2014-10-01

別以人地把刀插自己

　　「德少，你真係無唔Like邊個同事？」初生之犢不畏虎，新丁W竟膽敢來挑我機。小弟固然不是省油的燈，不至於被新仔殺個措手不及，但內心不是不心虛的……

　　我不帶感情地擠出一個公式笑容，和氣說︰「Like邊個、唔Like意邊個，工作都係咁做。反正唔係要過人世，有咩所謂鍾意唔鍾意。」

　　實不相瞞，我曾經對所有叫做「同事」的族群恨之入骨，沒法子，年少輕狂。初出茅廬，內心充斥著一團火——怒火，阻我者死。根據當時的邏輯，但凡「人」均屬阻我者。無他，對上的一定多番阻撓，無不忌才；在下的，又個個「人頭豬腦」，甩甩漏漏，「與其靠你地，不如自己做埋無咁嬲」。面對眼前的W，我像與過去的自己打個照面。

　　「嗨，不可一世嘅你，咁樣將會死得好慘。」如果1x、2x年前我懂得這樣對自己說，大概可以碰少幾口釘。

　　「我係咪終有一日會變成你地咁？」W心口掛個勇字，讓我更相信他決心劈炮。

　　而我亦抱著大無畏的精神，兵行險著︰「咁你要死，唔通我唔畀你死咩。」

　　W以「我就唔信咁樣會死囉」的眼神看著我。我反而於心不忍，說︰「阿仔，你覺得喺辦公室同人開拖好型咩？想型仲有好多方法，以自己嘅前途嚟較飛，實在相當低手。」

　　W見我們Tune對了Channel，立即變成被馴養的狐狸，入世未深的底牌從奸笑中露晒餡。

　　對付「唔順超」的人，有6條路可行︰

　　1、直接而禮貌地告訴對方︰「你咁咁咁做，令我好唔舒服。」（適用於無心傷害者）

　　2、一於當對方透明（此方式對惡意侵犯著尤其有效）

　　3、跟對方做朋友（知己知彼，多個朋友好過多個敵人）

　　4、以牙還牙（只限於高手，敬請好自為之）

　　5、向上司匯報（匯報內容務必以公務為重。須知道，在老闆或上司眼中，下屬的個人感受無足輕重）

　　6、逃之夭夭（即使被對方迫到「走投無路」，還有「劈炮」這最後一著）