近來Fresh Grad話題不斷，先有人大鬧辦公室，再有新人為寵物失蹤「射波」唔返工。一日在職場，一日都有新鮮事。可能Fresh Grad就是原罪，又或者係「老Seafood」處處針對，但可以肯定的是︰Fresh Grad是非常容易受傷的。

 

受傷位1︰呆坐

 

　　返學有適應期，返工亦如是。初入職場由低做起，影印、入Data、聯絡等看似簡單的工作，其實是為日常辦公打好基本步。常言道︰「肯學肯捱」總有出頭天，但如果頭幾日返工都叫你坐吓先，咁借問幾時先學滿師？

 

　　應對法︰請人返來當然是做野，增加團隊工作成效。從學校到職場，Fresh Grad吸收力甚至比有經驗的求職者高，建議不妨多作指導，多讓他們發揮創意，可能會有意想不到的結果。

 

受傷位2︰盪失路

 

　　廁所係邊？Pantry係邊？我想搵同事A，應該點去？原來公司有兩邊入口？返工最忌盪失路，人有三急或想斟水時搵唔到路事少，被人以為「蛇王」周圍hea事大。

 

　　應對法︰不要以為Tour guide好小學雞，新入職頭一兩日最好帶Fresh Grad見識下，參觀公司各個部門。若閣下忙到甩碌，至少都「Pin」定個Floor plan丫~

 

受傷位3︰食自己

 

　　「其實毒男一個更開心，Seafood免講。」做事雖要公私分明，但面對同事愛理不理的態度，心情難免非常矛盾，即使食餐飯都足以令Fresh Grad十五十六。

 

　　應對法︰返學有「開Sem飯」，返工都可有「開工飯」。返新工頭兩日人生路不熟，主動啲同Fresh Grad食餐晏仔，咪當畀個機會大家互相了解囉！是咪？

 

受傷位4︰被黑面

 

　　身經百戰的打工仔可能已視黑面如無物，但作為Fresh Grad，如果一開始就不斷被老細捉入房捽數訓示，又或者同事經常八姨太咁款，都咪話唔驚。

 

　　應對法︰無人一出世就曉職場生存之道。作為同事，對住Fresh Grad宜盡量將每個工作步驟詳細說明；作為老細，最好先花時間觀察新人表現，再給予適當提點。

 

受傷位5︰三九唔識七

 

　　「你唔識就搵Kiki啦！」「究竟邊個叫Kiki？」無錯，遇到唔識、唔明的事就要問，但如果不熟悉公司內的同事及其他部門運作，分分鐘出事都唔G咩事。

 

　　應對法︰未必要介紹成幢樓的人物關係八卦圖，但最少要讓Fresh Grad同事知道自己Team人以及將會合作的同事，免得樣衰衰將Kiki認錯做Meme。

 

　　講到尾，那年那日，我們也是從Fresh Grad活過來的。

 

Source: ctgoodjobs.hk

• 

etnet榮獲第六屆國際信息商會議「最佳信息商」白金獎► 了解詳情