「煩死人，我成日俾人『偷睇』。」朋友C怒氣沖沖，以為發生甚麼天地不容的事。

 

　　「唔係呀嘛！？」我突然也激動起來。

 

　　「係呀！啲同事成日『偷睇』我個芒。」啤……

 

　　在辦公室環境內，電腦螢幕（包括內容）是公司資產，你的芒即是我的芒，沒甚麼好收埋，亦沒有甚麼可以收埋；稍作掩飾，即屬「心虛有嘢唔見得光」。

 

　　「佢要睇咪由佢睇飽佢囉，都係公事啲悶嘢嚟之嘛，除非……」我沒好氣地說。

 

　　「咁我有時skype下、facebook下，都人之常情，呢啲我唔想俾佢地睇到囉！」C還是史前化石般點極都唔化。

 

　　「都唔知你嬲咩，你咪邀請埋佢地一齊睇。」我隨即分享了一個血淋淋的故事。話說︰

 

　　A同事與B同事沒甚麼交情，只是三尖八角的兩個人被叫做「辦公室」的困獸鬥安排坐一前一後。B比A幸運一點，坐在後面位置。B每次出出入入，都強迫症發作式地目不轉睛盯住A的電腦螢幕。不知道是出於好奇、是非，還是純粹找個焦點或甚麼。

 

　　A不是省油的燈，無可能沒有意識到被「偷睇」。有一次，B如常經過並喪「睇」，A一個轉身，配合女神笑容說︰「嚟丫嚟丫，你睇下~」然後純熟地開出 facebook個人頁面，指著一張貓相說︰「呢隻係我家貓咪，叫『老細』。佢好曳曳架，成日都要打打，你鍾意貓定狗架？」然後又開出一張團拍照說︰「呢個係我媽、爸、家姐、細佬同阿妹，呢個就三姨、六叔、八姑奶……」

 

　　B拔足想逃，又被A逮住，繼續︰「丫，俾張大學畢業相你睇丫~ 呢個係我最好嘅大學同學，之前佢結婚都搵我做姊妹。丫，開佢啲結婚相畀你睇丫……」

 

　　「不如下次先丫，我要準備陣間開會啲嘢……」A一臉失望，十足一個被老公冷落的怨婦，最終「免為其難」放了B走。

 

　　「之後B就無再望A個芒？」C追問。

 

　　「唔係。『偷睇』嘢係心癮，邊有咁易戒得甩！相同嘅情節重複咗兩三次，到第四次，B恨不得自己著咗隱形戰衣，每次經過都貓步閃開。」

 

　　我笑笑︰「你要唔要試下？」

 

　　原文刊載於ctgoodjobs.hk

 

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

etnet健康網購 | 6月限定優惠【送：明目藍莓精華36:1】乙樽► 火速行動