上個禮拜我哋都講過吓關於美國總統候選人、民主黨嘅拜登同佢個仔亨特嘅花生料，估唔到放完個重陽假返嚟，亨特嘅疑似醜聞就越爆越多，唔通侵侵（特朗普）真係生命力頑強，有機會連任？

 

(Shutterstock圖片) 

 

GTV班農有份，獨家公開亨特疑似性愛吸毒片

 

係網站上有多個關於疑似亨特嘅性愛影片或圖片流出（圖片來源:GTV）

 

　　流亡美國嘅中國商人郭文貴同白宮前首席策略師班農，係今年4月時候成立一間公司「GTV Media Group」，剛剛好上個禮拜六（24號），係GTV網站獨家公開聲稱係亨特疑似吸毒以及同幾名女子嘅性愛影片及截圖；儘管主流社交媒體都封殺呢段真假難辨影片，但GTV點擊率仍直逼千萬，似乎唔少人都鐘意食花生。

　　呢次「電郵門」事件真係越搞越大，甚至有人挖到原來亨特曾經同佢阿嫂哈莉（Hallie Olivere Biden）發生過不倫戀，而佢阿哥，博・拜登（Beau Biden）係2015年過身，最後亨特搞到連自己結婚20年嘅老婆凱瑟琳（Kathleen Buhle）離婚收場，只能講一句：「貴圈真亂」。

 

亨特在烏克蘭搵錢，普京表示：不違法

 

(Shutterstock圖片) 

 

　　早前已經有講過，亨特部電腦流出有關於佢係烏克蘭搵錢嘅證據，「戰鬥民族」之首－普京接受傳媒訪問時後指出，了解到亨特係烏克蘭最少持有一間公司，而且好明顯賺取可觀金錢，但認為不違法，而且同莫斯科無咩關係；被問到有傳拜登從俄羅斯收到巨款，普京就拒絕評論啦。

 

　　咁又係，侵侵都曾經同純官（鄭家純）合作過生意，雖然最後搞到對薄公堂，不過有錢搵而且合法就得啦，生意人邊會理咁多政治嘢呢？

 

網民收到風，狂係Google搵可唔可以改選票

 

(Shutterstock圖片) 

 

　　亨特疑似性醜聞一出，無疑係對拜登選情造成最大傷害，而美國大選１１月３日正式舉行，但有逾5000萬選民因為疫情關係而選擇提前投票，不過據了解，係Google搜尋器顯示，有關於「我可唔可以改投票選擇？」（Can I Change My Vote?）嘅搜尋量突然激增，反映有唔少選民因為亨特「電郵門」而「轉軚」。

 

　　目前美國有逾5000萬人提早投票，人數幾乎係超越上屆大選兩倍。但做人嘅嘢邊到有後悔藥食或水晶球睇呢？所以到底邊個勝出大選，唔到最後一分鐘都唔好咁老定！

撰文：李皆穎

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

etnet榮獲HKEX Awards 2023 「最佳表現證券數據供應商」大獎► 了解詳情