臨別秋波，梁政協副主席兼特首為香港上演幕幕好戲，將香港政壇作為佢嘅表演舞台，實在令人拍案驚奇，霸氣外露，甚有國家最高領導嘅風範，梁粉肯定睇到心心眼。

 

　　梁振英先後以回答記者提問、發律師信、發公開信、寫網誌等形式，全天侯全方位咁針對專業會計師、立法會議員梁繼昌，氣勢逼人，垂範世界各地涉嫌捲入弊案嘅被調查人，原來可以咁樣去處理調查自己嘅人架！哪怕嗰個調查委員會本身根本並無任何政治效力？

 

　　但其實大家都唔明白佢，大家只係諗到自己，因為大家都係香港人。

 

　　梁振英點解咁緊張？個人推測，係因為梁振英嘅語言，同我哋有啲唔同。喺香港，一個人被調查，係可以有兩種結果，一種就係無罪，一種就係有罪，大家都明架，咁有嘢咪查囉係咪？

 

　　但係，喺偉大嘅中國大陸，一個人「受查」，就接近百分之九十九，係等於有罪，一被查，就已經輸咗，就代表執法機關已經完全「掌握證據」，可以落charge，只係等被查者「雙規」，規定時間、規定地點現身束手就擒。梁振英有國家領導人嘅覺悟，點可以畀自己「受查」呢件事發生？呢個就正正解釋點解梁振英咁緊張，一定要打落水狗咁樣打梁繼昌，因為梁繼昌喺3月1號就指出，梁振英正受廉署調查，同時佢亦稱梁振英係外國稅局嘅調查對象。

 

　　梁振英就話，呢兩年嚟外國稅局都冇人查過佢，所以質疑梁繼昌講嘢嘅事實根據而入稟控告梁繼昌誹謗。而佢翻箱倒籠咁stalk梁繼昌facebook，就「發現」梁繼昌當時就向稅局舉報UGL事件，嚴詞斥責梁繼昌2年前身為舉報人，2年後又堅持要成為調查成員之一，係自編自導自演。就以此2個為主要原因，話梁繼昌「必須」離開調查委員會。

 

　　嘩，好惡呀，好驚驚呀。但係，呢度係香港喎梁生，醒吓先。香港一向都係行無罪推定，要查過先知你有冇問題，用同樣嘅標準，梁振英因為UGL呢件事被調查，唔等於梁振英一定有罪；梁繼昌因為自己嘅言詞被控誹謗，都並非戴罪之身，只係被動地涉及一單官司。同埋點解舉報人就唔可以成為調查人員？如果稅局有做調查，同立法會而家嘅調查範圍係完全唔相干，攞到嘅文件、傳召嘅證人都不盡相同，調查權力更加係蚊比同牛比，點解可以相提並論？一日未經法庭審訊，梁繼昌仍然係清白之身，哪怕佢之前講過啲咩，一日法庭未判，佢都有權喺委員會，用佢嘅會計知識同知道嘅資訊做調查工作。

 

　　單計呢點，已經同梁先生服務開嘅中國大陸完全係兩回事。

 

　　梁振英一方尚有一個武器，就係話梁繼昌未入委員會前已經有定見，唔公道，好笑。每人都總有定見，政治立場，如果係咁，係咪全部調查都唔需要成立？因為冇任何一個人可以做到完全中立、冇定見咁樣去參與調查。剩係講有份加入委員會嘅建制派，大家可以一齊睇吓佢哋當中部分人過去如何評價UGL事件？

 

　　例如調查委員會主席謝偉俊，曾經喺去年一次特首答問大會，批評梁振英以法例做擋箭牌，唔回答有關廉政公署人事任命嘅問題，形容梁振英剛愎自用、用人唯親云云，咁係咪對梁振英有定見，唔公道呢？

 

　　又例如，喺2014年10月，UGL事件剛爆出時，今次立法會調查UGL委員會成員之一嘅黃國健，當時就同記者講，認為梁振英嘅合約係當選前簽訂，睇唔到有嚴重利益衝突，佢又認為呢類合約喺商界常見，係咪交代，係梁振英嘅個人選擇，黃國健呢個睇法又算唔算係帶住定見去做調查？佢嘅睇法係咪會令整個調查方向有影響？民主派支持者當然會覺得有問題，但都冇辦法架，因為查得，就要睇證據。

 

　　根本以上呢啲講嚟都多餘。呢度係香港，調查完，有嘢咪有嘢，冇嘢咪你到時再話人誹謗你囉，呢啲一路以嚟大家都認可嘅常識，就喺呢五年，被一位反常識嘅領導人，弄得是非黑白不再分明。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

etnet榮獲HKEX Awards 2023 「最佳表現證券數據供應商」大獎► 了解詳情