《小傳日記》啱啱過咗個「嚴寒」周末，有唔少市民趁住５９年一遇３﹒１度超低溫，專登
上山睇結霜而被困山上，要由消防員拯救，認真危險！今日幼稚園生同小學生，因為嚴寒唔使返
學。小傳呢？就梗係趁住過去兩日冰冰凍留喺屋企搵周公避寒，唞足精神今日應戰喇！

＊六十年一遇賞霜卻被困，消防夠英勇營救逾百人＊

　　難得上星期五（２２日）花旗魚缸受到油價急升一成帶動，收漲２１０點報１６０９３，上
返萬六關口，氣氛總算有Ｄ好轉。香江都食住上星期五嘅反擊餘威，今朝開市彈高２６０點，之
後仲曾經衝高約４００點至１９４９０添。不過Ａ場仲係無力反彈，埋單升１巴仙都無，搞到恆
指收市又回順番，收升２５９點報１９３４０，國指就只得６８點進帳報８１７３。
　　今日魚缸成交又係配合唔到升市，得嗰７４４億銀左右，比上一個交易日仲少咗約１７巴仙
；睇嚟缸友都係等今個星期美聯儲局議息聲明，同埋星期四（２８日）期指結算先出手激戰吧。

＊花旗高高收香江食住上，美本周議息大家要盯實＊

　　花旗國東岸受巨大雪暴侵襲，結果布蘭特期油抽高一成重上３０蚊美金，油價大升再推高三
桶油股價，中海油（００８８３）急升近５巴仙，收報７﹒２７銀，係最叻藍戰士。中石油
（００８５７）同中石代（００３８６）齊齊踢高約３巴仙，各報４﹒６４銀同４﹒２９銀。
　　油服股亦同樣造好，中海油服（０２８８３）有近２巴仙進帳。安東油服（０３３３７）同
百勤油服（０２１７８）叻Ｄ，踢高３至４巴仙左右，各報０﹒６７銀同０﹒５２銀。
　　油價反彈，孖屐憧憬燃氣公司唔使減價爭生意，結果燃氣股亦都跟緊步伐向前衝，中國燃氣
（００３８４）、新奧能源（０２６８８）、中裕燃氣（０３６３３）同埋昆侖能源
（００１３５）升幅介乎３巴仙至５巴仙。

＊ＱＱ做領軍街坊有榮焉，麥記來踐踏潤啤逆市插＊

　　藍戰士ＱＱ（００７００）上星期五飛返上十天線之後，今日比賓架大班們睇好繼續向上爆
，當畀吓面大家，踢高４巴仙，收報１４４﹒３銀。野村同ＤＢＳ都一致睇好，前者更加上調公
司目標價近一成二，派足定心丸。街坊金山軟件（０３８８８）都被帶挈，一齊飛起４巴仙，報
１５﹒７８銀。ＩＧＧ（００７９９）就有６巴仙落袋，收報３﹒４８銀。
　　華潤啤酒（００２９１）比麥格理大降目標價，評級為「跑輸大市」，跌低６巴仙，報
１２﹒３銀。天氣咁凍，啤酒好似唔多啱喎！而唔飲啤酒可以考慮玩下電腦就算，下星期三就放
榜嘅聯想（００９９２）好似有啲諗頭，今日榮登最佳藍戰士，股價飛起近６巴仙，收報
６﹒９６銀。

＊奶股有動作踢高來慶祝，好孩子績優確係好孩子＊

　　雅士利（０１２３０）諗住向澳優（０１７１７）出售ＢＢ奶粉品牌「施恩」，代價仲未傾
掂數。雅士利今日踼高逾４巴仙，收報１﹒６８銀。澳優就有近２巴仙落袋。街坊合生元
（０１１１２）仲犀利，斬穫近１４巴仙，收報１９﹒７４銀。至於龍頭嘅蒙牛（０２３１９）
都有約１巴仙進帳。
　　啲ＢＢ股表現都唔錯，好孩子（０１０８６）料舊年全年多賺成２﹒４倍，主要受惠毛利率
改善等。股價今日走高６巴仙，收報３﹒３４銀。未來又受惠「二孩政策」，睇嚟好運陸續有嚟
！彩星現具（００８６９）、恆安國際（０１０４４）同兒童護理（０１２５９）都分別有１至
３巴仙收穫，總算叫做有交代。

＊桑德終復賽大瀉追跌幅？智傲有異樣飆高再飆高＊

　　桑德（００９６７）早前計錯數，涉及成２０億銀。雖然涉事人前首席財務官已被炒魷，不
過摩通都話投資者已對桑德無晒信心，大削目標價至４銀，股價支持主要來自主席回購股份。桑
德今日復賽被質低逾六成，收報２﹒６５銀，除反映缸友對佢無信心，亦要補番停賽期間大市嘅
跌幅。
　　中國天然氣（００９３１）上周五飆升近３７巴仙停賽，原來獲控股股東簡志堅揼咗近千六
萬銀增持。今日復賽再度扯高近７巴仙，收報０﹒２１９銀。
　　近排一班半新仔好活躍，好似智傲（０８２８２）上周五飆高逾六成後，今日再度斬穫近
１５巴仙，收報７﹒３銀，較配股價１﹒２５銀足足高咗近５倍。巨匠（０１４５９）亦有逾
１７巴仙落袋。不過，宇天（０８２３０）今日表現就未如理想，被掟低近２２巴仙。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。

【母親節限時優惠】 送價值$288維柏健30天逆轉肌齡(膠原蛋白+生物素) ► 火速行動