《笑傲缸湖》唔講唔覺，原來今日已經係立秋，但出面熱到喊，體溫感分分鐘去到３０幾度
；另一邊廂，今日牛隻屠房真係好忙，因為突然間一車車牛送入去「受靶」，真係阿彌陀佛囉。

　　今日個市點解咁刺激？是咁的，原本侵侵（特朗普））迫字節跳動係呢個幾月內賣走
ＴｉｋＴｏｋ，原本微軟已經睇上，點知半路殺出個程咬金，ＱＱ（００７００）話自己都有興
趣收購；侵侵有理無理，簽個行政命令禁止ＱＱ同字節跳動進行交易，即係話最後逃生門都閘埋
你。

　　不單止咁，侵侵仲出手，封殺ＱＱ喺美國嘅微信業務，仲迫一堆喺美國上市嘅中概股退市。
之後就好睇囉，魚缸今日血流成河，ＱＱ更曾大挫一成！「啪．啪．啪」我聽到一隻隻騰訊牛跌
低，一隻、兩隻、三隻、仲有一隻，今日中午埋單就啪死咗９９隻騰訊牛。

　　可想而知，大戶屠牛屠得幾凶狠，５００銀收回價以上嘅牛仔一隻不留，因為今日ＱＱ股股
價剛好跌落去４９９﹒４銀就掉頭，收市報５２７﹒５，跌５％。啊！鬼馬啊你！另外，恆指牛
有１１２都打埋靶，今日想博反彈嗰班真係眼淚在心裡留。

　　盈盈我近期都係加入淡軍為主，今日靠熊仔執少少咁。所以話，炒股嘅嘢幾時都係順勢炒，
等你班好友開心咁耐，立秋之日正係我打邊爐之時，等我去街市買兩斤肥牛賀賀佢！
《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇】的士業「放蛇」舉報Uber，政府應否將網約車合法化？你是否支持該類自行「放蛇」行為？► 立即投票