埋嚟睇！埋嚟聽！任總有嘢講！特首林鄭份《施政報告》籌備工作如火如荼，金管局前總裁任志剛作為幕僚之一，今日亦再出山寫網誌，講吓自己點睇香港嘅公共財政管理，行文間力撐林鄭嘅財政新哲學，而最Like就係嗰句「把握機遇，投資未來」。

 

 

做得「三大金融靠山」唔係唔寫文支持吓呀嘛？

 

重出江湖寫《觀點》 斥政府守財10年

 

　　任總當年仲係金管局總裁嘅時候，已經鍾意喺金管局網頁寫網誌，仲起咗個名叫《觀點》，佢好勤力㗎，個個禮拜都有嘢同大家分享吓，尤其係嗰啲「佢識你，你唔識佢」嘅財金政策同Terms，Jenny仲記得嗰陣係會吼住網誌更新，希望跟任總學吓嘢㗎。之不過，後來任總唔做，陳德霖嘅網誌就變咗不定期更新，雖然都好好睇，不過小妹恒心已經不復再了。

 

　　Jenny估應該係為咗配合10月出爐嘅《施政報告》造勢，一直被林鄭形容係「三大金融靠山」之一嘅任總，今日重出江湖再度執筆延續睽違已久嘅《觀點》喇！

 

　　任總今次主要係講《基本法》107條有關公共財政管理嘅條文，佢覺得過往十年政府一直採取「守財奴」政策，拖著經濟後腿。Jenny嘅解讀，即係任總覺得前財爺曾俊華一直都太孤寒？

 

以車為喻 施政報告有新嘢？

 

　　不過，任總呀！正如你自己喺文章入面都講，「從70年代中開始，協助歷任財政司預備年度《財政預算案》及協助起草撰寫預算案演辭的工作，有接近20年的時間，是內部團隊的成員，更有機會在《基本法》第107條條文起草時，表達我的意見。」咁其實咁多年入面，係咪有人當你講嘢耳邊風先？有冇內幕可以講多啲畀Jenny同廣大讀者知呀？

 

　　任總仲特別講到「107條」條文入面，「香港特別行政區的財政預算以量入為出為原則，力求收支平衡，避免赤字，並與本地生產總值的增長率相適應。」大讚用「相適應」而非「同步」，充滿智慧更反映出兼顧到要運用財政政策作宏觀經濟管理。

 

　　佢怕大家覺得難明，仲特登用揸車來比喻︰「當汽車行得太慢，便需要『踩油』；當汽車行得太快，便需要『收油』。換句話說，當經濟增長速度太慢，便需要增加政府開支、減稅和作出赤字預算;而當經濟增長速度太快，便可以用相反的財政政策。」

 

　　到咗結語，任總當然要Sell一Sell新任政府嘅「財政新哲學」，話「把握機遇，投資未來」的願景，令佢非常鼓舞。睇完成篇網誌，Jenny Feel到林鄭似乎有大搞作，搞到小妹愈來愈期待10月份《施政報告》添！

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

全新節目《說說心理話》青少年不可以戀愛！？真實個案講述驚心動魄經歷► 即睇