唔好畀佢停！過去大半個月成個「孖屐」同缸友捱咗咁耐，終於得阿爺體恤民情，公告一聲傾掂數，魚缸全部股份鹹魚返生，各行各業鯉躍龍門，連續兩日炒到興洽洽！就算花旗國鮑叔照加四分一厘息，都無阻中外魚缸集體起哄，恒指強勢收復兩萬一大關。
　　大反彈下內房佬好事成雙，神州財政部負責人就話，相信今年內唔會有擴大房地產稅改革試點城市嘅條件，內房好消息一浪接一浪，party到今日都未開完。而之前跌得最殘嘅民企內房今日最風騷，融創(01918)最多試過勁升超過六成，最終收報報6.25銀，升多過五成九，升幅同總成交額都冠絕內房佬，旗下融服(01516)都緊追其後，升挨近四成七，報5.71銀；碧桂園(02007)升多過兩成八，報5.56銀；碧服(06098)升多過三成，報38.8銀；旭輝(00884)升挨近三成三，報4.44銀。而國企就冷靜些少；中海外(00688)升多過7巴仙，報23.1銀；潤地(01109)升多過8巴仙，報37.6銀。
　　不過呢，雖然民企有咁耐折墮就今日有幾風流，但係party開完，錢都係要還。揹住成身債嘅內房過幾日都要繼續諗計還債，今日升幾廿巴仙都係醉生夢死，前路茫茫呀，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性。本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無涉。

【你點睇？】宏福苑火災獨立調查委員會完成最後一輪聽證會，杜淦堃表示，政府應對宏福苑火災負一定責任，你是否認同？ ► 立即投票