收藏文章 

2017-08-04

想做政助小花小草 成名上位就要趁早

  政府公布咗副局同政助名單幾日,大家嘅焦點除咗係最大爭議嘅教育局副局長蔡若蓮之外,原來一眾八十後政助都一樣咁「吸睛」!講足咁多日,大家仲係對呢幾位30未滿嘅政助們充滿好奇,咁今日Jenny就再同大家一齊嚟起吓呢班政壇「新鮮人」嘅底啦!

 

今屆最年輕小花 未破施俊輝紀錄

 

  想當初政府公布名單之時,Jenny一眼就睇到有幾個「二」字頭嘅朋友仔!一、二、三……Jenny一開頭仲以為一個起兩個止,點知原來有三個!包括創新及科技局政助張曼莉、商務及經濟發展局政助馮海容,同埋運輸及房屋局政助符傳富。而數到最後生嘅就係芳齡廿八嘅創新及科技局政助張曼莉喇!不過睇返佢個背景,之前係喺新世界到做執行董事兼聯席總經理嘅助理、行政辦公室經理,又唔係好覺佢同創科呢瓣有咩關係喎!或者可能好似Jenny之前咁講,後生女緊貼潮流,又會同多數係後生仔/女創立嘅Startup啱嘴形啲啩!

 

  張曼莉喺2015年個陣選區議會時得到范太范徐麗泰嘅全力支持,雖然輸咗,但依家年紀輕輕就做到政助呢個位,所以幾時都話輸選舉又有乜好怕喎!泊到個好碼頭,前途一樣可以一片光明!可惜嘅就係,破唔到上屆教育局政助施俊輝嘅26歲上任紀錄!

 


狀元新出路──政治助理


  呢班「新鮮人」除咗後生可畏之外,張沙紙都係咁閃令令㗎!例如上面提到嘅施俊輝,就係2003年嘅十優狀元,盛傳佢今屆都會繼續做教育局政助,不過首批名單就未有佢個名住。

 

  唔講唔知,今屆財經事務及庫務局政助楊寶蓮同施俊輝一樣都係2003年嘅十優狀元,佢仲係當年唯一一個讀文科嘅狀元添!Jenny睇返有關佢嘅報道,當年佢話為咗講普通話要字正腔圓,只會睇中央台嘅節目,放棄追台劇入面靚仔有型嘅明星,怕學壞口音喎!Jenny都要讚嘆一下,中學時代就咁識Do,抵你平步青雲咁去董伯伯嘅團結香港基金做高級研究員,依家仲入埋政府做政助啦!

 

  而另一位都係未踏入三字頭嘅運輸及房屋局政助符傳富,會考8A出身,入埋Big4做,都可以話係人生勝利組!雖然區選入面鎩羽而歸,但贏到知名度啊!依家咪又係入到政府做政助呢個肥缺!所以話狀元唔使個個都係做醫生、律師嘅,入返個啱嘅政黨,前路你想點創都可以啦!況且做醫生好大壓力㗎!(話口未完,呢幾日公院啲位又爆喇……)

 

贏在起跑線的小花

 

  未滿30嘅政助,呢度仲有一位。商務及經濟發展局政助馮海容,雖然佢就冇上面提過嘅幾位同儕咁「把炮」嘅成績表,但係勝在贏在起跑線!原來佢媽媽就係前市建局「一姐」譚小瑩,而爸爸馮康亦係前醫管局新界東醫院聯網總監。除此之外,佢仲係湯家驊搞嘅民主思路嘅理事,正宗官二代加埋有個行會成員師傅照住,做政助真係冇難度啦!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新節目《說說心理話》原生家庭對成長有咩影響?改善溝通有計可施?► 即睇

更多言歸政傳文章
你可能感興趣
#新鮮人 #贏在起跑線 #十優狀元
編輯推介
即時報價
全文搜索
Search
最近搜看
雙幣交易
財政預算案2024-25
More
Share