人生在世，總有夢想想要追逐，但社會會不停告訴我們，現實有諸多限制，夢想唔可以當飯食㗎！你要不選擇當個世界仔，先犧牲青春，投入殘酷的現實世界，代價是變成另一個人，與初衷的夢漸行漸遠；要不默默耕耘，做很多徒勞無功的事，代價是歷盡艱辛，達成夢想只剩幾人。   

 

 

　　橫掃獎項的電影《La La Land》（港譯：《星聲夢裡人》）就係講緊呢樣嘢。雖然電影是用老掉牙的追夢故事包裝，被不少評論人認為係過譽，但我認為，電影高層次在於後段，男女主角掙扎於夢想同現實之間嘅情節。被觸動而落淚嘅人都明白，兩者之間取捨有多困難，最後都要喺一念之間做抉擇，導出截然不同嘅人生。   

 

　　講咗兩段好玄嘅嘢，其實擺返落香港，我哋又何嘗唔係夢裏人？ 

 

　　薯片叔叔搞眾籌，營造拍住上氣氛，夢裏人一呼百應，唔使四日，就超過兩萬人捐款，合共籌款額突破400萬。曾俊華追夢，除咗追逐特首之位，仲係夢想可以挾持住高民望感化中央，希望做一個香港人、中央都接受嘅特首。我城嘅一眾夢裏人對一個「正正常常」嘅人餓得太耐，見到薯片講人話、吹和風非常受落，選擇從民主夢中醒來，向現實稍作妥協，民主300+都有唔少人矢志要推薯片入閘，成就佢嘅夢想。 

 

　　但曾俊華都要面對現實，高民望伴隨政治任務，點都要沾手，「會以白紙草案形案形式，盡力推動23條立法」，此話一出，唔少人猛然諗起自己仲有個民主夢，發現薯片夢同其餘幾個建制夢一樣，只係包裝、氣味唔同咗，高呼被騙，要求回水，但更多人覺得，低頭妥協，可能得到更多。 

 

　　換個角度，長毛參選，無非係為咗延續雨傘夢，用公民提名呢個夢想，揭示現實嘅荒謬，甚至爭取成為泛民嘅叫價，同時，亦係為咗令泛民毋需協助任何建制人士上位，毋忘初衷。但係，佢唔能夠自圓其說，解釋自己同以被批評係「民主罪人」嘅特首參選人梁家傑、何俊仁有咩根本分別，從而，佢唔能夠令上面提及、向現實做咗妥協嘅人明白「曾、林鄭、葉劉」根本都係同質嘅人。

 

　　最諷刺嘅係，而家港大popvote嘅公民提名系統顯示，曾俊華暫時攞到近7000人提名，長毛只及佢嘅一半，約4000人，當長毛被問到，如果曾俊華達到公民提名嘅門檻，即約38000人提名，佢會否提名曾俊華，佢斬釘截鐵話唔會，但又答唔到點解唔守佢哋自己設定嘅遊戲規則。而喺呢個時間出嚟，選委會選舉完咗兩個月、提名期下星期開始，錯失最佳時機，而且營造咗逼令民主派提名佢嘅效果，既離開咗追夢人嘅道德高地，又未能喺現實中搏取支持，想突破困局，但最終作繭自縛。 

 

　　從眾籌，去到公民提名，唔少夢裏人都有有如此掙扎，皆因薯片同長毛喺有意無意之間，畀大家一個錯覺，以為呢場選舉，我哋大家都有份。而殘酷嘅現實就會追趕你了，張德江南下，下詔「聖旨」，話政治局「唯一支持」嘅特首參選人就係林鄭，既然如此，我哋講咩夢想、向現實有幾多妥協，都係徒然。講到尾，我哋日夜期盼可以有一個真正屬於香港人嘅特首選舉，但北大人不停話我哋聽，現實，並唔到大家有份，最重要嗰個話事人，喺北京。

 

　　堅持追夢定係甘於現實，本質上不應有對錯，正如觀眾睇完《La La Land》，對男女主角各自嘅抉擇都會好主觀地有分別。但香港人嘅絕望真相，似乎就係做任何一個抉擇，都改變唔到任何事情，我哋係《選舉夢裡人》嘅主角，但同時，我哋都只係一個觀眾。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

etnet榮獲HKEX Awards 2023 「最佳表現證券數據供應商」大獎► 了解詳情