睇戲都睇得多，職場上個個爾虞我詐，真係「你不背叛我，我梗背叛你，我想確定每日扯住上司的衫尾～」（陳小春Mode) 不過身經百戰的各位扮工仔早已傷痕纍纍，變成「鐵布衫」刀槍不入。無他嘅，比同事擺上枱十常八九架啦，唔影響份工嘅，咪食隻死貓忍下囉，鬼叫自己技不如人。之但係早兩日，公司竟然發生咗件史前未發生過嘅事，就係男同事集體排斥另一位男同事，仲發展到「出口術」單單打打添！究竟乜事令到男人都發火？又係食花生嘅時候！ 

 

 

　　「乜事呀？好少見Carson出聲串人喎！」 

 

　　「Taylor跣咗佢一穫！」 

 

　　「上次Carson比人跣完都好豁達架！今次乜事先？」 

 

　　「今次係講緊成個月通宵嘅心血比人搶咗去呀！」男同事A七情上面地講乜事？點解Carson被跣，會令到成班男同事都起義？再問落去真相立即解開！原來Carson並非係職場上被跣，而係在Game入面畀人背叛！ 

 

 

　　話說有一期男同事間興起咗隻叫「DIVISION」嘅Game，玩家可以一齊射殺其他唔識嘅玩家，而被殺嘅玩家就會跌哂佢贏番嚟或執番嚟嘅裝備。不過，如果復活後趕番去跌裝備地點，而裝備又冇畀人執咗，玩家可以執番原本屬於自己嘅野。一晚，大家約埋通宵殺敵之際，男同事們遇上另一班勢均力敵的玩家，雖然最終都打贏對方，但戰役中Carson光榮死去。本身同事們都會企係Carson的裝備附近，等佢番嚟拎番，但就係呢個時候，Taylor執咗Carson的裝備……據講Carson開聲向Taylor討回裝備，Taylor都視若無睹。最終，賤招觸發大家的神經，導致群雄起義，齊齊唔同賤Taylor組Group打機，甚至係現實職場上對賤Taylor說話單單打打。 

 

　　呢件事證明咗，男人，可以為咗份糧忍辱負重，比人鬧兩句當歌仔咁聽。但係，打機呢家野就就萬萬都不能忍！除咗當時人，其他男同事仲會無啦啦因為打機之事，產生同理心及正義感，連平時「多一事不如少一事」的辦公室守則都唔理，直接挑戰搞事者！都啱嘅，打份工做生做死，賺賺埋埋都係入高層袋，自己就左傾右傾先出得雞碎咁多Bonus；打機就唔同，打得幾辛苦都好，贏番嚟嘅嘢都係用係自己身上。你話辛苦多日打返嚟嘅嘢輸咗畀人，都話冇嘢好講。如今竟然畀自己人偷咗？真係Game入面殺佢100次都不能平息心中怒火，唯有齊齊係現實生活排斥佢！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

etnet榮獲HKEX Awards 2023 「最佳表現證券數據供應商」大獎► 了解詳情