事隔3日，許志安同黃心穎單嘢真係洗哂腦，無論電視、電話、電腦、收音機定報紙，統統都比佢兩個偷食嘅事洗晒版。姣婆遇着脂粉客，兩位另一半有幾慘就無謂再討論。反而，今日想特別多謝「安心事件」嘅兩位主角偷食。我從來未試過咁支持一對「咁討厭、咁嘔心、冇靈魂得嚟又壞咗」嘅男女去偷食。

　　大家記唔記得安心偷食事件發酵嘅時序：16日中午短片流出，晚上7點許志安召開記者招待會交代事件，同日各品牌嘅社交媒體爭相出post抽水，Sammi Facebook封面轉黑相；17日馬明現身電視城向觀眾做「半」獨家訪問，再有黃心穎IG正式回應事件。

　　雖然成件花生事件相當吸引，但因為事發時於辦公時間內，真正奴隸就算好想食花生，都只會一粒起兩粒止，就趕住返回坐位為老闆賺錢。只有真正冇野做，或者卸膊高手先可以係office hour緊貼偷食事件。每次有新抽水post一出，佢地總係可以以奇快速度分享俾辦公室同事恥笑，你話佢唔係無時無刻mon住交媒體，都冇人信喇！

　　另外，7點就可以將許志安嘅記招send出group分享，一係你就可以6點準時收工，7點零塞車咁返到屋企睇直播；一係你就係公司瀨死唔走睇記招。簡單一句，啫係冇野做喇！7點我仲係公司搏殺緊趕收工啊，緊係收工最緊要，邊個得閒理你許志安啊！之於成件事最令我心涼嘅，就係17日下午馬明嘅直播。一聲號令，各位冇野做嘅打工仔聚集哂係卸膊王電腦四周，七嘴八舌齊齊為馬明嘅發表講感想。各位踴躍嘅參與Draw左唔少人嘅attention，亦因為偷食事件，令公司有野做及冇野做嘅人無所遁形。

　　各位team head有見及此，終於做返件人做嘅事。就係將當日所有對偷食事件特別關注嘅各位同事，逐一派工作。由team head親手分配嘅工作，你卸得到就話你叻！不過，充心好多謝許志安同黃心穎呢兩個所謂公眾人物偷食，令到一班推哂D野比我地做，自己冇野做嘅八婆浦頭，俾機會team head知道邊啲人先係真正做野嘅人，還反個公道俾我地。所以，花生可以食，收埋枱底或手機入面慢慢食咪算囉，你永遠唔知公司有幾多對眼望住你，幾時執行「即時死亡制」。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

etnet榮獲HKEX Awards 2023 「最佳表現證券數據供應商」大獎► 了解詳情