收藏文章 

2017-06-29

彭麗媛林鄭梁太三女爭艷品味高下立見 梁太「龍蝦」變「綠葉」

  以往國家領導人出巡,企喺隔離的第一夫人永遠都係最吸引人目光,著咩、戴咩、髮型係咩大家都會評頭品足一番。中國有習夫人彭麗媛做時尚指標大家應該冇咩異議,至於香港那位梁特夫人梁唐青儀則喜愛艷紅,佢件紅衫一出真係誰與爭鋒呀!之不過,品味果方面喇喎……咳!咳!你懂的。

 

牡丹雖好都要「綠葉」扶持

 

  今日習大大攜同夫人彭麗媛訪港,焦點當然就唔會係梁太啦,如果佢著上最愛的紅色豈非喧賓奪主?仲會同大紅地毯個色「黐底」,影相時幾核突呀!正所謂「牡丹雖好,都要綠葉扶持」,所以梁太今日接機時,決定著返條綠色嘅裙,襯托習夫人呢朵牡丹,而且同紅地毯成對比色,真係幾遠都見到佢啦!

 

  習夫人今日全日都一襲素色套裝,剪裁合身,望上去大方得體,低調用色中亦充滿細節,設計師都大讚佢今日呢身裝束從容清新,不過就少咁啲以往著開嘅中國特色。Jenny就認為唔係咩大問題啫,靚先係最緊要呀嘛!

 

朝早接機,「牡丹雖好,都要綠葉扶持」

素色套裝剪裁合身,望上去大方得體

 

三女爭艷品味高下立見

 

  講返梁太嘅「綠葉裝」,Jenny「好不爭氣地笑了」,之後問咗幾個設計師,大家有說不出的評語,最厚道嗰個就話「比較……特別咁囉」。Jenny就佩服梁太可以喺咁熱天時,著企領嘅黑色長袖褸喺停機坪行來行去,唔知以為冬天提早到咗添。可能,梁太最後都熱到頂唔順喇,下晝陪習夫人探訪幼稚園嗰陣,都係換返件橙色立體繡花上衣配黑色及膝裙,佢果然都係捨棄唔到艷色衣服!但一拍埋習夫人旁邊,品味真係高下立見。

 

 下晝探幼稚園,梁太件橙色立體繡花上衣......

 

  另外,林鄭今日衣著可說不過不失,一貫著旗袍出場,佢深明場合地位主次,接機時花樣旗袍外搭一件粉紅薄外套,唔會太浮誇又保持到喜慶感。下晝同習大大一齊去佢有份主理嘅西九文化區時,就換上搶眼嘅桃紅色旗袍,但依舊外披粉紅薄外套,成功將原本張狂嘅桃紅變得低調一啲,唔會搶咗習大大風頭,又可以喺一眾黑麻麻嘅西裝友當中顯得搶眼,唔使再好似朝早接機嗰時咁,淹沒人海當中。

 

  到咗夜晚禮賓府個宴會,天啊!梁太一身裝束只能以驚嚇形容,Jenny已經無力再吐槽落去,「時裝災難」真當之無愧,大家望望下圖就知道!

 

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新節目《說說心理話》原生家庭對成長有咩影響?改善溝通有計可施?► 即睇

更多言歸政傳文章
你可能感興趣
#襯搭 #OL打扮 #明星穿搭 #時裝熱話 #彭麗媛 #林鄭月娥 #梁唐青儀 #時裝災難
編輯推介
即時報價
全文搜索
Search
最近搜看
雙幣交易
聚焦兩會2024
More
Share