為咗迎接遼寧艦到港，Jenny不少行家今日都攀山涉水，甚至覺都唔瞓就係為咗影低佢進入香港水域嗰一刻！前幾日喺軍營外派門票，大批市民冒住雨都要通宵排隊拎飛，拎唔到飛個伯伯仲大鬧人「唔愛國」誇張咗啲噃！明嘅，話晒都係中國第一艘航空母艦，大家梗係想睇吓佢嘅真身啦！而呢首中國「第一」航空母艦，佢嘅出身其實係有段故，親生娘親並唔係中國，大家又知唔知呢？

 

 

登艦參觀一票難求 記者都冇例外

 

　　遼寧艦參觀門票一票難求，咪以為記者可以上去採訪，Sorry！係冇架！即使各大傳媒都係只能靠駐軍發方嘅統一資料、照片等。換言之Jenny都冇份去，既然有啲時間，就一於喺呢到向同小妹一樣冇得親身去睇嘅朋友，介紹吓遼寧艦啦。

 

 

　　遼寧艦全名係「遼寧號航空母艦」，相信大家都同Jenny有同一個疑問，點解要叫「遼寧號」？點解唔叫「中國號」、「北京號」、「解放號」，甚至係網友力推嘅「毛澤東號」呢？其實個名係國務院決定嘅，因為艘船係喺國內重工業基地，遼寧省大連市改裝建成。話說回來，「北京號」、「毛澤東號」呢啲名真係都有人提議過，Jenny就覺得叫返「遼寧號」好好多喇，唔會鋒芒太露之餘又可以畀人知道佢係喺邊度「第二次出世」，咁咪幾好，唔好搞太多嘢喇！

 

 

前身蘇聯航母 中國翻新再造夠環保

 

　　各位看官可能會問，點解Jenny話遼寧艦係「第二次出世」呢？是咁的，遼寧號本身唔係Made in China㗎，原本係蘇聯海軍庫茲涅佐夫元帥級航空母艦嘅二號艦（個名真係又長又繞口），屬於蘇聯第三代航空母艦。喺1988年下水服役，但係大家知喇，蘇聯1991年解咗體，咁艘航空母艦變咗擺喺度唔知有咩用，梗係賣咗佢換錢最實際啦！結果中國就喺拍賣會入面，買咗返嚟自己改裝來個大翻新，實行循環再用，唔好浪費，冇幾耐成為咗今日大家見到嘅遼寧號喇！近年潮興Up-cycle，Jenny真係不得不讚吓中央原來係咁多年前就站在環保嘅尖端！

 

　　記者冇得上「遼寧號」，只可以上旁邊幾艘附屬艦參觀，原來一班議員就幸運得多，尤其是建制派議員極之急不及待咁想一睹遼寧艦嘅風采，有啲仲話都唔知去睇遼寧艦好定留喺立法會開財委會好。最後「元秋」Ann姐蔣麗芸就話，等開完財委會，大家就會即刻衝去睇遼寧艦喎！咁咪好囉，咪唔使主席擔心唔夠人開會又要加會啦！

 

 

5大地點睇「全相」

 

　　既然近看無飛係冇可能，Jenny就順便教埋大家如果想遠觀遼寧號可以去邊啦！遼寧號而家停泊喺大嶼山以東、交椅洲以北的一帶海域。所以首選一定係青衣西南面青衣路一帶，近日行過大家離遠都會見到傳媒又好，發燒友又好，個個都帶備「長短火」擺好陣勢影靚相。

 

　　另外，馬灣大排咀碼頭、環球貿易廣場高層、迪士尼樂園碼頭及海濱長廊同埋坪洲手指山頂都可以睇到遼寧號「全相」㗎！呢兩日放假，有興趣就去睇睇都無妨！

 

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

全新節目《說說心理話》青少年不可以戀愛！？真實個案講述驚心動魄經歷► 即睇