第五屆立法會仲有幾個禮拜就正式換屆，新一屆立法會會期第一個會議係10月12日，當日最矚目嘅除咗睇下一班港獨自決派點樣宣誓就職之外，當然係為未來四年選一位議員，做三權分立其中一隻角嘅頭目，即係立法會主席。

　　現屆立法會主席曾鈺成（佢仲係現屆，10月先換屆），過去八年主持立法會，我諗話佢表現出色絕不為過；起碼佢能夠做到泛民服佢嘅裁決，八年來雖然拉布成風，但曾鈺成的確係立下主席應該有嘅風度同典範。

　　新一屆70個議員之中，要搵個有返曾主席咁上下嘅人選真係難，傳得最熱嘅就係經民聯梁君彥，仲話全部建制都支持佢。梁君彥主持會議係有能力，但係佢同泛民幾乎係零溝通，之前都只係透過內會前任副主席湯家驊同泛民傾，珍盈認為佢做呢個三煞位唔多適合。

　　另外，亦有傳泛民支持九東直選嘅謝偉俊，一來貪佢係直選身份，作任何決定點都要考慮整體民意，二來謝向來講說話都唔算極左，間唔中都發揮下「曳仔」本色，而最重要係佢法律底好，做主席事半功倍。不過優點都係缺點，由於佢係「野馬型」，難以完全控制，聽聞西環對呢位「契仔」做主席唔多放心，更重要係佢有泛民支持，呢個已經係原罪。

　　建制派有40席，爭主席當然有主動權，但今屆各建制黨派嘅關係其實係更微妙。自由黨一向曳曳，今屆選完之後田少田北俊已經率先向新民黨發炮，質疑佢地新界東容海恩點解啲錢「咁好使」，意有所指咁話新民黨選舉經費條數好難計。喺選主席之上，自由黨嘅4席根本唔應該計入建制派。扣咗之後都有36票，夠晒半數啦，但仲有一個黨有恒數改為變數，呢個就係工聯會。

　　今屆選舉，工聯會同民建聯之爭可以話係白熱化；雖然兩大建制黨表面把口唔會話唔妥大家，但係珍盈聽聞，工聯會下面對民記好大反應。另外喺新界東選區，由功能轉直選嘅鄧家彪就好似一個孤兒仔咁，西環寧願捧個論壇毫無表現嘅容海恩，都唔撐鄧，亦都令到工聯會同西環之間生咗骨刺。

　　工聯會有五席，佢地唔投畀梁君彥都唔係話無藉口，因為梁始終係老闆級，加上經民聯反對標準工時、反對取消強積金對沖立場鮮明，工聯會唔揀佢係天經地義。工聯會五票黐埋去泛民同自由黨的話，足以扭轉成個形勢，所以工聯會先係誰是主席嘅關鍵。

　　今屆立法會無咗曾主席將失色不少，但此際爭主席仍然係咁精彩。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

etnet榮獲HKEX Awards 2023 「最佳表現證券數據供應商」大獎► 了解詳情