加入最愛專欄  收藏文章 

06/05/2024

隱瞞婚外情兩年,為何突然想坦白?有種認錯,不一定是誠心,而是機心

    坦白,有些人認為是人與人間相處的態度,有些人則會視為認對問題的權宜策略。

 

  「我打算主動將我出軌嘅事講畀老婆知,希望佢會原諒我。」他帶著猶疑語氣問我:「我唔知應該講幾多畀佢知?講得少,佢一定不停追問,但講得太多,我擔心佢未必接受得到,唔會原諒我。」

 

  「我應該點同佢講,結果會好啲?」他想向太太坦白,卻又不知怎樣拿捏坦白的技巧。但坦白,從來都不應該是技巧。

 

  「有啲事情,當傷害已經造成,卻想出現有好嘅結果,可能係一個唔太現實嘅想法。」我對他說。

 

  兩年前,他跟一位女士發展婚外情,對方是他以前公司的同事。經過了兩年對太太的隱瞞,他近來開始想向太太認錯,卻又擔心不被原諒,會失去婚姻。

 

  當開始了婚外情,大部分出軌者會選擇隱瞞,當覺得隱瞞得了,會繼續背地維持偷食。他「成功」隱瞞了兩年,為何此刻要自揭瘡疤?

 

  「你隱瞞出軌已經兩年,咩嘢原因令你突然想向太太表白認錯?」我好奇的問他。

 

  「我都知出軌唔啱,所以唔想繼續落去。」他見我沒有回應,有點靦腆的繼續說:「近來我同嗰個女士嘅關係有啲緊張,佢開始問我同佢有冇將來?又問我有冇打算離婚?佢想我同老婆交待清楚。」

 

  據說,那位女士也是已婚,早前決定向丈夫提出離婚。

 

  「我唔想離婚,但我擔心滿足唔到佢要求,佢會控制唔到自己,搵我老婆攤牌。」他終於說出他的擔心與虛怯。

 

  以往欺騙太太,是想同時維持兩段關係,現在向太太認錯,是想保住一段關係。坦白,是擔心隱藏不了,於是以「坦白從寬」的策略自爆,希望「投降輸一半」。

 

  「太太受嘅傷,唔會因為事情係由你講出嚟而減少,所以,你嘅自爆與佢嘅原諒,唔一定有直接因果關係。」我對他說。

 

  我希望他可以想通,此刻的坦白是因為有感以往對感情的蔑視和不尊重而希望自己改變,否則,坦白只是另一種方式的隱瞞。

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet健康網購 | 6月限定優惠【送:明目藍莓精華36:1】乙樽► 火速行動

Luxury Watch Trends for 2024

You May Also Like
#兩性關係 #感情 #婚姻 #愛情 #出軌 #Love Philosophy
More on Sex & Love
Popular Tags
即時報價
全文搜索
Search
最近搜看
    • 港股
    • A股
大國博弈
貨幣攻略
More
Share