「捉小精靈就咁落力，搵工又唔見你咁神心？！」偉大母親們最新嘅口頭襌可能係「少少煩，唔多趣」，不過又錯唔晒喎！捉精靈同搵工呢兩回事，的確唔使同大纜都可以扯得埋。嗱！以下6個小秘技，參唔參得透就要睇閣下嘅道行喇！

 

1/ 先配對，後出戰

 

　　打道館用屬性剋制精靈是常識吧！斷唔會用噴火龍打水箭龜，然後大叫「典解輸嘅？典解嘅？」

 

　　搵工一樣，求職者應根據自己嘅學歷、經驗去搵適合嘅工種，就好似醫科生搵醫療業嘅工，而非自己唔擅長嘅會計lol。

 

　　唔好話小編唔教你：做到館主即按「Shop」右上角個盾，10個金幣（Pokecoins）同500個Stardust就袋袋平安。留意番，每21個鐘先可以拎一次啊。

 

2/ 做足準備先出手

 

　　進化小精靈會獲得大量Exp，配上Lucky Egg嘅雙倍Exp效果，升呢自然事半功倍。此外，訓練員除咗要開Lucky Egg，亦要預先儲存大量進化所需嘅糖果，以達致最大Exp。

 

　　打機都要做咁多預備工夫，你唔係諗住見工唔使呀嘛？面試前足資料搜集，就算落場畀面試官挑機，一樣可以應付自如。

 

　　唔好話小編收收埋埋：蛋蛋進化椰樹獸是特別多Exp的（好似係）。

 

3/ 唔好齋睇表面

 

　　大部分人會以CP值判斷小精靈嘅去留，一字記之曰：膚淺。Max CP值係以小精靈嘅完美度（IV）去判斷，完美度愈高，小精靈嘅Max CP值就愈高。

 

　　同樣道理，判斷一份工究竟做唔做得過，除咗睇份糧之外仲要將假期、福利花紅、晉升機會、學習機會、興趣等一併列入考慮範圍，價位唔到，亦有其他「揸拿」。

 

　　唔好話小編唔教你睇IV：網上有好多App同網頁幫你計，由於成日都畀人ban，所以小編都唔敢喺到隨便開名，問Google神吧。

 

4/ 擴大範圍

 

　　大部分人都喺自己屋企同工作地區捉小精靈，然後成日呻淨喺得公廁蝠捉。眼紅其他訓練員有啟暴龍、卡比獸，但就從來無諗過人地花咗幾多個晚上，去過多少個唔熟悉嘅公園集訓。

 

　　留意番，遊戲目的係要訓練員出走comfort zone，先可以捉齊所有精靈；搵工亦須要離開自己嘅「鵪鶉zone」。建議先強化可轉移技能，繼而嘗試喺唔同行業搵合適自己嘅工作。

 

　　唔好話小編唔講邊到有好嘢捉：香港區－維園、貝沙灣；九龍區：摩士公園、荔枝角公園；新界區：天水圍公園、屯門公園。

 

5/ 包裝自己

 

　　唔少訓練員都唔捨得用Lure Module同Incense，又唔去計劃幾時用，就算畀你見到Sightings有超夢夢，都引唔到佢埋身啦。

 

　　正如搵工都要喺CV落啲吸引HR嘅關鍵字，如果唔係就連「你返屋企等消息」呢句都無機會聽到。

 

　　唔好話小編唔教精你：搵日約埋三五知己，食飽飯帶埋幾罐「鬼佬涼荼」去大型公園一齊開Lure Module同Incense，一路吹水，一路mon住有咩捉。

 

6/ 唔主動出撃，都至少隨時準備好

 

　　永遠唔會知神寵幾時喺你身邊出現，所以先要成日開住個App免得自己走漏眼。

 

　　一樣啦，下一份筍工幾時出現，who knows？打工仔可以做嘅就係定期更新CV，當機會嚟嘅時候，你就可以大叫一聲「飛雲，我嚟喇！」。

 

　　唔好話小編唔提你：出街記住帶齊外置叉電器、叉電線（經常遇到有尿袋無線嘅訓練員）、紅色cap帽一頂，有助提高捉小精靈機率（好似係）。

 

Source: ctgoodjobs.hk

• 

【母親節限時優惠】 送價值$288維柏健30天逆轉肌齡(膠原蛋白+生物素) ► 火速行動