特首林鄭月娥當選冇耐已經明言今年嘅《施政報告》會回歸舊制10月出，從呢方面來講，佢絕對係勤力嘅！對比起前朝政府，CY喺10月先開始見啲政黨咋！林鄭想擺脫CY陰影嘅強烈程度，已經到咗連民建聯都冇面畀喇！

 

經民聯今朝見完林鄭就即刻開咗個記者會交代，佢地主席盧偉國係咁強調經民聯係林鄭第一個搵嘅政黨。

 

唔見民記先？真係估你唔到

　　立法會剛剛就公布咗2017至2018新年度會議議程，林鄭會喺10月11日發表佢任內第！一！份！《施政報告》，亦會照慣例第二日去立法會個答問大會，畀一班議員質詢下。不過，今次冇咗「長毛」可能會悶少少了！

 

　　既然10月就要出報告，得返三個月唔夠嘅時間，林鄭梗係要抓緊時間去見唔同嘅政黨啦！正如樓下專欄「立會透視鏡」嘅Tina咁講，時間咁緊逼，大家都心知肚明係做吓門面功夫「諮詢」吓。事實上，見邊個重要性唔大，反而見邊個先，大家就可以慢慢解讀喇！

 

　　燈、燈、燈、鄧！經民聯竟然爆冷跑出，成為林鄭第！一！個！見嘅政黨！林鄭今朝就見咗佢哋先，傍晚先至見埋民建聯。咦？個次序係唔係調轉咗呢？Jenny同一眾行家都以為，林鄭會一如以往啲特首咁，見咗民記先到經民聯，話晒民記一直以嚟都係立法會第一大黨，唔係唔畀面呀嘛？點知林鄭今次真係估你唔到！

CY留低「蘇州屎」經民聯都變臉

　　率先見林鄭梗係好威威啦！經民聯今朝見完林鄭就即刻開咗個記者會交代，佢哋主席盧偉國係咁強調經民聯係林鄭第一個搵嘅政黨，開心到呢！得啦！知喇！今次唔使再做「阿二」，難怪嘅！

 

　　經民聯嘅議員，異口同聲咁大讚林鄭同佢哋嘅理念「好接近」、「好同意」，又話好高興林鄭咁快就開始搵政黨傾《施政報告》喎！其實呢，10月就出報告，而家先搵你傾真係唔算快，Jenny甚至覺得「抆」呢。

 

　　不過，就算林鄭點做都好，上屆CY留低嘅「蘇州屎」依然有排佢煩。因為即使經民聯講到點樣同林鄭「心靈相通」，但一講到取消強積金對沖方案呢壇嘢，臉還是要變一變的，佢哋始終強調政府要「正面」回應返商界嘅問題。睇嚟呢個結的確唔易解，經民聯作為建制派第二大黨，撐開政府，但又唔可以唔幫佢哋代表嘅商家出聲，惟有喺建議嗰度擺個姿態，齋叫大家溝通、溝通、再溝通。至於有冇用？你話呢？

 

琼子話冇LLJ

 

 　　至於民記主席李慧琼（琼子）就同Jenny講，林鄭同經民聯傾完，先至見民建聯，都冇咩特別嘅，佢話特首要見嘅團體咁多，佢係唔會以見面的次序去估計林鄭重視邊方面意見，又話相信大家都係咁諗喎。Jenny望望佢個樣，表情尷尷尬尬咁，即刻明晒！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

etnet榮獲HKEX Awards 2023 「最佳表現證券數據供應商」大獎► 了解詳情