資源佬雀躍＊
　
　　「孖屐」對中美貿易談進展期望樂觀，所以美金回軟，不過由於基本面嚟講，環球經濟前景
始終未明朗，所以增加咗對「孖屐」對黃金嘅避險需要。金價由噚日下晝開始就向上走，更加見
過１０個月高，所以今日一班金礦佬跟住升啊！壇金礦業（００６２１）升４巴仙報０﹒０５３
銀；招金礦業（０１８１８）亦漲逾３巴仙，報８﹒８８銀；山東黃金（０１７８７）最高見過
２３銀急升近６巴仙，不過高位無承托不特止，最終仲以全日低位２１﹒９５銀收市，但仍有有
１巴仙進帳。
　　有外媒報道，嘉能可能計劃喺佢剛果最大嘅銅鈷礦之一削減產量，仲會喺加丹加省嘅礦場裁
員約２０００人。消息觸發鈷同銅嘅價格急升，加上神州工廠逐漸復工，上星期神州鉬精礦市場
價格開始走高，喺魚缸嘅金屬資源佬當然被炒起。洛陽鉬業（０３９９３）飆近一成，報
３﹒６９銀；紫金礦業（０２８９９）踢高逾８巴仙，報３﹒４銀；五礦資源（０１２０８）亦
彈一成，報３﹒６５銀。

＊國壽獲唱好內險齊走高，灣區拓商機券商股高飛＊

　　國壽（０２６２８）畀大行唱好，其中瑞信升佢「他屐」由２２﹒５銀上調至２４銀，投資
評級維持「跑贏孖屐」；星展亦將國壽「他屐」由１７銀增至１８銀，投資評級維持「Ｈｏｌｄ
貨」，刺激今日股價升逾４巴仙，收報２０﹒６銀，係表現最好嘅藍戰士，叻！中央噚日公布大
灣區規劃網要，加強各地金融市場互聯互通，加上仔上漲，內險佬今日繼續升勢，太保
（０２６０１）揚３巴仙，報２９﹒５５銀；財險（０２３２８）漲亦２巴仙，報８﹒７２銀。
　　同樣受惠於大灣區規劃嘅仲有一眾中資券商佬啊！因為計劃將擴大神州同香港居民，喺兩地
機構進行跨境投資嘅渠道，亦都可以有更多元化嘅金融產品。今日佢哋全線走高，龍頭大佬中信
証券（０６０３０）、祖國銀河（０６８８１）同海通證券（０６８３７）齊齊抽高近３巴仙，
分別收報１８﹒２２銀、４﹒８４銀同９﹒９４銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。