美國經濟未全面重啟，但股市就行得好快，納指喺上星期仲創過歷史高位添。喺呢個時候，啱啱慶祝過９０歲大壽嘅國際金融大鱷索羅斯（George Soros）就出嚟講兩句，佢警告而家個市好危險，風險程度係自二戰以來最嚴峻。點解佢會咁講嘅呢？

 

(Shutterstock圖片)

美元疲弱，聯儲放水導致股市有泡沫

 

(Shutterstock圖片)

　　索羅斯開宗明義咁講話美聯儲積極放水，美元疲弱之餘亦催生流動性，間接令到美股陷入泡沫：

　　「現時由聯儲局放水所引致嘅泡沫，我就唔會再玩啦！而家個市喺咁升，主要因為槓桿更多財政刺激策略同埋侵侵宣布疫苗在１１月前問世消息。現時是自二戰以來他人生中最嚴重的危機－－個市正處於革命性時刻，正常情況下無法想象的事，不但變得可能且實際上已經發生。」

　　其實唔少人都講過，聯儲局放鴿同埋接近零利率，可能係最後一招，如果連呢招都無用，美國經濟係點真係難以想象。

索羅斯：特朗普是騙子！

 

(Shutterstock圖片)

　　侵侵（特朗普）都成日都被人詬病，連索羅斯都講埋一份，直接話佢係騙子：

　　「佢只係一個有自信嘅騙子，呢個人好危險，佢破壞美國民主制度，但相信只係短期現象，希望１１月大選後結束。」
　　

　　索羅斯咁講，意味住佢預測呢次大選有機會執位，唔通拜登真係有機會？不過索羅斯都講明，侵侵會無所不用其極咁保住個總統位置，大家要小心小心！

黑石集團都出聲，講明股市就到頂

 

(Shutterstock圖片)

　　除咗索羅斯之外，另外一個大集團黑石都擔心，其中私人財富管理部門副主席韋恩都咁講：

　　「其實我都睇跌市，其中標普500指數接近歷史高位，已充分反映咗利好因素，投資者應該買黃金對沖美元下跌風險。」

　　雖然佢無索羅斯睇到咁淡，不過佢都提出目前美國經濟係由財政政策撐起，離復甦仲有一段距離；而美股呢期嘅反彈都係由科技股同增長股主導，部分估值已經反映未來兩年盈利，即係話已經到晒頂！

 

撰文：李皆穎

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

etnet榮獲HKEX Awards 2023 「最佳表現證券數據供應商」大獎► 了解詳情