香港人工時世界第一，係令好多人「驕傲」嘅一項紀錄，因為長工時顯示香港人勤力，願意為咗工作付出一切，努力貢獻呢個小城市嘅經濟增長，常言道「獅子山精神」，最重要嘅一部分，從來都唔係咩同舟共濟、萬家燈火呀，而係任勞任怨、多勞多得，所以，老一輩人成日話「我後生嗰時返幾多幾多份工養家，你哋班後生唔捱得呀」、「最緊要唔好怕蝕底，多嘢做咪多嘢做囉，畀機會你學嘢呀」、「咩work-life balance丫？你唔work，就唔慌冇life添呀！」係呀係呀，冇錯冇錯，我哋班後生真係唔捱得，剩係返一份工，呢份工「只係」霸佔咗我哋一日11、12個鐘，我哋竟然唔考慮返多份，真係好唔長進。

 

　　但係近年又真係愈嚟愈多個案，打工仔因為一份牛工，而出現種種健康問題，甚至乎，有人因為長期每日工作15、16小時而「過勞死」，而且發生得愈嚟愈頻密，是故近年都慢慢好少聽見老一輩夠膽提出以上論調。

 

　　2012年上任前就好關注勞工問題嘅梁特首，信誓旦旦要喺任內解決兩大困擾勞工界嘅議題──標準工時、強積金對沖，因此攞埋工聯會全票支持（雖然我相信即使佢唔承諾解決呢兩樣嘢，工聯會都係會投畀佢）。佢花咗5年時間，終於諗到一個辦法，可以塞住打工仔把口，又可以捍衛上述嘅「獅子山精神」，就係訂立合約工時啦，而且係限定$11000月薪以下嘅勞工先可以享有，幾矜貴呀！簡直係立法一小步，老闆權益....同埋（六分之一）勞工權益一大步啊！

 

　　梁特嘅政綱，又多一項可以劃個剔剔啦，你班搞事分子又唔可以話佢未找數啦！還掂找數有好多種方法，無論係真找數，定係部分找數，甚至乎係用大富翁啲假錢取代真金白銀嚟找數，都係找數。就睇你哋班打工仔自己要唔要袋住先啦。講講吓，就發現所謂「找數」，原來就好似騙徒咁，手法層出不窮。

 

　　合約工時，好明顯就係用大富翁啲銀紙當找數。而家仲要係縮水版嘅銀紙添，連大富翁都唔受你玩。

 

　　當初，勞工界爭取標準工時，原意係由政府訂立一個時數，如果打工仔返多過呢個時數，老闆就要畀補水，一般係基本薪金嘅1.5至2倍，係為咗確保打工仔有合理工時，而且真正多勞多得。喺國際上，一般係訂立喺每星期40-45小時。而香港最新數據，係每星期50小時。

 

　　至於合約工時，就係冇既定標準，由勞資雙方按（僱主）需要，喺合約寫明工時以及OT條件，所以，合約工時嘅全稱，其實就係「『合約』訂明你要返咁長『工時』喎你嘈咩呢」，變相係合理法現時嘅長工時「文化」，畀僱主好大空間去用法律剝削僱員權益，並唔係政府所預期嘅邁進一小步，反而係將香港僱員拉向孤島。因為僱主好明顯係會有好多方法，可以令自己進一步壓縮成本，令僱員要返更長工時。呢種找數方式，兩個字──「涼薄」。

 

　　咁睇嚟，政府將「受惠」人數限制喺工資$11000以下嘅勞工，係為咗其他「未能受惠」嘅幾百萬打工仔著想喎，簡直係德政啦。不過，大家都明，到時候你一係揀加少少人工但要返長工時冇補水，一係就選擇繼續低薪，但係工時同以前冇分別甚至更長。

 

　　梁特呢架「找數號」，5年嚟一往無前，橫衝直撞，無甚政績，但搞出一個個社會裂痕，但佢本人就擺出一副得意洋洋嘅樣，寫住「我做咗嘢架啦」幾隻大字。無論係早年房屋政策方面嘅盲搶地插針樓，撕裂香港嘅政改，或者係比標準工時更難解決嘅強積金對沖，都表現出政治上好勇鬥狠嘅性格，當對方唔願意讓步，佢企得更加前更加強硬，嘗試用權力壓倒對方，擺出一副只有此路通行，唔行罷就嘅態度。難怪佢可以升職，坐入北京嗰個虛無嘅殿堂，因為，佢就只有玩政治係最叻，其他實務嘢根本無能為力。

 

　　佈下完一個個地雷，梁特仲有兩星期就升職梳乎啦，努力擺脫2.0形象嘅林鄭真係多得你唔少，睇吓佢如何解決呢堆惡果啦。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

etnet榮獲HKEX Awards 2023 「最佳表現證券數據供應商」大獎► 了解詳情