收藏文章 

2017-07-18

建制泛民鬥到書展 如搵「唔得掂」做代言-掂!

  一年容易又書展喇!2017年嘅書展聽日開鑼,Jenny已經準備好車仔去「掃書」,你知啦,而家人人都可以係作家、畫家。作家都要食飯,Jenny絕對明白㗎,小妹作為消費精明眼,最鍾意趁書展呢個時候大手入貨,價錢夠實惠,慳返啲錢都夠High個Tea㗎!而建制同泛民個戰場就議會伸延到書展會場。

 

  今年書展聽日開始至25日喺灣仔會展舉行,今年嘅主題係旅遊。講起旅遊,Jenny就諗起今年都仲未有時間搭吓飛機出吓國添,睇嚟聽日去買返幾本旅遊書嚟睇都好喎!其實上年香港圖書館都公布咗數據,原來係圖書館十大最多人借嘅成人中文非小說類書入面,有9本都係旅遊書,貿發局果然識食住個勢上,Jenny都要畀個叻叻你!

  

如有吳克儉做代言人-一個字「掂」!

 

書展主題係旅遊 搵「唔得掂」做代言就Fit晒

 

  講開旅遊,Jenny真心強烈建議貿發局應該搵啱啱卸任嘅前教育局局長吳克儉做今年嘅書展代言人!真係「唔得掂」都即刻掂晒!話晒佢鍾意讀書到「每個月睇30本書」,加埋喺上屆政府嘅5年任期入面都去咗成60次外訪,差唔多每個月就去一次呀!呢個破晒紀錄嘅外訪次數令佢奪得「旅遊局長」嘅稱號,符合晒今年個「旅遊」主題,反正佢退下火線之後(其實之前都係),都冇咩特別嘢做,絕對有資格又時間,可以同廣大市民分享一下!順帶一提,「旅遊局長」呢5年賺賺埋埋嘅飛行里數都有成21.6萬里,夠換7套來回日本機票,睇完櫻花睇紅葉,再去賞雪嘆海鮮都夠有凸,真係「唔得掂」啊!Jenny完全係羨慕妒忌都來唔切!

 

  除咗旅遊書,Jenny都知道啲議員會趁書展出書,其中最落力Sell書嘅,真係非民主黨嘅「鄺神」鄺俊宇莫屬啦!「鄺神」未入立法會做嘢就已經寫緊書喇,今年已經第四年喺書展期間出新書。其實Jenny有好多師妹都係鄺神Fans,事關鄺神啲書唔係講議會、講政治,而係最煞食嘅愛情-小-說!雖然Jenny年紀都唔細喇,不過話晒都後生過,明白呢啲愛情小說對情竇初開嘅少女們係有幾大嘅吸引力,所以次次鄺神搞簽書會,都會出現長長嘅少女人龍。Jenny真心覺得鄺神堪稱係「香港MK愛情文學」嘅代言人!

 

 

 鄺神已經日日喺facebook洗版宣傳新書。

 

泛民有MK文學鄺神 建制有曾鈺成Target大人

 

  如果講到論政方面,前立法會主席曾鈺成就今年書展就出咗本《矛盾二集》。今個星期五(21)仲搞咗個對談會,搵埋民主思路嘅黃梓謙(Gary)一齊同佢傾吓一國兩制、政改爭議、行政長官選舉同埋民主政治咁,熱衷分析時局嘅讀者應該會覺得有趣吧!正如前兩篇文章所講,Jenny做咗呢行咁耐,對呢啲議題都仲有想唔通嘅地方,小妹如果當日有時間應該都會去聽聽,順道同曾(前)主席聚聚舊都好。而李慧琼(琼子)同日差唔多時間,就去書展講故仔畀小朋友聽。一於你Target大人,我Target細路,大包圍實冇死。

 

  唔講唔知大家知唔知,曾(前)主席連參考書都參一腳,同人合著咗本中學數學參考書《A Complete Tour in HKDSE Mathematics》。忽然咁講一講,Jenny先醒起,曾(前)主席係港大學數學系First Hon畢業!

 

  港澳研究會副會長劉兆佳都唔執輸,寫咗本《回歸後香港的獨特政治形態一個自由威權政體的個案》,Jenny聽聞佢寫完呢本書之後就會歸隱一排,做吓研究、寫返啲學術文章咁話。咁咪幾好囉!

 

  題外話,Jenny呢個消費精明眼,有著數係唔會自私收埋㗎,嗱!下面條Link度就有齊唔同攤位嘅優惠券,啱用就拎去啦!

http://hkbookfair.hktdc.com/tc/Visitor/Discount-Coupon.html

 

 

 

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新節目《說說心理話》原生家庭對成長有咩影響?改善溝通有計可施?► 即睇

更多言歸政傳文章
你可能感興趣
#立法會 #書展 #對談 #劉兆佳 #曾鈺成 #李慧琼 #MK文學 #鄺神 #吳克儉 #旅遊 #貿發局 #愛情 #優惠劵 #展覽 #文學
編輯推介
即時報價
全文搜索
Search
最近搜看
雙幣交易
聚焦兩會2024
More
Share