《小傳日記》近排魚缸乜都跌，不過隻蔚來（０９８６６）唔知係咪已經太殘，就算第三季
蝕多咗錢都唔使捱沽，反而調轉頭升。可能業績實在太醜樣，近兩日蔚來都不斷公布利好消息托
價，先係宣布已經收購江淮汽車（滬：６００４１８）部分生產線，準備「獨立造車」。之後又
傳蔚來準備分拆電池製造業務單獨上市，最快年底前上市。
　　《路透》引述消息人士報道，蔚來電池生產業務由前蘋果同松下嘅高級電池工程師領導，計
劃分拆嘅業務仲包括規劃中嘅電池工廠、測試設備同部分專利。所以蔚來都知自己衰乜，就係衰
在收入未夠填補開支，所以如今就用各種方法去開源節流。
　　不過臨年尾先咁多花臣，好明顯就係想趁年尾截數前撳返低個開支，所以先講到最快年底前
就要分拆電池業務上市。不過ＢＹＤ（０１２１１）就出名做電池，但係蔚來嘅電池業務真係甚
少聽見，上市之後對孖屐有幾大吸引力都好令人懷疑。
　　呢次分拆搞得咁急，足以見到蔚來係極度等錢用。創辦人兼董事長李斌喺業績會提到，對於
三年內唔能夠提升公司財務表現，或者對毛利提升無貢獻嘅項目都會ｃｕｔ　ｂｕｄｇｅｔ甚至
推遲，例如三年內自製電池都唔能夠提升毛利率，就會轉為只係研發電芯，委託人哋生產來降低
成本。
　　近期神州鋰價跌到當局終於要出手干預，的確低鋰價對於電池生產確係有利，但係如今已經
出手限制，之後就有可能回升。同時，孖屐對於蔚來自產電池嘅需求仲未見到，就算係生產都唔
知銷量係點，獨立上市之後嘅認購反應真係難講。所以，蔚來分拆只係再話畀孖屐聽公司極度等
錢使，今日股價升唔多亦證明咗孖屐嘅睇法，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。

《說說心理話》與你分享遭遇欺凌該如何應對　教你兩個方法輕易彈走負面情緒► 即睇