真的假不了，假的信不了，信的救不了。求職搵工世界，跟娛樂圈一樣——蜚短流長。姨媽姑爹咁講；朋友a朋友b咁講；貓貓豬豬又咁講......股市可升可跌，搵工傳聞亦有流有堅。求職並沒有一定的方程式，求職者與其盲目亂咁信，愈聽愈無所適從，倒不如細心分析，按個人節奏行事。

 

　　以下為坊間5大瘋傳搵工謠言，信定唔信……實屬個人選擇。

 

　　傳聞1：「總之，CV裏面keywords愈多，中標率就愈高。」

 

　　堅定流？關鍵字固然重要，但求職者亦要「啃得落」。一味吹自己識xxx、yyy，而沒有真材實料和實際證明，亦屬廢話。求職者應闡述自己如何將相關技能及經驗運用到工作上，再強調有關結果及成效，並轉化為個人成就。

 

　　傳聞2：「踏入數碼年代，電腦掃瞄系統將陸續取代HR睇CV。」

 

　　堅定流？實不相瞞，的確愈來愈多公司採用掃瞄軟件及文字雲技術（Word CLOUD TECHNOLOGY ）等，協助篩選求職CV。然而，這亦不代表可以當HR無到，HR長做長有呢。求職者還是老老實實寫份既俾電腦睇，亦啱人睇的履歷吧。

 

　　傳聞3：「send email 搵工個subject一定要夠搶眼，寫少10個8個關鍵字咪好蝕！」

 

　　堅定流？4個字︰過猶不及。關鍵字亂寫一通，CV懵盛盛被直送垃圾筒都唔知咩事。垃圾郵件常用伏字如「please read 」、「free」、「offer」等，更避之則吉。

 

　　傳聞4：「要封求職email突出啲，識寫一定寫ALL-CAPS；無番5678個感嘆號，點夠誠意？」

 

　　堅定流？採用全部大寫（ALL-CAPS）功能，不但會削弱電郵及CV的可讀性和吸引力，更是無禮貌之舉。另，濫用感嘆號，是很大機會被垃圾郵件過濾器過濾掉的。

 

　　傳聞5：「有圖有真相，難得畀我遇到份筍工， 梗係要『晒冷』cap圖畀晒HR睇啦。」

 

　　堅定流？為減低CV被送往垃圾郵筒的風險，求職email請避免嵌入圖像或超連結；附件亦不宜使用壓縮檔格式如.zip、.tar等。建議求職者還是「照單執藥」，講重點吧。

 

Source: ctgoodjobs.hk

• 

《說說心理話》與你分享應對性騷擾三部曲，減輕心理陰影創傷、提升自我肯定方法 ► 即睇