「開得會未？」

 

　　「得！即到！」

 

幾時開會都係錯？

　　其實不論邊一個時間開會，都是浪費時間。早上開，員工沒有足夠時間作準備，最後大家一齊入房廢噏，你有你講，我有我「左耳入，右耳出」，整個會頓變成一個「0成效」的吹水大會。

 

　　下晝開，員工自然有一整個早上做足準備。但請不要忘記，準備一大堆開會文件，或花額外時間猜度「主子」心意，都須拋低日常工作，變成進度落後。

 

　　於是你又會問︰「咁又唔得，咁又唔得？」所以話，幾時開會都係錯。

 

成日開會，為咗咩？

 

　　日叫夜叫「開會」，你會問其實有咩原因值得一大班人（疑似）令公司發展停滯不前，放低手頭上工作係間房開會？如果為開例會，報告自己的工作進度，共同解決手頭上Project衍生的問題就份屬正常，此舉為日後的工作事務鋪路，有助提升效率。

 

　　但如果開完會唔夠一日又開，你會發現除咗報告今朝早餐食咗咩以外，就已經無話可說。純粹係集體被老細發現大家有返工咁大把，但老細就從未發現開會成本特高（雖然薯仔的人工依然低微）。

 

同老細開會DOs & DON'Ts

 

　　要同老細開高效會議，除打醒廿四分精神，仲有以下幾點要注意︰

 

DOs

 

1/ 事前寫好Checklist

　　每次開會前都列出報告的事項，可按日子、事件的緩急輕重排列。同時應準備好供同事參考的文件及數據等，以免老細覺得你「東一句、西一句」。

 

2/ 有嗰句講嗰句

　　遇上出錯、做漏嘢等情況，理應對老細有嗰句講嗰句，不單是「坦白從寬」，更要表現自己勇於承擔，願意改過（大家都係想做好件事啫）。

 

3/ 賽後檢討

　　無論開會時老細畀「Like」定「Dislike」你，都要自己做好跟進工作，開完會唔等於放咗工（雖然放咗工都唔等於放晒工），方向正確就Keep住做，有錯就要諗計改進。

 

DON'Ts

 

4/ 玩電話

　　唔好以為係常識就個個都識，轉個頭同事A就響電話、同事B就掃Mon、同事C就準備Unlock自己部「玫瑰金」。除非有突發事或有客急Call，否則，稍一分心就會忽略其他人在會上說明的細節。

 

5/ hea答

　　「你個Project跟成點？」「幾好丫，無乜特別。」幾好即係點？個Status去到邊？無他的，你不斷hea答，最後換來老細「無限捽」。下場，有眼睇的。

 

6/ 做獨家村

　　「開會」顧名思義為一班人的會面，既不是你的個人演說騷，更不是「暗角毒L環節」。因此會前盡量與會同事商討流程，以免重覆報告；會上亦要聆聽同事及老細的睇法，唔好講完就算。

 

　　開會，為辦公室的不明文化。至於呢個文化幾時結束，咁就要問吓你老闆。

 

Source: ctgoodjobs.hk

• 

《說說心理話》與你分享被性騷擾解決辦法，大量真實個案，唔同場所如何提防及應對？► 即睇