港獨風潮由「振中不振英」的689帶起，至今兩年，香港「各界」樂此不疲，人人喊打，全國港澳研究會副會長陳佐洱豪言壯語，要令港獨成為「過街老鼠」，共黨的語言很少見到如此具體，通常都要用黨八股左敲右擊一番，「我們要使這個毒呀，消失於空氣之中，要抓緊時機，依法辦事，用法律、用法規，緊抓國家十八大從嚴治黨從嚴治國的硬命令，停止絕少數人分裂國家的圖謀」。用到「過街老鼠」，證明共黨明白要用香港人聽明白的語言，洗大家的腦，要承勝追擊，令港人喺習核心嘅淫威底下貼貼服服，成效似乎唔錯。

 

　　值得留意嘅係，大英帝國的末代港督彭定康喺呢個時候，煞有介事訪港，同預期中佢可能會為民主自決運動背書唔同，佢反而係厲聲嚴詞批評港獨，認為港獨不可能發生，睇嚟這個千古罪人終於懂得懺悔了！昔日被狠批會令香港車毀人亡，今日同中國企埋同一陣線，中英合流共抗港獨，周融的反港獨簽名，有十三億中國人的加持，現在又隨時有英國六千萬人民的錦上添花，難怪張委員長要視之為上賓。這個一帶一路反港獨運動，浩浩盪盪，順之者昌，逆之者亡，世界大和諧！

 

　　但我說啊，「同一種」立場，兩種不同演繹，彭督還是有彭督的高章，而且，係高下立見。

 

　　事情要講返去今年5月，人大委員長張德江應邀嚟香港出席一帶一路高峰論壇，當時打港獨力度開始盛行，張德江大軍壓境，仿如要嚟香港傳聖旨一樣，仲記得當時小弟嘅文章《反張德江保安級別》，形容警方當時好似就係當呀委員長本人就係恐怖分子一樣看待，所到之處封路、封車、封空氣，嚴陣以待。

 

　　喺呢種氛圍之下，委員長選擇喺臨走前會見幾百名香港「各界」人士，絕大部分都係忠貞不二嘅保皇愛國分子，同佢哋講話「港獨最終結果是全香港人埋單」，咁要用邊張信用卡嚟埋單呢？委員長就無答到啦，可能呢個就係天機。整個行程，同委員長有直接對話、而又同佢最對著幹嘅人，就係嗰四名泛民立法會議員，而佢哋都係唔會搞港獨嘅。所以，委員長啲反港獨宣言，除咗講完自己爽，等人吶喊助威之外，並冇真正同最重要嘅「持份者」辯駁。

 

　　彭定康今次嚟到香港，無嚴密嘅保安監控，起碼所到之處無封路先，首先唔擾民。其次，就係無偏聽。佢喺香港出席最重要嘅場合，就係香港大學嘅論壇，以「香港管治 禮崩樂壞」為題，事前已開宗明義會掂到今年香港最熱門嘅港獨問題，而場內亦歡迎香港各大專院校嘅學生報名參與，同彭定康，以及原本應約出席，但係後來因為遭到「正義朋友」勸退嘅曾鈺成，同場對話。

 

　　大陸最愛就係偏聽，凡事講面子，唔怕你反我枱，最怕你當住全世界嘅面，喺我面前反我枱，咩叫溝通？就係公我贏、字你輸嘅情況下我就會溝通啦。彭定康出席港大論壇，就正正摑咗張德江一大巴。

 

　　佢喺論壇上同學生辯論港獨係咪可行，當中包括代表人物梁天琦。彭定康嘗試用佢所睇到，現實政治之下嘅考量，話俾大家聽港獨不可行，係dead wrong，係自欺欺人，不如花返啲時間精力，去爭取民主、重建道德高地方面，能否真正說服想搞港獨嘅人？未必得，但已經係其次，因為佢肯重視呢班後生仔，同佢哋傾談，北京班大爺，再過幾多世都唔會學得識。

 

　　點解？大家睇吓同一時間，張德江喺北京見緊嘅就係一班喺香港無政治能量嘅嘍囉，我連名都唔想quote。

 

　　以後大家就有新歇後語用啦，彭定康一句，勝過張德江千萬句。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》與你分享應對性騷擾三部曲，減輕心理陰影創傷、提升自我肯定方法 ► 即睇